Hnuahlunte Perhnak 7

<<   HNUAHLUNTE PERHNAK 7  >>

1Ciafangin phungki pa in, “He thute khiah i peu im?” ti in zawt i. 2Ciafangin Stephen in, “Ulenaute le i paate, i ngai tuu-ih. Haran ah khuato hlanah Abraham khiah Mesopotamia ah a um lai in thangphathnak Pathian khiah Abraham hnenah daak ai, 3Abraham hnenah, ‘Na ram songin le na hin song in suak in i hmuhhnak ram ah feh tu.’ ti in ruai i. 4Ciafang in Abraham khai Khaldean ram in suak ai Haran ah khuato i. Ciata ah a paa thi fangin tunai ning khuato hmun he ramah thawn i. 5Pathian in a kefot hmun tuh rin co tuhin zaikhai pe lo i. Ikhalselai a fa rin nai napui lai lo ai cia ram khiah amah in ping tuh in le a hnua ai a fate in ping tuhin thukham i. 6Cen Pathian in amah hnenah, ‘Na cii khiah mi dang ram ah um tuh ai cia mite in ceng in can tuh ai kum zali song rim tuh i. 7Ciafangin ceng ai hmang tu mi phunte khiah Pathian in cawh tuh ing . Cia ben fangin cia ram in suak tuh ai he ta ah i na i per sah tuh i.’ ti in rel i. 8Ciafangin Pathian in Abraham hnenah vunpar cemhnak thukham pe ai Abraham in Aizek nai le ni riat fangin a vunpar cem sah ai Aizek in Zakuk nai ai Zakuk songin kin papui hlainih suak i.

9Papuite in iksik manin Joseph khiah Izip ramah zuar i. Ikhalselai Pathian khiah amah thawn um i. 10Pathian in Joseph khiah rimsuhnak hmuahhmuah songin suah ai Izip Pharoah hmai ah fimhnak le upathnak pe manin Pharoah in Izip le a inn hmuahhmuah uk tu in dah i. 11Ciafangin Izip ram le Khanaan ramah rian tlung ai rimsu rauh i. Ciafangin kin paate in rongei tuh nai lo i. 12Ikhalselai Zakuk in Izip ramah nimden um i ti za fangin kin paate khai hlat hmasa i. 13A velnih fangin Joseph khiah a ulenaute hmunah ling ruai ai Joseph ulenaute khiah Pharoah hnenah ling ruai i. 14Ciafangin Joseph in a paa Zakuk le a ulenaute a veksen in sawm sarih le panga khiah a hnenah ko i. 15Ciamanin Zakuk khai Izip ah zu ai ciata ah thi ai kin paate khai thi ve i. 16Ciale Zakuk khiah Sekhem ah phur ai Sekhem paa Hamor fate hmun ai tangka thawn Abraham ai lai hnak hlan song ah vui i.

17Ikhalselai Pathian in Abraham hnenah thukhamhnak khim dawn fangin Izip ramah Israel minungte zaai bial i. 18Ciafangin Joseph ling lo tu a dang kumpibawi suak i. 19Cia kumpibawi in kin mi phun khiah zawl ai kin paate khiah hnawmcan ai a fate thi tuh in lon ruai i. 20Ciateng fangin Moses te i. Moses khiah nau hmel mawi ngai i ai a paate inn ah hla thum tian cawm i. 21Amah khiah a paate in lon fangin Pharoah fenu in khul ai amah fapa bang in cawm i. 21Ciafangin Moses in Izip fimhnak hmuahhmuah zir liang ai pon lam le naper lamah thiam rauh i. 23Moses khiah kum sawmli khim fangin, a unau Israel mite vun tuh khiah a thin songah hleng i. 24Ciafang in Izip pa in Israel mi pakhat khiah a lovang in ur ruai hmu fangin Moses khai Israel pa bawm ai Izip pa khiah rek lio i. 25Ziangmanti fangin Pathian in Moses kut in amahte luat ruai tuh i ti khiah a unau Israel te in ling tuh vuah i. Ikhalselai anite in ling lo i. 26A thangha fangin Israel mite panih tawng lak tawk fangin a tawng tute hnenah, “I unau ningte, zaiman in pakhat le pakhat tawng dun i si?” ti in rem ruai tum i. 27Ikhalselai a ompui tawng tu pa in Moses khiah tul ai, “Aisu in kin vum ah kin uk tu le kin thukhantu in na dah i? 28Mania ah Izip pa na rek bangin i rek tum i sim?” ti in ti i. 29Ciamanin Moses khai tlan ai Midian ramah mikhual bang in um le ciata ah fapa panih nai i. 30Kum sawmli bo fangin, Bawipa Pathian vancung mi khiah thinghnuh niu songai meilai songin Moses hnenah hampalak ah daak i. 31Moses in hmu fangin ani khai ngaihsunur ai, a sik tuh in kawi le Bawipa Pathian aw khiah, 32‘Kaimah khiah na paate Pathian le Abraham Pathian le Aizek Pathian le Zakuk Pathian ing.’ ti in hleng i. Moses khai thing biakbo ai sik ngam lo i. 33Ciafangin Bawipa Pathian in amah hnenah, ‘Na kedawl hawk tu. Ziangmanti fangin na ding hmun laipua khiah a cianghlim i. 34Izip ramah i minungte harsa tuarhnak hmu zo ing. Amahte anhar ai auhnak aw khai zazo ing. Amahte luat ruai tuh in tolh i hang ing. Kawitu lai Izip ramah na hlat tuh ing.’ ti in ti i. 35‘Aisu in kin uktu le thukhantu in na bawn i?’ ti ai Israel minungte ai a thungai nuam lo ai elhnak he Moses khiah thinghnuh niu songin daaktu vancung mi kut thawn mi uktu le mi luat ruaitu tuhin Pathian in hlat i. 36He pa in amahte khiah luat ruai ben fangin Izip ram le a San Tipui le nelrawn song ah kum sawmli song ngaihsunurkul le hnikhnaihhnak hmuh i. 37He Moses khiah Israel minungte hnenah, ‘Ning unau songin Bawipa ning Pathian in kaimah bang Prawfet pakhat suak ruai tuh ai a thu ngai tuh i si.’ ti ai reltu Moses i. 38Amah khiah, hampalak ai pawlpui te hnenah Sinai tlang vum ai pontu vancung mi le kin paate thawn um tu pa i. Cia pa in Pathian ponghnak nunhnak thu khiah ngah ai kinte hnenah kin pe i. 39Kin paate in amah thu ngai lo ai, amahte in amah khiah amahte hmunin hnawt ai, amahte thin songin Izip ram ah let ngio ai, 40Aaron hnenah, ‘Kin hmai in feh tuh in pathian niuniu kin bawt tu. Ziangmanti fangin, Izip ramin kin suah tu he Moses le zai cang te i ti ling lo i sing.’ ti in ruai i. 41Amahte in kawlpaw zuk khiah bawn ai cia kawlpaw zuk hnenah a hlu pe le amahte kut ai bawnhnak ca in puai bawn in um tlang i. 42Ciafang Pathian khai amahte hmunin tlan ai vanvum ai thilte bia tuhin amahte khiah zam lio i. Cia khiah prawfet te ca-uk songai nganhnak, ‘Aw Israel phunte, nelrawn songah kum sawmli song ning rekhnak sumte le a hlu i pe i sim? 43I, ningte in bia tuh ai ning kut in bawnhnak Molok le ning pathian arsi Remphan bia i si. Babylon khua kaan ah ning thiar tuh teu ing.’ ti ai nganhnak bang in i.

44Kin paate in nelrawn songah tettikhanhnak Pathian biahmun tabernacle inn khiah Pathian in Moses hnenah, ‘Na hmu hnak bangin lo sa tu law.’ ti ai ruai bang in sahnak tabernacle nai i. 45Cen a hnua ai hleng tu kin paate in Zental mite khiah Pathian in kin paate hmai in hnawt sah ai kin paate in amahte ram co fangin cia tabernacle khiah Joshua kawmin cia ramah David suak hlan tian kawih i. 46Pathian in David zarto manin David in Zakuk Pathian ca tuhin tabernacle sa tuh in ngen i. 47Ikhalselai Solomon in Pathian inn pakhat sak i. 48Ikhalselai a Saangber Pathian khiah kut ai sahnak temple songah um lo ai, profet relhnak bang in, 49‘Vancung khiah i tauhkheng i, cen laivum khiah i kefot hmun i. Zai bang inn i sak tum i si? Cen i comhmun tuh tang zai bang i? Zai hmuahhmuah khiah i kut ai bawnhnak i lo im?’ ti in Bawipa Pathian in ti i.

51Mi thinruh le thinlung le vunpar cemlo tu ning te in ning paate bangin Ciang Rauhla khiah el tio i si.  52Ning paate in rim lohnak a kon prawfet um pa? Cen a Dikcang Pa hlenghnak thu a hlanvom ai relcia tute khiah amahte in rek ai tunin ningte khai a Dikcang Pa zuartute le rek tute i si. 53Ningte in vancung mite ai pehnak thukham ngah napui ai hlun lo i si.” ti in ti i. 54Anite in cia za fangin amahte thinlung khiah vang bang in dawt ai, amahte khai amah vumah kamriat i. 55Ikhalselai Stephen khai Ciang Rauhla thawn dim manin, vancung lam khiah sik meng le Pathian thangphathnak le Zisu khiah Pathian kiahhan lam ah ding in hmu ai, 56“Sik tuu-ih. Vancung khiah hong ai mi Fapa khiah Pathian kiahhan lamah ding in hmu ing.” ti in ti i. Ciafang in anite khai aw cawm ngai thawn huk ai amahte naa khiah hup ai thinkhat lungkhat in amah hnenah dawp ai 58Khua pua ah lon ai lungto in sep ai rek i. Tettikhan tute in amahte thuam khiah Saul tihnak tlangvalpa ke hamah pum i. 59Amahte in Stephen khiah lungto thawn sep ai rek lakin Stephen in Pathian khiah ko ai, “Bawi Zisu, i rauhla i saang tu law.” ti in ti i. 60Stephen khai caicin ai aw cawm ngai thawn au ai, “Bawipa, he sualhnak khiah amahte vumah lo dah malaw.” ti in rel ben fangin ani khai thi lio i.

<<   HNUAHLUNTE PERHNAK 7  >>

Leave a Reply

Your email address will not be published. Required fields are marked *