Pentecost: Ciang Rauhla hleng nia
Pentecost nia hleng fangin, anite khai a veksenin hmunkhat ah taai tlang i. 2Ciafangin camkhat in vancung in khuahu pui bangin aw hleng ai amahte tohmun inn khiah cia aw in dim i. 3Ciafangin meilai bang lai khiah hleng ai kaak ben fangin amahte vum ten ah khop i. 4Anite khai a veksenin Ciang Rauhla thawn dim ai, Ciang Rauhla in pong tuhin pe bangin mi dang pon in pong tlaang liang lo i. 5Ciatengin laivum pumpalah ai mi dikcang Judah mite khiah Jerusalem ah lo um i. Cia aw hleng fangin mizapui khai hmunkhat in kawi tlaang ai amahte pon ten in pong za manin multing in um tlaang i. 7Anite khai ngaihsunur rauh ai, “Zaimanin i? Hete a veksen in Galilee pon pongtu te i lo im?A kontih ai amahte in kin te hmun kin pon thawn pong khiah za i pa sing? 9Parthians le Medes le Elam mite le Mesapotamia ai um mite le Judea le Kappadocia le Pontus le Asia, 10Phrygia le Pamphylia le Izip le Cyrene hiang cingkim ai Libia ram le Rome ai khualtlawng tute Judah mite le Judah dan cungtu te, 11Krete mite le Arab te kinte in amahte in kinmah pon in Pathian perhnak naper lian ngaingai relhnak thu za i sing.” ti in ti i. 12Anite khai ngaihsunur le multing in um ai, “He khiah zai ti ca i pa?” ti in rel tlaang i. 13Ikhalselai a dangte in zauhsuam ai, “Hete khiah capittizu thar thawn ri i bang.” ti in ti i. 14Ikhalselai Peter khai hlaikhatte kawmin ding ai aw cawm ngai thawn amahte hnenah, “Ning Judea mite le Jerusalem ai umtu hmuahhmuah in he khiah ling tu i lai i relhnak ngai tuu-ih. 15Hete khiah ning umhnak bangin zukham i lo i. Ziangmanti fangin zinglam nazi pakua lek i lai. 16Ikhalselai he khiah prawfet Joel ai rel awnghnak, 17‘Ni hnuataber lam fangin i Ciang Rauhla khiah minungte vumah burh tuh ai ning fapa le ning fenute in prawfet bang in thurel tuh ai ning tlangvalte in ngaihsunurkul hmu tuh ai ning patar te in mang man tuh i. 18Cen i hnenum pasal le nupangte hnenah, cia nia ah i Ciang Rauhla khiah burh tuh ai amahte in prawfet bang in thurel tuh i. 19Vancung ah ngaihsunurkul hmuh tuh ai lai hnia ah ngaihsunurkul hmuh tuh ing. Thisan le mei le meikhu hmuh tuh ing. 20Bawi Zisu tolh leh nia hleng hlanah ni khiah thim tuh ai hla khai thisan cang tuh i. Ciafangin Bawipa hming kotu hmuah o tuh i.’ ti in Pathian in rel i. 22Ningte Israel minungte, he thute khiah ngai tuu-ih. Nazareth Zisu songin Pathian in ning lakah ngaihsunurkul naper tamngai per ai ciatih in tettikhan khiah ling ve i si. 23Cia pa khiah Pathian ai ruatcia le lingciahnak bangin ap ai, amah khiah ningte in pom ai misualte kut in thinglamteh vumah tar ai rek i si. 24Amah khiah Pathian in nung ruai leh ai, ciatih bangin thihhnak anharhnak thawn luat ruai i. Ziangmanti fangin amah khiah thihhnak in hen tuh ngio thill lo i. 25Ziangmanti fangin, David in amah thu khiah, ‘Bawipa khiah i hmai ah hmu tio ing. Ziangmanti fangin amah khiah i kiahhan lamah um manin i lau tuh lo i. 26Ciaman in i thin khiah lungawi ai i lai khai ang i. Ciazolo ah i pumpui khiah ummhnak thawn nung tuh i. 27Ziangmanti fangin nangmah in i rauhla khiah hell songah hlum tuh lo ai nangmah ai a Cianghlim Pa khai hmon siang tuh lo i si. 28Nangmah in nunhnak lampuite i ling ruai zo i si. Na hmai ah anghnak thawn i dim ruai tuh i si.’ ti in rel i. 29Ulenaute, a luat ngai in papui David thu rel tuh ing. David khiah thi zo ai phum zo ai a hlan khai tun nia tian kin hnenah um hlen i. 30Ciamanin amah khiah prawfet pakhat i le Pathian in amah hnenah, a songai suakhnak a fapa Khrih khiah kumpibawi cang tuh in suak ruai tuh ing ti in thukham khiah David in ling manin 31David in hete khiah lo hmu cia manin Zisu tholehhnak thu le a rauhla khiah hell ah hlum sah tuh lo ai a pumpui khai hmon tuh lohnak thu relcia i. 32Cia he Zisu khiah Pathian in nung ruai leh khiah kin te a veksenin a tettikhan i ing. 33Ciamanin Zisu khiah Pathian kiahhan lamah dohnak ngah ai a Pa ai khamhnak Ciang Rauhla khiah ngah manin ning hmuhnak le ning zahnak bangin he khiah kin burh i hang. 34Ziangmanti fangin David khiah vancung ah kaai lo i. Ikhalselai David in, ‘Bawipa Pathian in i Bawipa hnenah, 35“Na raalte khiah na kefot hmun tauhkheng ai na bawt sah hlanlo i kiahhan lamah to tu.” ti in ti i.’ ti in rel i. 36Ciamanin Israel mi phun hmuahhmuah in, thinglamteh vumai ning tarhnak he Zisu khiah Pathian in Bawipa le Khrih cang ruai zo i ti khiah a ciang ngai in ling tuu-ih.” ti in rel i. 37Amahte in cia thu za fangin amahte thin khiah sun ai Peter le apawstalte hnenah, “Ulenaute, zai bawn nga ing?” ti in zawt i. 38Ciafangin Peter in amahte hnenah, “Sir tu i lai, ning veksen in Zisu Khrih hming in tinim tu i lai ning sualhnak ning hlat sah tuh i. Ciafangin Ciang Rauhla lehsawng ngah tuh i si. 39Ziangmanti fangin a thukham hnak khiah kin Bawipa Pathian ai kohnak te ningte le ning fate le a hla ngai ai umtu mi veskente ca i.” ti in rel i. 40A dang pon tampui thawn tettikhan ai, “Ningmah veve khiah he misual phun songin o tuu-ih.” ti in thuso i. 41Ciafangin a ang ngai ai a relhnak saang tute khiah tinim ai cia nia ah mi thawng thum tha amahte hmunah belh i. 42Anite khai a kho ngai in apawstalte thucukhnak lam ah zuam ai hmunkhat in rongei tlaang ai hmunkhat in sawngen in um tlaang i. 43Mi hmuah in ngaihsunur in um ai apawstalte songin ngaihsunurkul le hnikhnaihhnak khiah suak liang lo i. 44A sangtute khai hmunkhat in um tlaang ai thil hmuahhmuah hmang tlaang i. 45Amahte nai hnak thilri le ramte khiah zuar ai a veksenin amahte samhnak le kulhnak bangin sem tlaang i. 46Nikhat hnua nikhat temple songah thinkhat in khawm tlang ai inn khat hnua inn khat ah rong khan tlaang ai anghnak le thinkhat in rong ei tlaang ai 47Pathian an in um tlaang i. Mi hmuahhmuah in amahte khiah cuan i. Bawipa in ohnak ngah tute khiah amahte hmun ah belh betbo i.