Ikhonium ah Paul le Barnabas khai a panih in hmunkhat in Judahte sanginn songah fehai thurel le Judah mite le Greek mite tam ngai in sang i. 2Ikhalselai a sang lo tu Judah mite in Zental mite khiah sopaw ai a sangtute ulenaute lakah thinraw ruai i. 3Ciamanin in anite khai cia khua ah a rai ngai um ai Bawipa thu khiah raalpha ngai in rel ai Bawipa in amah ngaihharhnak thu khiah hnikhnaihhnak le ngaihsunurkul thawn amahte kut in per ai ciatih in tettikhan i. 4Ikhalselai cia khua mite khai hmun nih in khan i. Hmun khat te in Judah te thawn um ai hmun khat te in apawstalte kawm in um i. 5Zental mite le Judah mite in a uktute kawmin amahte khiah siatsuah tum ai lungto in sep tum fangin 6Anite in cia khiah ling sah lio manin Laikhaonia ram ai Listra le Derbe khua le a hiang cingkim ram ah tlan ai 7Ciata ah kawspal thupha tazahaw i. 8Listra ah mi pakhat um ai cia pa khiah a te hlan a nuu pum song ai panin a kete lo ur awng le a ke ah tha nai lo manin vak ben lo i. 9Cia pa in Paul thurelhnak ngai ai Paul in amah khiah mitkhep lo in sik meng ai cia pa in cak thillhnak tuh sanghnak nai hmu fangin 10Aw cawm ngai in, “Ding tu.” ti in ti i. Ciafang in ani khai tho vut ai lamvak i. 11Paul ai bawnhnak khiah mite in hmu fangin anite khai Laikhaonia ponin, “Pathiante khiah minung bangin kin hnenah hleng i hang.” ti in au tlang i. 12Barnabas khiah Zeus ti in ko ai Paul khiah a thureltu ber manin Hermes ti in ko i. 13Ciafangin amahte khua hmai ah Zeus phungki pa khai mite kawmin khua kawldawngkham ah kawlpaw cang le parpar hual kawmin amahte hnenah hlu tuh in kawih i. 14Barnabas le Paul in cia khiah za fangin amahte silhnak thuam khiah zik ai mite kualakah dawp ai, 15“Zaimanin hete bawn i si? Kinte khiah ningmah bang minung i ve ing. He bang a lovang te bia lo in van le laipua le tipui le a songai umhnak hmuahhmuah bawntu Pathian sawn bia tuh in taza ning haw i ing. 16Cia Pathian in he hlan hmuah tu aisu khai amahte nuam bang in amahte hlanlam lo um ruai i. 17Ikhalselai a tetti khiah kin hlup lo in um lo ai amah in kin vumah a pha kin bawt ai van in ruah kin pe ai rong tam ngai a cuu bangin kin pe manin rong le anghnak thawn kin thin dim ruai i.” ti in rel i. 18Ciatih ai a relhnak thu in cia mite in amahte hnenah hlu tuh lo in a kham ben fangfang i. 19Ciafangin Antiok khua le Ikhonium khua ai Judah mite khai hleng ai cia mite khiah sopaw le Paul khiah lungto in huat ai a thi lio vuah in khua pua ah suah i. 20Ikhalselai thusangtu hnuahlunte khai Paul hiang cingkim ah ding fang in Paul khai tho ai khua songah lut le a thangha fangin Derbe ah Barnabas kawmin feh i. 21Cia khua ah kawspal thupha khiah tazahaw ai mi tamngai in thusang i. Ciafangin Listra le Ikhonium le Antiok ah let leh ai 22Hnuahlunte khiah sang kho ruai ai Pathian khiah a kho ngai in sang tuh ngio le rimsuhnak tamngai thawn Pathian ukhnak songah lut tuh i sing, ti in tha pe i. 23Sanginn pawlpui caang ah mi upate ril ben fangin anite khai rong ul in sawngen ai amahte khiah amahte sanghnak Bawipa kut ah ap i. 24Pisidia ram pumpalah ah tlawng ben fangin Pamphilia ah hleng i. 25 Perka ah Pathian thu tazahaw ben fangin Attalia ah zu i. 26Ciata in Antiok ah khawm in feh i. Antiok khiah tunai amahte in per ben zo na per tuhin Pathian ngaihharhnak hnenah amahte khiah ap awng hmun i. 27Ciata ah hleng fangin pawlpuite khiah hmunkhat in khawm tuh in ko ai Pathian in amahte songin Pathian ai perhnak le Zental mite hnenah sanghnak dawngkham khiah Pathian in hong hnak thute rel i. 28Ciafangin thusangtu hnuahlunte kawmin a rai ngai um tlang i.