1Pathian lungkhimhnak bangin Khrih apawstal pertu Paul in Efesa ai Pathian thusangtute le Khrih Zisu songai sanghnak naite hnenah, 2Ngaihharhnak le thinnuamhnak khiah kin Pa Pathian le Bawi Zisu Khrih hnenin hleng tu seh. 3Khrih songin vancung ramah rauhla hmuifu hmuahhmuah thawn hmuifu kin burtu kin Bawi Zisu Pa le Pathian hnenah hmuifu um tu seh. 4Cia khiah amah hmai ah ithnak thawn a cianghlim le mawhhluk tuh um tuh lo in laivum hampan hlanah Zisu songin kin ril zo ai 5Amah lungkhimhnak le lungawihnak bangin amah hnenah Zisu Khrih songin a fate cang tuhin kin ril zo i. 6Cia khiah a ngaihharhnak thangphathnak an tuhin kin ril ai a ithnakber letlo pa songah kinte khiah kin lang zo i. 7Cia a ithnak ber letlo pa in a thi thawn kin tlanzo ai a lianngai a ngaihharhnak bangin sual kin hlatzo i. 8Cia ngaihharhnak songin fimhnak hmuahhmuah le lingthiamhnak khiah a dimin kin pezo i. 9Amah ai ruatciahnak bangin a nuamhnak bangin a thup awnghnak a lungkhimhnak thu kin ling ruaizo i. 10Cia thuthup khiah ziang i ti fangin a cu khim fangin Pathian in vancung le laivum ai thilte khiah hmunkhat in Khrih songin khawm tuh i lai. 11Cia Zisu songah amah thukamhnak bangin zai hmuahhmuah bawntu pa ai ruathnak bangin kinte in rocohnak ngah i sing. 12Cia ro khiah kinte Khrih sang hmasatute in a thangphathnak an tuhin ro kin pehnak i. 13Ningte in khai ning ohnak kawspal thupha thuhman ning za fangin Khrih khiah sang ai ning sang ben fangin Khrih songah thukamhnak Ciang Rauhla thawn tacik ning khet i. 14Cia Ciang Rauhla khiah a laiciazo kin rothil khiah kin ping ngah hlanlo amahkhan hnak ca ai kin pehnak i. Ciafangin Bawi Zisu thangphathnak an tuh i sing.
15Ciamanin kin khai Bawi Zisu songai ning sanghnak le thusangtute veksen in ning ithnak za fangin 11Ningmah ca in comlo in Pathian an ai i sawngen cangin ning hih tio ing. 17Kin Bawipa Zisu Pathian le thangphathnak Pa in Zisu ling manin ngahhnak fimhnak le thu laarruaihnak khiah ning pe tuhin a Ciang Rauhla khiah lo ning pe tu selai 18Ning thinlung mit khiah ning hong sah in ningte in amah ai ning ko manin ning ummhnak khiah ning lingruai tu seh. Cen Pathian thusangtute songai rothil khiah zaitluk in lian le thangpha i ti khai ningte in ling tuhin le 19A power lianngai thawn per bangin a sangtu kinte ca in zaitlukin a power khiah lian i ti khai ning ling thaihnak tuhin saw ning nget ing. 20Cia huthawm thawn Pathian in Khrih khiah thihhnak in tho ruai ai vancung ramah amah kiahhan kut lamah to ruai fangin ciatihin a power laarruai ai 21Acuzahte le thunaitute le power naitute le miuktute miangmo hnak in khuaha in sang ai he san lek i lo in a hleng tuh lai san ai hming hmuahhmuah hnakin sangsawn i. 22Cen Pathian in Khrih ke hnia ah zai hmuahhmuah dah liang ai zai hmuahhmuah lakah Khrih khiah pawlpui lu ah dah i. 23Cia pawlpui khiah Khrih ruang pumpui i ai amah dimhnak thawn zai hmuahhmuah dim ruai liang i.