<< 2 KAWRINTHIAN 7 >>
7Ithnakte, he bang thukhamhnak kin nai manin taksa le rauhla rim ruaitute hnenin kinmah veve ciang ruai nga singkhaw Pathian kih kong in cianghlim ngai in um nga sing. 2Ning thin songah kin ca in a khaan nai tuu-ih. Aisu khai hnawmcan lo i ing. Aisu khai sual ruai lo i ing. Aisu khai zawl lo i ing. 3He khiah ning mawhhluk caak ai ning rel i lo ing. Ziangmanti fangin ning rel zo bangin ningte thawn thi khat tuh le ningte thawn nung khat tuhin ningte khiah kin thin songah um i si. 4Ning lakah ning um rauh ing. Harsa i tuarhnak hmuahhmuah lakah i anghnak khiah a dim in um i. 5Ziangmanti fangin Masidonia ah kin hleng fangin thin kin nuam lo ngai i. Nuamhmun cangin hnai kin hnok i. Sumpua ah tawngdunhnak lolek, cen kin songah lauhnak lolek um i. 6Ikhalselai mihnawmte khiah thinnuam ruaitu Pathian in Titus khiah hleng ruai ai ciatih in thin kin nuam ruai i. 7Titus hleng lek i lo ai ningte in amah khiah thinnuam ruai manin cia thu in thin kin nuam ruai i. Cen ningte in i ngaaihnak thu le ning lungsiahnak le i ca ai ning zuamhnak thu khiah amah in kin rel ai ciafangin i ang am i. 8Ziangmanti fangin i laikuathnak in lung ning sia ruai manin i sir rih napui ai tun ngawn i sir lehlo i. Ziangmanti fangin i lai in campuikhat lek lung ning sia ruai i. 9Lung ning sia ruai manin i ang lo i. Ikhalselai lungsia in ning sir ruai manin i ang i. Ziangmanti fangin Pathian ai tumciahnak bangin lung ning sia ai kinmah manin zai khai ning sunghnak um lo i. 10Ziangmanti fangin Pathian daihhnak bang ai lungsiahnak in sualsirhnak suak ai ciafangin ohnak suak ai sir leh kul lo i. Ikhalselai laivum lungsiahnak in thihhnak suak i. 11Pathian daihhnak bangin lung ning sia manin ning songin suakhnakte khiah ruat tu cuk ih: Ningmah veve mawhhluk kul lo in um tuhin zuamhnak le hiaamhnak suak i. Cen zaitlukin rawhnak, thinlauhnak, ummhnak, thinkarhhnak suakai a dikcang ai bawn tuhin a ralring in um i si. He thu lakah ningte khiah mawhhluk tuh um lo in ningmah veve laarruai zo i si. 12Ciamanin i laikuathnak khiah a sualtu pa manin i lo i. Cen a tuartu pa manin khai i lo i. Ikhalselai ningte in zaitluk in kin it hnak khiah Pathian hmaiah ning hmu thillhnak tuhin ning kuat ing. 13Ciamanin thin kin nuam ngai i. Cia kin lek thin kin nuam i lo ai Titus khai ang rauh hmu manin kin ang i. Ziangmanti fangin ning veksen in Titus thin thaar ruai leh i si. 14Titus hnenah ningte thu khiah a hngal in rel khalingkhaw zak i thi lo i. Ziangmanti fangin ning hnenah zai hmuahhmuah a hmanin ning rel bangin Titus hnenah kai ai ning ca ai i hngalhnak khai lo hman i. 15Ningte in kin thungaihnak le lau kong le thingbiakbo kongin amah khiah ning caanghnakte hih fangin Titus khai a tamngai in ning it i. 16Ningte khiah zaizongza ah ning umm in ning rinsan thill manin i ang i.
<< 2 KAWRINTHIAN 7 >>