<< 2 KAWRINTHIAN 11 >>
11I voihnak khiah i tuarsah rih tuhin ning umm ing. I ruat sah tuu-ih. 2Cianghlim iksikhnak thawn ik ning sik ing. Pa nai lailo fenu bangin Khrih khiah ning pa cang tuhin thawl ning than sah ing. 3Ikhalselai Eve khiah rul in a ngian thawn zawl bangin ningte khai Khrih khiah ning thin ngaingai le a ciang niu in hlun lo in lamtler pang tuh i lau i. 4Ziangmanti fangin kin ai ning cuk lohnak a dang Zisu thu khiah midang pakhat in ning rel selai, cen ning za awnghnak Ciang Rauhla lo a dang rauhla ngah i silai, cen ning sang cia kawspal thupha lo a dang kawspal khiah sang i silai, a baai niu in sang bengbo i si.
5Ikhalselai a upaber pawstalte hnakin in i niam ce lo i. 6Thurel thiam lo i ta rinin fimhnak nai ing. Cia khiah a phun caangin ning ling ruai zo ing. 7Kawspal thupha khiah a man um lo in a lovangin ning rel manin ning do tuhin kaimah veve niam ruai khiah i sual i awm? 8Pawl dangte khiah rok sah ai ning bawm ing. 9Ning hnenah i um tengin i samhnak um fangin ningte khiah thilrit ning phur ruai lo ing. Ziangmantin fangin Masidonia ai kawi tu ulenaute in i samhnak i bawm i. Ningmah vumah kontih bangin khai thilrit ning phurh tuh lo in kaimah veve dahai ciatih bangin dah tuh ngio ing. 10Khrih thuhman i songah um song hmuah in Akhaia ramai umte aisu in khai i hngalhnak i kham thill tuh lo i. 11Ziangman in? Ning it lo manin maw? Ning it khiah Pathian in i ling sah i. 12Kin camra ai hngal nuamte in hngal thill lohnak tuhin i bawn kel bangin bawn tuh hlen ing. 13Ziangmanti fangin ciabang mite khiah a hmanlo apawstalte le thudon napertute i ai Khrih apawstal bangin paal khel i. 14Cia khiah ngaihsunur tuh um lo i. Ziangmanti fangin Satan rinin khuavaar vancungmi bangin paal khel i. 15Ciamanin Satan hnenumte in khai dikcanghnak hnenum bangin paal khel tuh khiah ngaihsunur tuh um lo i. Amahte in amahte perhnak bangin a bo fangin hlawhtham ngah tuh i. 16Ciamanin mivoi i ti in i ruat tuh lo in thu ning rel leh thio ing. Ikhalselai mivoi ti in i ruat le i si, mivoi bangin i siar tu i lai ciafangin a tlawmniu teng hngal bawn ngang. 17Kaimah veve rinsan ai i hngal in pong fangin Bawipa bangin pong lo ai mivoi bangin pong ing. 18Mi tamngai in laivum dan in hngal manin kai khai hngal tuh ve ing. 19Ning fim ze manin mivoite khiah angngai in thinsau in or ben i si. 20Ziangmanti fangin hnenum ai ning hmangtu le ning zawltu le zauh ning suamtu le amah le amah veve dotute in ning biang ning beng in khai tuar bengbo i si. 21Ciate bangai bawn tuh ve khiah ngam lo khiah zakthi kongin ning rel ing. Mivoi bangin pong ngangkhaw-midangte ai hngalhnak lakah kai khai hngal ngam ve ing.
22Amahte khiah Hebrew mite im? Kai khai i ve ing. Anite khiah Israel mite im? Kai khai i ve ing. Anite khiah Abraham fate im? Kai khai i ve ing. 23Khrih hnenum im? Kai khai i ve ing. Ciatih ai pong heh mi am bangin pong ing. Ziangmanti fangin anite hnakin a tamsawn in naper ing. Anite hnakin vel tamsawn thawngtlahnak tuar ing. Anite hnakin a rauhsawnin vithnak tuar ing. Thi tuhin kin dah leklo i. 24Judah mite hnenin vel sawmthum le velkua vithnak vel nga ngah ing. 25Tingpum in vel thum vithnak tuar ing. Lungto in sephnak velkhat ngah ing. Velthum timbaw hnawmhnak tuar ing. Tipui thuanthum songah nikhat le zankhat tuar ing. 26A catloin khualsi in vak ing. Tipui thawn laukul tuar ing. Damiah thawn laukul tuar ing. I miphun thawn laukul tuar ing. Zental mite thawn laukul tuar ing. Khua songah laukul tuar ing. Hampalakah laukul tuar ing. Tipui vumah laukul tuar ing. A hmanlo ulenaute hnenin laukul tuar ing. 27Hehlawti in na per ai mitmu lo in um tuak de ing. Rikam le tihal khai ling ing. Rong lo in khai um tuak de ing. Khuasik khai tuar ing. Ponsil tuh nai lo in khai um ing. 28Ciazolo in nisiar in pawlpuite veksen ca ruat in thin rimsu tuar ing. 29Aisu khiah thanau fangin tha i nau ve lo in um ing? Mi pakhat in sual te fangin i thin songah mei ai kang bangin um lo in um ing? 30Hngal lengkhaw i thanau laarruaitute lakah hngal tuh sawn ing. 31Thudon rel lo khiah Bawi Zisu Pa le Pathian in i ling i. 32Damaskhus khua ah kumpibawi Aretas kuthnia ai uktubawi in Damascenes khua khiah i pom tuhin raalkap thawn kulh ruai i. 33Ikhalselai khua kulhhnak sen songai dawngkham niu songin bawm thawn i hla teu ai cia uktu bawi kut songin i luat i.
<< 2 KAWRINTHIAN 11 >>