<< 1 KAWRINTHIAN 11 >>
11Kaimah in Khrih cuung bangin i cuung tu ve ih. 2Ningte in zaizongza ah i hih manin le kaimah in ning cuk bang thiah in i cukhnakte hlun manin ning an ing. 3Khrih khiah mi veksen lu i ai pasal khiah nupang lu i. Cen Pathian khiah Khrih lu i. Cia khiah ningte in ling i daih i. 4A lu khuk kongin sawngen le prawfet thurel reltu pa in a lu khiah nautat i. 5Ikhalselai a lu khuk lo ai sawngen tu le prawfet thureltu nupang in a lu nautat i. Ziangmanti fangin amahte khiah a lumettu nupang thawn bangpah i. 6Ziangmanti fangin nupang in a lu khuk hlahlekhaw a sam khai met tu berh seh. Ikhalselai nupang in a sammet i hlah le a lut met tuh khiah nautat kul lekhaw cia nu in a lu khuk tu seh. 7Ziangmanti fangin pasal in a lu khuk kul lo i. Ziangmanti fangin amah khiah Pathian hmel le thangphathnak i. Ikhalselai nupang khiah pasal thangphathnak i. 8Ziangmanti fangin pasal khiah nupang songin suak lo i. Ikhalselai nupang khiah pasal songin suak i. 9Ziangmanti fangin pasal khiah nupang ca ai bawnhnak i lo i. Ikhalselai nupang khiah pasal ca ai bawnhnak i. 10Ciamanin le vancung mite manin nupang in a lu vumah ukhnak hnikhnaihhnak khu pha i. 11Ikhalselai Bawipa songah nupang in pasal rinsan lo in um thill lo i. Cen pasal khai nupang rinsan lo in um thill lo i. 12Ziangmanti fangin nupang khiah pasal songin suak bangin pasal khai nupang songin tehnak i. Cen zai hmuahhmuah khiah Pathian songin suakhnak i. 13Nupang in a lukhuk lo in Pathian hnenah sawngen tuh mawi awm? Ruat tu cuk ih. 14Laivum dan rinin pasal in sam saungai nai fangin nautat kul khiah ning cuk lo im? 15Ikhalselai nupang in sam saungai nai lekhaw a thangphathnak i ti in ning cuk lo im? Ziangmanti fangin amah khuk tuhin a sam pe i. 16Ikhalselai eldun nuam tu um le i si, dan dang nai lo i ing. Cen Pathian pawlte in khai nai ve lo i.
17Cen hetih in ning tiam fangin ning an i lo ing. Ziangmanti fangin hmunkhat in ning khawm tlaang fangin phathnak i lo ai hnophnak tuhin khawm i si. 18Ziangmanti fangin a hmasaber ah pawlpui pum ning khawm fangin ningte in a khan in um i si ti in za ai a hrekkhat ah ngawn sang khai sang ing. 19Ziangmanti fangin ningte lakah Pathian ai lungkhimhnak mite laarruai tuhin thukhat lo in um i si. 20Ciamanin hmunkhat ai ning khawm tlaang fangin Bawipa zanfak ei tuhin khawm lo i si. 21Ziangmanti fangin rong ning ei fangin pakhat in amah zanfak khiah ei hmasa lio le pakhat tu rikamin um ai a dang pakhat tu zukham in um i si. 22Eihmun tuh le dinghmun tuh inn nai lo i sim? Ihlahle Pathian pawlpui le ei tuh nai lote nautat i sim? Zai ning rel ngang? Ning an ngang? He thu ah ning an tuh zel lo ing.
23He thu khiah Bawipa hnenin ngah ai ning rel sai ing: A zuar zanah Bawi Zisu in sangper lang ai, 24Sawngen ben fangin cia sangper khiah khan le, “He khiah i pumpui i. Ningmah ca i. I hihhnak tuhin he khiah bawn tuu-ih.” ti in rel i. 25Ciatihbang in zanfak ei ben fangin khuat khai lang ai, “He khuat khiah i thi songai thukham thar i. He khiah i hihhnak tuhin ning ding cang in bawn tuu-ih.” ti in rel i. 26Ziangmanti fangin he sangper ning ei caang le he khuat ning ding caang fangin Bawipa a tolh leh hlan tian Bawipa thihhnak thu khiah rel ning cang i. 27Ciamanin a tlaklo ai sangper ei le khuat dingtu khiah Bawipa pum le thi lakah sual i. 28Ikhalselai aisu in khai amah veve nuncan khiah ngaisung tu selai sangper khiah ei in khuat khiah ding tu seh. 29Ziangmanti fangin Bawipa pumpui i ti in ruat lo ai a tlak lo ai ei le ding tu in amah vumah cawhkuanhnak khiah ei ai ding i. 30Ciamanin ningte lakah mi tamngai khai thanau le a ur in um ai a tampui khai ning thi zo sek i. 31Ikhalselai kinmah veve khiah a hmanniu in thucit le singkhaw aisu in khai thu kin cit kul tuh lo i. 32Ikhalselai kin thu khiah kin cit sah fangin laivum mite camra in cawhkuan tuar lohnak tuhin Bawipa in kin tiam i. 33Ciamanin i ulenaute, rongei tuhin hmunkhat in ning khawm fangin pakhat le pakhat haak dun tuu-ih. 34Rikamtu um lekhaw amahte inn ah rong lo ei tu selai ciafangin hmunkhat in ning khawm tlaang fangin cawhkuan ngah tuh lo i si. Cen a taanghnak thute khiah i hleng fangin ning rel leh ngang.
<< 1 KAWRINTHIAN 11 >>