1 Kawrin 1

<<  1 KAWRINTHIAN 1 >>

1Pathian lungkhimhnak bangin Zisu Khrih apawstal tuhai kohnak Paul le kin unau Sosthenes hnenin, 2Khrih Zisu ai cianghlim ruai ai kin Bawipa le amahte Bawipa Zisu Khrih hming a ko tu nuamhmun cang ai mi veksen kawmin mi cianghlim ti ai kohnak Kawrin khua ai Pathian pawlpui te hnenah, 3Kin Pa Pathian le Bawipa Zisu Khrih hnenin ngaihharhnak le thinnuamhnak ning hnenah hleng tu seh. 4Zisu Khrih ai ning pehnak Pathian ngaihharhnak manin i Pathian khiah a catlo in an tio de ing. 5Ziangmanti fangin zai hmuahhmuah lakah thurel lamah i tu seh, fimhnak lamah i tu seh, a veksenin amah in milian ning cang ruai zo i. 6Ciabangin Khrih thu tettikhanhnak khai a hman i ti in ning songin laarruai i. 7Ciamanin kin Bawi pa Zisu Khrih hleng leh tuh khiah umm ngai in ning haak kongin ningte in rauhla lehsawng lamah ning samhnak um lo i. 8Kin Bawipa Zisu Khrih hlengleh fangin ningte khiah mawhhluk tuh um lo in amah in a bo tianin ning kho ruai ruai tuh i. 9Kin Bawipa a Fapa Zisu Khrih thawnin hmunkhat in pawldun tuhai ning ko tu Pathian khiah a rinsan le a sang tlak i.

Pawlpui khan ruai tu

10Cen tunin kin Bawipa Zisu Khrih hming in ning ngen ing: Ning veksenin thinkhat in pong tlang tuu-ih. Ningmah lakah khanhnak um ruai mah ih. Ikhalselai thinkhat le lungkhat in um tuu-ih. 11Ziangmanti fangin ulenaute, ningte in a hau hnelhno ai um i ti in Khloe inn ai umtute in i rel i. 12I rel nuamhnak khiah he bang i: Ningte aisu hmuah in, “Kai Paul minung ing, Kai Apollos minung ing. Kai Siphas minung ing. Kai Khrih minung ing.” ti in rel ten i si. 13Khrih tu khan sio i awm? Paul tu ning ca in thinglamteh vumah rek i awm? Paul hming in tinim i sim? 14Krispus le Kaius siarlo aisu khai ti ning nim lo manin Pathian an ing. 15Ciamanin aisu in khai i hming in tinim ing ti in rel thill lo i si. 16Stephanas innkuate khai tinim awng ing. Cialo tu a dang aisu khai tinim lo ing. 17Ziangmanti fangin Khrih in tinim tuhin i hlat lo ai kawspal thupha tazahaw tuhin i hlat i. Fimhnak pon thawn rel tuhin i hlat lo i. Cialo fangin Khrih thinglamteh khiah a lovang cang tuh i.

Zisu Khiah Pathian power le Pathian fimhnak i

18Ziangmanti fangin a thi mite ca ah thinglamteh thu tazahawhnak khiah mivoi thurelhnak bang i. Ikhalselai nun ohnak cotute ca ah tu Pathian power i. 19Ziangmanti fangin, “Mifimte fimhnak khiah hnawm sah tuh ing. Ruatthiamte ruathnak khiah hnawmcan tuh ing.” ti in ngan zo i. 20Mifimte khiah a konah i? Laithiamte a konah i? Laivum ai thurelthiamte a konah i? He laivum mite fimhnak khiah Pathian in voihnak ah cang ruai i lo im? 21Ziangmanti fangin laivum fimhnak thawn laivum mite in Pathian ling lo manin, Pathian fimhnak in voihnak tazahawhnak sangtute o tuh in Pathian lungkhim i. 22Ziangmanti fangin Judah mite in hnikhnaihhnak sii i. Greek mite in fimhnak sii i. 23Ikhalselai kin in thinglamteh ai rekhnak Khrih thu tazahaw i ing. Cia thu khiah Judah mite lakah bah ruaitu cang ai Greek mite lakah voihnak thu bang i. 24Ikhalselai a kohnak mite Judah le Greek mite lakah tu Khrih khiah Pathian power le Pathian fimhnak i. 25Ziangmanti fangin Pathian voihnak khiah minungte hnakin fim sawn ai Pathian thanauhnak khiah minungte hnakin thahat sawn i. 26Ziangmanti fangin ulenaute, a kohnak ngahtu ningte khiah sik tu cuk ih. Minung ruat danin ruat fangin, mifim le thahat le mi upa tampui ning ko lo i. 27Ikhalselai Pathian in laivum mivoite khiah mifimte zakthi ruai tuhin ril ai laivum ai thanaute khiah thahatte zakthi ruai tuh in ril i. 28Cen mi thupui ti ai ruathnak te zailailo can tuhin laivum ai a niamte le mi ai nautathnak mite khiah Pathian in ril ai zailailo te khiah ril i. 29Ciamanin aisu in khai a hmai ah tluangkhawng tuh um lo i. 30Ikhalselai ningte khiah Khrih Zisu songin Pathian minung i si. Cen Khrih Zisu khiah Pathian ai i le amah khiah Pathian in kin ca ah fimhnak le dikcanghnak le cianghlimhnak le luangtlanhnak tuhai bawn i. 31Ciamanin Lai Cianghlim songah: “Tluangkhawng nuamte in Bawipa lakah tluangkhawng tu seh.” ti ai nganhnak bang i.

<<  1 KAWRINTHIAN 1 >>

 

Leave a Reply

Your email address will not be published. Required fields are marked *