Kolose 1

<<  KOLOSE 1 >>

1Pathian lungkhimhnak bangin Zisu Khrih apawstal cangtu Paul le kin nau Timothy hnenin 2Kolose ai umtu micianghlimte le mikungte hnenah,  ngaihharhnak le thinnuamhnak khiah kin Pa Pathian le Bawipa Zisu Khrih hnenin hleng tu seh. 3Pathian le kin Bawipa Zisu Khrih Pa  khiah an ai saw ning nget tio i ing. 4Ziangmanti fangin Bawi Zisu ning sanghnak le micianghlimte ning ithnak thu za i ing. 5Cen ningte in kawspal thupha thuhman songai ning za awnghnak ummhnak khiah  ningmah ca in vancung ah khawi manin cia ca in khai Pathian an i ing. 6Cia kawspal thupha khiah laivum hmuahhmuah ah hleng bangin ning hnenah khai hleng ve i. He kawspal thupha hleng hmun caangah a thai thai bangin he kawspal thu ning za nia ai panin le Pathian ngaihharhnak ning ling nia ai panin ning songah a thai thai ve i.  7He thute khiah ning ca ah Khrih tazahaw saza a kungniu ai pertu  le kin ithnak kin naperpui Epaphras hnenin khai zir i si. 8Ciang Rauhla songin ning ithnak thu khai Epaphras in kin rel i.

9Ciamanin he thu kin za nia ai panin ning ca in a catlo in saw ning nget tio i ing. Cen rauhla fimhnak le linghnak khai Pathian in ning pe thai in le amah daihhnak khiah ning ling thill thai in le 10Cen Bawipa a lungkhimhnak bangin nung in  naper pha ning perhnak hmuahhmuah  lakah a thai ning nai thill thai in le Pathian  khiah ningte in ling amam thill tuhin le 11Amah thangphathnak power thawn ningte khiah thahathnak thawn ning  kho ruai tuhin le anghnak thawn le thinsaungai in zaihmuahhmuah tuar ben thaihnak le 12Khuavaar songai micianghlimte ro khiah co bawm tlak ai kin bawntu kin Pa khiah an kongin saw ning nget i ing.  13Amah in kinte khiah khuathim power  songin kin tlan ai  a ithnak a Fapa ukhnak songah kin dah zo i. 14Cia a Fapa songin a thi in nun ohnak le sualhlathnak ngah i sing.

15Cia a Fapa khiah mit ai hmu thil lo Pathian hmel bang i ai nunghing hmuahhmuah lakah a te hmasaber pa i. 16Ziangmanti fangin vanvum le laivum ai thil hmuahhmuah le mit ai hmu thil le hmu thil lo thil hmuahhmuah  le kumpibawi ukhnak le acuzah le power khiah amah ca ai bawnhnak i. Zaizongza khiah amah in bawn ai amah ca  ai bawnhnak i. 17Zaizongza um hlanah amah  lo um zo ai zaizongza khiah amah in  huam liang i. 18Amah khiah  Pawlpui  lu i. Amah khiah a hampantu le thihhnak in tholeh hmasabertu i. Ciamanin amah khiah zaizongza lakah upaber i. 19Ziangmanti fangin a Fapa songah zaizongza a dim in um tuh khiah a Pa lungkhimhnak i. 20Cen laivum ai le vanvum ai zaizongza hmuahhmuah  amah thawn remruai tuhin  thinglamteh vumah a thi in remhnak bawn i. 21Cen he hlanah ningte khiah mitluangmi le a phalo na ning per manin  ning thin songin  amah thawn raaldun awng napui ai  22Tuntu  a taksa pumpui thihhnak songin amah in ning remruai ai ciamanin ningte khai a hmai ah a cianghlim le mawhhluk tuh  um lo le hau tuh um tuh lo i. 23Ciamanin sanghnak songah a kho in um in kawspal thupa songai ummhnak hnenin tlan mah ih. Cia kawspal thupha khiah vanhang hnia ai nunghing hmuahhmuah hnenah tazahaw zo ai cia tazahaw tu tuhin kaimah khiah tazahaw saza i per ruai i.

24Ciamanin ning  ca in i tuarhnak lakah i ang ai Khrih ai hlumhnak anharhnak khiah Khrih pumpui a  pawlpui ca in i taksa songin dim ruai ing. 25Ciamanin kaimah khiah   Pathian thu khim ruai tuhin  ningte ca in kilkhawl tuhai i pehnak bangin pawlpui ca in tazahaw saza i cang ruai i. 26Cia Pathian thu khiah he hlan kum rel zolo le san rel zolo ah thup awnghnak thu i ai tuntu a micianghlimte hnenah lingruaihnak thu i. 27Cia he micianghlimte hnenah he thuphnak thu thangphathnak khiah Zental mite lakah zaitluk in lian i ti in Pathian in lingruai i. Cia thuthup khiah zai i ti fangin – ning songah Khrih um ai cia Khrih khiah thangphat kul ummhnak i. 28Khrih Zisu hnenah aisu hmuahhmuah a khimliang in kin kawih thill thai in aisu hmuahhmuah  hnenah amah thu khiah tazahaw  in tiam i ing. Cen aisu hmuahhmuah fimhnak hmuahhmuah thawn cuk i ing. 29Cia ca in kai khai  amah power thawn na per ing. Cia  a power in i songin a lianrauh in na per i.

<<  KOLOSE 1 >>

Recent Posts