1 Mai in na lawithing te kang thai in
Na dawngkham te hong tu, aw Lebanon.
2 Aw nempan, kap tu.
Ziangmanti fangin lawithing khiah tlu lio i.
Ziangmanti fangin thing lian puipui khiah hnawm sio i.
Aw Bashan ai hlim thing te, kap tuu-ih.
Ziangmanti fangin tu pui song ai thing te khiah tlu sio i.
3 Tukhal tu te kaphnak aw khiah ngai tu.
Amahte thangphathnak khiah hnawm sio i.
Chintit te huk hnak aw khiah ngai tu.
Jordan ai thingsuam te khai hnawm sio i.
4BAWIPA i Pathian in, “Ro tuh ai dah hnak tu te khiah a fak paih tu. 5Cia tu nai tu te in amahte khiah ro ai sir hnak nai lo i. A zuar tu te in, ‘BAWIPA khiah hmuifu tu seh. Ziangmanti fangin kaimah khiah i lian i.’ ti i. Amahte tukhal tu te in ninghio lo i. 6Ziangmanti fangin ram songai um tu te khiah ninghio tuh nawn lo i hang ing ti in BAWIPA in ti i. Ikhalselai kaimah in aisu hmuah khiah a ompui le a kumpibawi kut ah pe tuh ing. Amahte in cia ram khiah taih tuh ai amahte kut songin amahte khiah o tuh lo ing.”ti i.
7Ciamanin ro tuh ai dah hnak tu te a farah berber te khiah fehpui ing. Tokrolh panih lang ing. Tokrolh pakhat khiah Ngaihharhnak ti in ko ing. A khatta khiah Tangkhathnak ti in ko ing. Ciafangin tu te khiah fehpui ing. 8Hla khat song ah tukhal tu pathum khiah hnawt ing. Kaimah in amahte khiah hua ai amahte in khai i hua i. 9Ciafangin kai in, “Na cawm tuh lo ing. A thi tu te khiah thi tu seh. A rall tu te khiah rall tu seh. A taanghnak te in amahte veve khiah ei dun tu seh.” ti in ti ing. 10Ciafangin kai khai Ngaihharhnak tokrolh khiah lang ai, mite hmuahhmuah thawn thukham dun hnak khiah pilh ruai tuhin tan nih in cem ing. 11Ciamanin cia nia ah cia thukham khiah pilh lio i. Ciatih in tu run lakah a farah te in i hmu ai cia khiah BAWIPA thu i ti ling i. 12Ciafangin kai in amahte hnenah, “Lung ning khim lekhaw, hlawhtham i pe tuu-ih. Lung ning khim hlahlekhaw i pe mah ih.” ti in ti ing. Ciamanin anite in i hlawhtham khiah tangka sawmthum khiah teh ai i pe i. 13Ciafangin BAWIPA in i hnenah, “Cia tangka khiah bel bawn tu pa hnen ah lon tu.” ti in i ruai i. Cia tangka khiah amahte in i man ca ai pehnak i. Ciamanin kai khai cia tangka sawmthum khiah lang ai BAWIPA inn songah bel bawn tu pa ca in lon ing. 14Ciafang in a khatta i tokrolh Tangkhathnak khiah Judah le Israel te unau khiah khek ruai tuhin, tan nih in cem ing.
15Ciafangin BAWIPA in i hnenah, “Ciaben fangin, a voi tukhal pa thilri khiah vong tu. 16Ziangmanti fangin, ram songah tukhal pakhat suak ruai tuh ing. Cia pa in a pai tu te khai zainam tuh lo i. Tu niu te khai sii tuh lo i. A ruh ek te khai bawl sah tuh lo i. Cen a cak te khai rong paih tuh lo i. Ikhalselai amah in a thau tu te sa khiah ei tuh ai a keruh te khiah nawi lio in seu tuh i.
17 Tu run te khiah zam tu,
Zai haih tlak lo tukhal pa khiah rimsu tu seh.
Vangsau in a baan le a kiahhan mit khiah lo dawt tu seh.
A baan khiah ro tuh lio i.
A kiahhan mit khiah caw tuh lio i.”ti in ti i.