Thukhantute-2

<<  THUKHANTUTE 2  >>

1Ciafangin Bawipa  Vancung mi khiah Kilkal in Bochim ah  hleng ai, “Izip ramin ning suah ai ning paate hnenah i khamhnak ram ah ning kawih ing. Cen ‘zaikom in khai ningte thawn lungkhim ai kham dunhnak khiah pilh tuh lo ing. 2Cen he ramai umtu mite thawn khai lungkhim in thukham dun tuh lo i si. Amahte awlta khiah bal sah tuh sio i si.’ti in ning ruai ing. Ikhalselai i thu khiah i ngai lo i si. Zaimanin hetih bangin bawn i si? 3Ciamanin kai in, ‘Amahte khiah ning hmai in ning hnawt sah tuh lo i hang ing. Ikhalselai amahte khiah ning nak ah hling bangin ning sun tuhai amahte pathiante in thang bangin ning awk ruai tuh i.’ ti in ning rel ing.” ti in ti i. 4Ciatih bangin Bawipa  Vancung mi in Israel mite     veksen hnenah rel fangin mi zapui khai aw cawm ngai thawn kap tlaang i. 5Ciafangin cia hmun khiah amahte in Bochim ti in ko ai ciata ah Bawipa  hnenah raithawi i. 6Joshua in amahte khiah hlat fangin Israel mite khai amahte cohnak ram ping tuhin tlung i.

7Ciamanin mirunpui in Bawipa khiah Joshua nung song le Bawipa na per hnak hmuahhmuah le Israel ca ai a bawthnak hmuah lingtu Joshua hnua ai upate nung song hmuah Bawipa na khiah per sah i. 8Bawipa hnenum Nun fapa Joshua khai kum za le kum haa fangin thi i. 9Ciafangin amahte in Joshua khiah Kaash Mual saklam ai Efraim mualtlang ai Joshua ro cohnak ram Timnath Serah ah vui i. 10He a paa san pawl hmuah thi sio fangin Bawipa le Israel  mite ca ai Bawipa bawnhnak ling lo tute san thar suak i.

11Ciafangin Israel mite in Bawipa hmai ah a pha lo bawn ai Baalte khiah bia i. 12Amahte khiah Izip ramin suah tu a paate Bawipa Pathian zam ai amahte cingkim ai ram dang mite pathiante khiah hlun ai cia pathiante khiah bia ai Bawipa khiah thinraw ruai i. 13Amahte in Bawipa khiah zam ai Baal le Ashtoreth te khiah bia i. 14Ciamanin Israel lakah Bawipa khiah raw rauh i. CiamaninBawipa in amahte khiah mirok tute hnenah ap ai cia mite in amahte khiah roksio i. Cen amahte khiah a hiang cingkim ai amahte raalte kut ah zuar ai amahte in a raalte khiah tawng ben nawn lo i. 15Israel mite in raaltawng tuhin feh cang in Bawipa relhnak bangin le khamhnak bangin amahte khiah Bawipa in tawng ai sung ruai  i. Ciamanin anite khai thincawl bik in um i.

16Ciafangin Bawipa in thukhantute khiah suak ruai ai amahte roktute hmunin cia thukhantute in luat ruai i. 17Ikhalselai amahte in thukhantute thu khiah ngai lo ai a dang pathiante hnenah phatemah tuan ai amahte khiah bia i. A paate in Bawipa  thukham ngai in vak awng bangin, anite in vak lo ai a rang ngai in Bawipa thukham khiah ngai awl i. 18Bawipa in amahte ca in thukhantute khiah suak ruai fangin Bawipa khiah cia thukhantupa thawn umkhat  manin cia thukhantu pa nung song hmuahin amahte raal kut songin luat ruai i. Ziangmanti fangin amahte nemhtu le hnaihnok ruaitu te manin Israel mite khai kap fangin amahte khiah Bawipa in ninghio i. 19Ikhalselai cia thukhantute thi fangin anite khai a paate hnak in tlai in sual amam ai a dang pathiante khiah hlun ai amahte khiah bia i. Amahte sualhnak naper le thinruh ai um khiah thleng nuam lo i.

20Cafangin Bawipa khai Israel mite lak ah thinraw rauh ai, “He mi phunte in a paate hnenah i ruaihnak i thukham lakah sual ai i thu khiah ngai nuam lo i. 21Ciamanin kai khai Joshua thi fangin a taanghnak mi phunte khiah pakhat bang khai hnawt sah tuh lo ing. 22Ciatih in Israel mite in Bawipa  thu khiah a paate bangin ngai tuh le tuh lo cu tuh ing.”ti in ti i. 23Ciamanin Bawipa in cia mi phun te khiah hnawt vut lo in taang ruai hlen i. Cen Joshua kut ah khai ap lo i.

<<  THUKHANTUTE 2  >>

Recent Posts