Thukhantute 16

<<  THUKHANTUTE 16 >>

Samson le Delilah

1Ciafangin Samson khai Kaza ah feh ai phatemah pakhat khiah hmu ai cia nuu thawn itkhat i. 2Cia thu khiah Kaza mite hnenah, “Heta ah Samson kawi i!” ti in rel fangin, anite khai cia hmun khiah kulh ai amah khiah khua kawl dawngkham in zan khuavar bawh i. Anite khai dapthen in um tlang ai, “Thangha nitlang fangin rek nga sing.”ti in ti i. 3Samson khai zan seulai tian dapniu in um ve le seulai fangin tho ai, cia khua kawl dawngkham khiah a khuam panih kawmin pom ai phok le a zauhnak thingtlepte kawmin a kodar ah phur ai  Hebron ralkhat mual vumah thiar teu  i.

4Ciahnua ah Samson in Sorek Rawnlai ai nupang Delilah tihnak  tlak i. 5Ciafangin Filistin  bawite khiah cia nuu hnenah kawi ai, “Amah khiah zawl tulai, a thahathnak khiah zaiber in i, ti le kontih in amah khiah neh in amah khiah penin rim thilhnak tuhin kin zong sah tulai, kin veksenin tangka thawngkhat le zakhat  na pe tuh i ing.” ti in ti i.

6Ciamanin Delilah in Samson hnenah, “Na     thahat hnak khiah a konteng in i? Cen a kontih in na rim tuhin zai thawn na pen thil tur?” ti in zawt i. 7Ciafangin Samson in cia nuu hnenah, “Amahte in a ro lailo kahpukri thar pasarih in i pen lekhaw tha nai tuh lo ai mi dang bang i cang tuh lio i.” ti in rel i. 8Ciamanin Filistin  bawite in a ro lailo kahpukri thar pasarih khiah cia nuu hnenah kawih ai, cia nuu in Samson khiah cia rite thawn pen i. 9Ciafangin cia nuu thawn a khaan songah mite khiah Samson bawh in um i. Ciafangin cia nuu in Samson hnenah, “Filistin te in na pom tum i, Samson.” ti in ti i. Ikhalselai Samson in cia kahpukri khiah mawca ri khiah mei in kang ai cat bangin cat i. Ciamanin a thahat hnak thuthup khiah ling sah lo i.

10Ciafangin Delilah in Samson hnenah, “Sik tu, zauh i suam ai thudon i rel i si. Tunin ninghio niu in zai thawn na pen tuh khiah i rel tu.”ti in ti i. 11Ciamanin Samson in Delilah hnenah, “Amahte in aisu in khai hmang awng lohnak rihual thar thawn a kho ngai in i pen meng lekhaw, tha nai tuh lo ai mi dang bang i cang tuh lio i.”ti in rel i. 12Ciamanin Delilah in rihual thar khiah lang ai Samson khiah pen ai amah hnenah, “Filistin te in na pom tum i, Samson.”ti in ti i. Ciafangin cia inn songah mite in amah khiah bawh i. Ikhalselai Samson in cia ri te khiah  mawca ri bangin cat sek i.

13Ciafangin Delilah in Samson hnenah, “Tuntian tu zauh i suam ai thudon i rel i si. Zai thawn na pen tuh khiah i rel tu.” ti in ti i. Ciafangin amah in cia nuu hnenah, “I lu ai i sam tom sarih khiah thiamtakhnak cet ai thiam thawn  phiar  in huk thawn kalh lesikhaw tha nai tuh lo ai mi dang bang i cang tuh lio i.” ti in rel i.  14Cia nuu in a sam khiah thiamtakhnak cet ai thiam thawn phiar ai huk thawn kalh ben fangin, amah hnenah, “Filistin te in na pom tum i, Samson.” ti in ti i. Ikhalselai Samson khai a mitmu in phok sut ai a thiamtakhnak cet le a huk khiah a thiam kawmin duk berh i.

15Ciafangin Delilah in Samson hnenah, “Na thinlung khiah kaimah hnenah um lai lo in a kontih in, ‘Na it ing.’ ti thill i si? Vel thum zauh i suam ai na tha umhmun khai i rel lai lo i si.” ti in ti i. 16Ciatih bangin cia nuu in nisiar in amah khiah a pon thawn hnaihnok ruai fangin Samson khai a thi banghma in thinluah in um i. 17Ciamanin a thin songai bangin a veksenin rel sio ai amah hnenah, “I sam khiah met awng lo i. Ziangmanti fangin kaimah khiah i nuu pum song ai panin Pathian hnenah Nazirit ing. I sam khiah met lekhaw i tha khiah pai tuhai,  tha nai tuh lo ai mi dang bang i cang tuh lio i.” ti in rel i.

18Samson in a veksenin rel sio khiah Delilah in ling fangin, Filistin te bawite khiah ko ai, “Kawi tu zual ih. Ziangmanti fangin amah in a thin  songai bang in i rel sio i.” ti in rel i. Ciamanin Filistin  bawite khai cia nuu hnenah amahte kut ah tangka kawmin kawi i. 19Ciafangin cia nuu in Samson khiah a khuk ah mitmu ruai le mi pa pakhat khiah a sam tom pasarih khiah met tuh in ko ai a sam khiah met sah i.  Ciafangin Delilah in Samson khiah rimh panai Samson khai a tha nai nawn lo i. 20Ciafangin cia nuu in, “Filistin  te in na pom tum i, Samson.” ti in ti i. Ciafangin Samson khai phawk ai, “Vel dang bangin suak in kaimah veve luat ruai ngang.” ti in ruat i. Ikhalselai Samson in Bawipa khiah a hnenah um nawn lo i hang, ti khiah ling lo i.

21Ciafangin Filistin te in amah khiah pom ai a mit khiah kuak sah berh ai Kaza ah fehpui i. Amah khiah dar ri thawn a ke khiah pen sah ai thawng songah rong rialtu in haih i. 22Ikhalselai, a sam khiah a met khelleh ah khaang leh betbo i.

23Filistin bawite khai amahte pathian Dagon hnen ah a hlu lian ngai thawn raithawi tuhin hmunkhat in khawm tlang i. Amahte in, “Kin pathian in kin raal Samson khiah kin kut ah kin ap zo i!”ti in rel i. 24Mi zapui in Samson khiah hmu fangin amahte pathian khiah cuan ai, “Kin pathian in kin raal khiah kin kut ah kin ap zo i. Kin ram hnawm ruaitu le a tamngai kin rektu pa.” ti in rel i. 25Amahte khiah hiam ngai in puai teng fangin, “Puai kin bawt sah tuhin Samson ko tuu-ih.”ti in ti i. Ciafangin Samson khiah thawnginn songin kawih ai amahte khiah puai bawt i. Samson khiah khuam laklawh ah haih i. 26Ciafangin Samson in a kut awh tu tlangval niu hnenah, “Hngai tuhin temple do hnak khuamte phat ngang.” ti in ti i. 27Ciafangin temple songah pasal le nupang tam ngai thawn a dim in um i. Filistin bawite hmuah a veksenin um i. Samson puai bawnhnak sik tuhin innphu vumah pasal le nupang thawngthum dung um i.

28Ciafangin Samson in Bawipa khiah ko ai, “Aw Bawipa Pathian, ninghio in i hih tu! He velkhat  niu tha i pe rih tu, Aw Pathian. I mit panih ca in Filistin te khiah velkhat  phuzul rih ngang!”ti in ngen i. 29Ciafangin Samson in temple do hnak a laitaber khuam panihte khiah pakhat a kiahhan lamah, a khatta a kekeh lamah awh i. 30Ciafangin Samson in, “Filistin mite thawn thi khat ngang!”ti in ti ai  a tha naihnak hmuah thawn cia khuamte khiah tul ai cia temple khiah bawite le a songai umtu mite veksen vumah tlok i. Ciamanin a thi fangin a rekhnak te khiah a nung lai ai a rekhnak te tah in tam sawn i. 31Ciafangin a unaute le a paa songkhatte in amah khiah lang ai Zorah le Eshtaol laklawh ai a paa Manoah hlan ah vui i. Israel mite khiah kum kul song a thukhan sah i.

<<  THUKHANTUTE 16 >>

Recent Posts