1 A Saangber Pathian inn songai umtu mi khiah
A Cungnung Pathian nihlim hnia ah um tuh i.
2 Kaimah in BAWIPA khiah,
“I been hmun le i buamhmun, i Pathian i.
Amah khiah rinsan tuh ing.” ti in rel tuh ing.
3 Thu ngai in ar pomtute thang songin na luat ruai tuh i.
Cen a thi thai lio urhnak thawn khai na khel ruai tuh i.
4 Amah in a ko thawn na hup tuhai,
A ko hnia ah buan tuh i si.
A thuhman khiah na luum pui le na lum niu i tuh i.
5 Ciamanin zanlai ai kihkul te khiah na lau tuh lo i.
Cen sunlai ai conkiang khai kih tuh lo i si.
6 Khuathim lakai vak tu urhnak khai kih tuh lo i si.
Cen sunlai ai hnawm ruai tu khai na lau tuh lo i.
7 Mi thawngkhat khiah na hiang ah tlu tuh i.
Thawng zakhat khai na kiahhan lamah tlu tuh i.
Ikhalselai pakhat bang khai na nong ah kawi tuh lo i.
8 Na mit lek in misualte lehsawng khiah hmu tuh i si.
9 Nangmah in i benhmun,
a Sangber BAWIPA khiah na inn in hmang manin,
10 Na vumah a pha lo hleng tuh lo i.
Cen na inn nong ah urhnak khai kawi tuh lo i.
11 Ziangmanti fangin amah in a vancung mite khiah na kilkhawl tu tuhin na pe tuh i.
12 Na ke in lung sui tuh lo in cia vancung mite in nangmah khiah amahte kut in na dong tuh i.
13 Nangmah in chintit le a ru nai rul khiah fon tuhai,
Chintit niu le rul khiah na ke in tlawh tuh i si.
14 Amah in kaimah khiah i it manin,
Amah khiah luat ruai tuh ing.
Amah in i hming i ling sah manin,
amah khiah do tuh ing.
15 Amah in i ko tuhai, kaimah in awi tuh ing.
Harsahnak tawk fangin amah thawn um tuh ing.
Amah khiah luat ruai tuhai upat tuh ing.
16 Amah khiah nun sau ruai tuh ai amah khiah o tuh ing.