1 Aw vancung mite BAWIPA,
na tabernacle khiah zaitluk in mawi i.
2 I rauhla in BAWIPA tualvante khiah ngai ze manin thikhum tum i.
3 I thin le i pumpui in a nung Pathian khiah ko i.
4 Kawlva rinin na tabernacle ah inn nai i.
Aw vancung mite BAWIPA,
i Kumpibawi le i Pathian,
Paipi in khai a ti tii hmun tuhin na awlta vumah a bu sa i.
4 Na inn songai umtute khiah a hmuifu i.
Amahte in na cuan tuh thliahthlo i. Selah
5 Na tha na rinsan tu mi le Zion ah tlawng tuhin a thin songin tum tu pa khiah hmuifu i.
6 Amahte in Baka rawn zawllai ah hleng fangin,
Cirhti tawk i.
Ruah khai sii ai tikhurte dim ruai i.
7 Amahte khiah a cak ngai in nisiar in feh ai
Zion ah Pathian hmai ah hleng tlang i.
8 Aw BAWIPA, vancung mite Pathian,
i sawngenhnak i za sah tu.
Aw Zakuk Pathian, i ngai tu. Selah
9 Aw Pathian, nangmah in kin luum khiah kin sik sah tu.
Na rilhnak pa hmai khiah sik sah tu.
10 Ziangmanti fangin na tualvan ah ni khat um tuh khiah ni thawngkhat tah in pha sawn i.
Mi sualte inn ah um tah in i Pathian inn dawngkham kiltu i nuam sawn i.
11 Ziangmanti fangin, BAWIPA Pathian khiah ni le luum i.
BAWIPA in ngaihharhnak le thangphathnak pe tuh i.
A dikcang niu ai nungtu te hnenah amah in thilri a pha pakhat bang khai pe lo in um tuh lo i.
12 Aw vancung mite BAWIPA,
Na rinsan tute khiah hmuifu i.