1 Kin thapui Pathian hnenah lasa tuu-ih.
Zakuk Pathian hnenah anghnak aw thawn au tuu-ih.
2 Congcing le guitar le darbu te kawm in lasa tuu-ih.
3 Hla thar le hlaran fangin thirhlung khiah tum tuu-ih.
Puai nia ah tum tuu-ih.
4 Ziangmanti fangin cia khiah Israel mite ca thukham i.
Zakuk Pathian ai upadi dan i.
5 He khiah i ling lohnak pon pong hmun Izip ram pumpalah ah amah khiah vak fangin,
Joseph hnenah tettikhan hnak i.
6 Amah in, “Amahte kodar vumai thilrit khiah sawng sah ing.
Amahte in bawm khiah awh kul lo i.
7 Rim ning su fangin i ko fangin, ning bawm ing.
Khuari songin ning awi ing.
Meribah ai ti hnenah ning cu awng ing. Selah
8 Aw i minungte, i ngai tu i lai ning tiam tuh ing.
Aw Israel mite, i thu i ngai tuu-ih.
9 Ning lakah ram dang mite pathian nai mah ih.
Ram dang mite pathian khai bia mah ih.
10 Kaimah khiah Izip ramai ning suah tu ning BAWIPA Pathian ing.
Ning kaa khiah hong tu i lai, ning thun ngang.
11 Ikhalselai i minungte in i aw khiah ngai nuam lo i.
Israel mite in kai thawn zaikhai bawn nuam lo i.
12 Ciamanin amahte thusawm dunhnak bangin nung tuhin amahte thinlung ai ruathnak bangin nung ruai ing.
13 Aw, i minungte in i thu i ngai selai,
Israel mite in i lampui hlun ta selai!
14 Amahte raal khiah nemh sah tuh napui ing.
Amahte tawngtute khiah tawng sah tuh napui ing.
15 BAWIPA huatute in amah thu khiah ngai khel i.
Ikhalselai amahte khiah kumzangza in cawh tuh i.
16 Amah in amahte khiah a ur ber sangvut thawn cawm tuh napui i.
Lungpui songai khoitilu thawn ning kham ruai tuh napui ing.