Psalm 66

<<  PSALM 66  >>

 Laivum mi ning veksenin Pathian hnenah ang kong in au tuu-ih.

2  A hming zul kong in lasa tuu-ih.
A cawm ngai in amah khiah cuan tuu-ih.

3  Pathian hnenah, “Zaitluk in na naperhnak khiah ngaihsun urkul i.
Na huthawm khai lian ze manin na raalte in na thu na ngai tuh i.

4  Laivum mi hmuah in na bia tuh i.
Laivum mi hmuah in na cuan in lasa tuh i.
Na hming cuanhnak la khiah amahte in sa tuh i.” ti in rel tuu-ih.

5  Pathian naperhnak sik tuhin kawi tuu-ih.
Amah in minung fate hnenah a bawnhnak khiah ngaihsun urkul rauh i.

6  Tipui khiah lai ro ah cang ruai i.
Amahte in run khiah ke thawn tan i.
Ciata ah amah lakah kin ang tuh i.

7  A huthawm thawn kumzangza in amah in uk i.
A mit thawn mi hmuahhmuah sik i.
Mi tawng nuamte in amah tawng tuhin tho ma seh.         Selah

8  Ning minungte, Pathian khiah hmuifu bur tuu-ih.
Amah cuanhnak aw khiah zak ruai tuu-ih.

9  Amah in kin rauhla khiah a nung te lakah kin dah sah i.
Kin ke khai kin thawn siang lo i.

10 Ziangmanti fangin, aw Pathian nangmah in kin cu zo i si.
Tangka khiah er bangin kin er zo i si.

11 Nangmah in thang songah kin kawih zo i si.
Kin zaang ah rimsuhnak kin phurh zo i si.

12 Kin lu vumah mite khiah vak ruai i si.
Mai song le ti songah vak zo i ing.
Ikhalselai thil tamngai umhmun ah kin kawih i si.

13 Na inn ah mai thawn taihnak a hlu thawn kawi tuh ing.
I khamhnak thu bang in bawn tuh ing.

14 Cia thukham khiah i kaa in pong zo i.
Cen i harsa fangin kaimah in rel awng zo ing.

15 Nangmah hnenah sumhnam a thau ngai ngai khiah mai in tai in raithawi tuh ing.
Tu cang rimhmui thawn kawlpaw le me khai hlu tuh ing.         Selah

16 Pathian kih tu ning veksenin, kawi tu i lai ngai tu-ih.
I rauhla ca in amah ai bawnhnak khiah rel tuh ing.

17 I kaa thawn amah hnenah kap ing.
I lei thawn amah khiah cuan ing.

18 I thin songah sualhnak um lekhaw,
BAWIPA in i ngai tuh lo i.

19 Ikhalselai BAWIPA in i ngai zo i hang.
I sawngenhnak khiah i ngai sah zo i.

20 I sawngenhnak khiah i ngai sah ai ngaih i har tu Pathian khiah hmuifu tu seh.

<<  PSALM 66  >>