1 A ngaingai in i rauhla in Pathian khiah pong lo niu in iang i.
Amah hnenin i ohnak hleng i.
2 Amah lek khiah i lungpui le i o tu i.
Amah khiah i khakber tu i.
Ciamanin a rauhngai in i hlin tuh lo i.
3 Minung khiah zaicam tian tawng tuh i si?
Ning veksenin a tlu banghma khan le a sawn hnelhno sen bangin ning rek tuh berh i.
4 Amahte in amah khiah a saang hmunin tlok ruai nuam i.
Amahte in thudon khiah daih rauh i.
Amahte kaa thawn hmuifu bur khel napui ai
Amahte thin songin tu awrsia cam i. Selah
5 I rauhla, pong lo niu in Pathian lek iang tu.
Ziangmanti fangin i ummhnak khiah amah hmun lek ah umm ing.
6 Amah lek khiah i lungpui le i o tu i.
Amah khiah i khakber tu i.
Kaimah khiah i hlin tuh lo i.
7 Pathian khiah i o tu le i thangphathnak i.
I thapui i lungpui i.
I buanhmun khiah Pathian songah i.
8 Ning minungte, amah khiah a catlo in rinsan tuu-ih.
A hmai ah ning thin songai thu khiah rel tuu-ih.
Pathian khiah kin buanhmun i. Selah
9 A ngaingai in mi nauta te khiah tikhu bang teng i.
Mi upate khai thudon bang teng i.
Zazu ah khai selai, amahte khiah tikhu hnak in zaang sawn i.
10 Mi thil long sah tuhin tum mah ih.
Mi thil ru sah tuhin khai ruat mah ih.
Milian te in nai amam fangin,
amahte khiah ot mah ih.
11 Pathian in vel khat rel zo i.
Cen he khiah vel nih zazo ing.
Pathian lek in huthawm nai i.
12 Cen ngaihharhnak khai nangmah lek in nai i si, aw BAWIPA.
Ziangmanti fangin aisu hmuah khai amahte naper bangin tham i si.