1 Zaimanin a pha lo songah hngal i si,
aw mi BAWIPA?
2 Na lei thawn hnophnak khiah bawn hnelhno i si.
A san ngai razor bangin,
thudon na khiah per hnelhno i si.
3 A pha lo khiah a pha tahin na daih sawn i.
A hman pong tahin thudon rel na nuam sawn i. Selah.
4 Mizawl thai lei, mi ngeu thai ponka khiah na daih i.
5 Ciamanin Pathian in kumzangza in na hnawmcan tuh i.
Amah in na umhmun in na dok tuh lio ai,
a nung mite umhmun ramin na phai tuh ai na lang tuh teu i. Selah.
6 Mi dikcangte in khai hmu tuhai, lau tuh i.
Amah khiah hnihsan tuhai,
7 “Pathian khiah rinsan lo ai a thilri tamngai sawn rinsan tu pa khiah he pa i.
A sualhnak lam sawn ah kho am am i.”
ti in ti tuh i.
8 Ikhalselai kai tu Pathian inn songai a hinghliang oliv thingkung bang ing.
Pathian ngaihharhnak khiah a kumzangza in rinsan ig.
9 Nangmah na ca cuan tuh ing.
Na minungte lakah na hming ca in naper tuh ing. Ziangmanti fangin cia khiah a pha i.