1 Pathian khiah kin buanhmun le kin tha i.
Rimsu harsa fangin a catlo in kin bawm tu i.
2 Ciamanin laivum rin bo lio selai,
mualpuite khai tipui lakah thiar sek khalselai,
3 Runpui khai tho in huk khalselai,
mualpui te khiah hlin in khoi khalselai,
kin lau tuh lo i. Selah
4 Runpui pakhat um ai cia runti in Pathian khuapui ang ruai i.
Cia khua songah a Sangber Pa umhmun a cianghlim tabernacle um i.
5 Pathian khiah cia khua songah um manin,
cia khua khiah hnawm tuh lo i.
Varciang fangin Pathian in cia khua khiah bawm tuh i.
6 Ram dangte khiah hnaihnok in um ai,
kumpibawi ramte khai hnawm i.
Amah in a aw khiah suah ai,
laivum khiah zuul sek i.
7 Vancung mite BAWIPA khiah kinte thawn um i.
Zakuk ai Pathian khiah kin buanhmun i. Selah.
8 Kawi in BAWIPA naperhnak khiah sik tuu-ih.
Amah in laipua khiah cimpil ruai i.
9 Laivumah raaltawnghnak bo ruai i.
Amah in kahpuk khiah ek ai feipui khiah tumnih in cem i.
Siphuh leng khai mai songah tai i.
10 Dapthen in um tulai, kaimah khiah Pathian i ti khiah ling tu.
Mi phun hmuah lakah i thang tuh i.
Laivum ah i thang tuh i.
11 Vancung mite BAWIPA khiah kinte thawn um i.
Zakuk ai Pathian khiah kin buanhmun i. Selah.