1 Kumpi BAWIPA ca in la sa fangin,
i thin songah ruathnak pha ngai suak i.
I lei khiah laingan thiam ngai pa hmanghnak fawmtin pen bang i.
2 Nangmah khiah mi fapate hnak in na mawi sawn i.
Na ponghnak khiah mawi ngai i.
Ciamanin Pathian in kumzangza in hmuifu na bur i.
3 Aw Thahat Pa, na vangsau khiah na kawngpui ah na thangphathnak thawn le bawi bang in vawh tu.
4 Thuhman le thinniam le dikcang ca in,
bawi ngai in siphuh to kongin feh tu.
Na kiahhan kut in ngaihsun urkulte na cuk tuh i.
5 A san ngai na conkiang in na raalte thin khiah dawt tu seh.
Mi phun dangte khiah na ke hnia ah bok tu seh.
6 Na kumpibawi tauhkheng khiah kumzangza le kumzangza tauhkheng i, aw Pathian.
Na kumpibawi ram khiah dikcanghnak faikiang thawn uk i si.
7 Dikcanghnak khiah na daih ai a pha lo khiah hua i si.
Ciamanin Pathian, na Pathian in na khukpuite kanin anghnak thau thawn na pawh zo i.
8 Na thuamte khiah myrrh le aloe le kassia rimhmui thawn dim i.
Vui haa thawn sahnak kumpibawi innte song in la in nangmah khiah na ang ruai i.
9 Na bawi nupuite lakah kumpibawi fenute khai um bial i.
Cen na kiahhan kut ah Ophir ai sui thawn thuam in kumpibawinu ding i.
10 Ngai tu, aw fenu.
Na bil in ngai in ngaisung tu.
Na minungte le na paa innkuate khai hai tu.
11 Ciafangin kumpibawi in na mawihnak khiah daih rauh tuh i.
Ziangmanti fangin amah khiah na BAWIPA i.
Amah khiah bia tu.
12 Tyre ai fenu khai ciata ah lehsawng thawn kawi tuh i.
Mite lakai miliante in na ninghiohnak khiah sii tuh i.
13 Kumpibawi fenu khiah a inn songah mawi rauh i.
A thuam khiah sui thawn takhnak i.
14 Amah khiah KumpiBAWIPA hnenah pianzia tamngai nai thuam thawn kawih tuh i.
A hluntu a rualpui fenute khai na hnenah kawih tuh i.
15 Anghnak le ang kongin amahte khiah kawih tuh ai amahte in kumpiBAWIPA inn songah lut tuh i.
16 Na fapate khiah na paate ca naper tuh i.
Ram caangah amahte khiah bawi cang ruai tuh i si.
17 Na hming khiah san hmuahhmuah in hih thai in bawn tuh ing.
Ciamanin mite in kumzangza in na cuan tuh i.