1 BAWIPA, David le a tuarhnak khiah a veksen in hih sah tu.
2 Amah in BAWIPA hnenah thukham ai,
Zakuk ai a Cungnung Pathian hnenah cukcamhnak:
3 “Thungai in i inn khan songah lut tuh lo ing.
Nunnuam in zau tuhin i khuahluan ah khai kawi tuh lo ing.
4 I mit te khiah mitmu siang tuh lo ing.
Mitmu khai sung tuh lo ing.
5 BAWIPA umhmun tuh i tawk hlan lo le
Zakuk ai a Cungnung Pathian inn i tawk hlan lo mitmu tuh lo ing.”ti in relhnak khiah hih sah tu.
6 Efrathah khua songah zazo i ing.
Jaar lo lai ah tawk zo i ing.
7 A tabernacle songah lut nga sing.
A keham ah amah khiah bia nga sing.
8 Tho tulai na comhmun ah na thahathnak thingkuang thawn kawi tu, Aw BAWIPA.
9 Na phungkite khiah dikcanghnak pon silh tu seh.
Na minungte khiah ang in au tu seh.
10 Na hnenum David ca in, na rilhnak pa khiah hnawl mah.
11 BAWIPA in David hnenah thuhman in thukham zo i. Amah in pilh tuh lo i.
“Na songai na thai khiah kumpibawi cang ruai tuh ing.
12 Na fate in i thukham khiah hlun in,
I cukhnak i Tettikhanhnak khiah bawn lekhaw,
A fate in khai na kumpibawi tauhhmun ah kumzangza in to tuh i.” ti in kham zo i.
13 Ziangmanti fangin BAWIPA in Zion khiah ril zo i.
A umhmun tuhin in a daihhnak i.
14 Amah in, “He khiah kumzangza ai i comhmun tuh i.
Heta ah um tuh ing. Ziangmanti fangin i daih i.
15 Zion khiah thilri tam ngai thawn hmuifu bur tuh ing.
A songai mi farahte khiah rong cawm tuh ing.
16 A phungkite khai ohnak thawn thuam tuh ing.
A minungte in khai ang ngai in au tuh i.
17 Ciata ah David ki khiah khang ruai tuh ing.
I rilhnak pa ca in mai-inn bawt zo ing.
18 A raalte khiah zakthihnak thawn thuam tuh ing.
Ikhalselai a ukhnak khiah khaang tuh i.” ti in rel i.