Psalm 106

<<  PSALM 106  >>

1 BAWIPA khiah cuan tu!
Aw, BAWIPA khiah an tuu-ih.
Ziangmanti fangin amah khiah a pha i!
Ziangmanti fangin a ngaihharhnak khiah kumzangza in bo nia um lo i.

2  Aisu in BAWIPA bawnhnak khiah rel ben tuh i?
Aisu in amah khiah cuan ben tuh i?

3  Thuhman bawn tute le a catlo in dikcanghnak naper tute khiah hmuifu i.

4  Aw BAWIPA, na minungte zarto bangin, lo i hih tu.
Na o hnak khiah i kawih sah tulai,

5  Na rilhnak na minungte ai cohnak hnempui hnak khiah co ve ngang.
Na minungte anghnak bang in ang ve ngang.
Na  minungte kawmin na cuan ve ngang.

6 Kin paate kawm in sual zo i ing.
Khelh zo i ing.
A pha lo na khiah per zo i ing.

7 Kin paate in Izip ai ngaihsun urkul na bawnhnak khiah na ling sah lo i.
Amahte in na ngaihharhnak a tamrauh khai hih bul lo i.

8 Ikalselai Amah huthawm khiah mi in ling tuhin,
Amah hming ca in amahte khiah o i.

9  Amah in Tipui San khiah hau ai ti kaang lio i.
Ciamanin amah in amahte khiah nelrawn song ah vak bangin, tipui a thuk songin fehpui i.

10 Amahte khiah a huatu pa kut songin amah in o i.
Amahte khiah a raalte hnenin luangtlan i.

11 Ti in a raalte khiah cum sah i.
Ciamanin amahte khiah pakhat bang khai taang lo i.

12 Ciafangin amahte in a thu khiah sang ai,
Amah cuan hnak lasa i.

13 Ikhalselai amahte in a thu khiah hai vut i.
Amah ai so hnak thu khiah iang nuam lo i.

14 Ikhalselai nelrawn songah amahte in a hlaihlawr ze in duhhnak nai ai,
Nelrawn songah Pathian khiah cu i.

15 Amah in amahte ngenhnak bangin pe i.
Ikhalselai amahte hnenah urhnak hleng ruai i.

16 Buk songah Moses le BAWIPA minung Aaron khiah amahte in iksik fangin,

17 Laipua khai kak vung ai Dathan khiah lem lio ai Abiram te pawl khai khuk sio i.

18 Amahte lakah mai khai suak ai,
a sualte khiah kang berh i.

19 Amahte in Horeb ah kawlpaw niu khiah bawn ai a erhnak kawlpaw zuk khiah bia tlang i.

20 Ciatih bangin amahte Thangphathnak khiah hampa ei thai kawlpaw hmel thawn thleng i.

21 Izip ah a lian ngaingai bawntu amahte Otu Pathian khiah haai i.

22 Ham ramai a ngaihsun urkulte le Tipui San ai laukul ngai a bawnhnakte khiah haai sah i.

23 Ciamanin amah in amahte khiah rek tuhin rel i.
Ikhalselai amah rilhnak Moses in amahte laklawh ah ding ai,
amah in amahte khiah rek tuh lo in Pathian thinraw khiah kham i.

24 Ciafangin amahte in cia ram khiah nautat i.
A thu khai sang lo i.

25 Ikhalselai amahte buk ten ah cam tlang ai,
BAWIPA thu khiah zainam tlang lo i.

26 Ciamanin Pathian khai a kut khiah amahte lakah cukcam tuhin daang ai,
Amahte khiah nelrawn songah thi ruai tuh in le

27 A tesin fate khiah ram dang mi lakah thi ruai tuh ai
Mi ram dang caang ah peu ruai tuhin cukcam i.

28 Cen amahte in Peor ai Baal thawn kawmdun ai
Mithi te hnenah raithawihnak khiah ei i.

29 Ciatih bangin amahte in amahte bawnhnak thawn Pathian khiah thinraw ruai ai,
Amahte lakah urhnak khiah suak pan i.

30 Ciafangin Phinehas khai amahte laklawh ah ding ai urhnak khai com lio i.

31 Ciatih bangin Phinehas bawnhnak khiah san hmuahhmuah lakah kumzangza dikcanghnak in siar sah i.

32 Amahte in amah khiah Meribah ti hmunah thinraw ruai leh thio i.
Amahte manin Moses khai rimsuhnak tuar ngah i.

33 Amahte in Pathian Ciang Rauhla khiah tawng manin, Moses in khai pong sual ngah pang i.

34 Cen BAWIPA in ram dang mite khai rek tu sio ih ti ai thu pehnak khai ngai lo in rek lo i.

35 Ikhalselai anite in Zental te kawm in pawldun ai amahte naper dan khiah cung i.

36 Amahte milim zuk khiah bia manin
Amahte khiah thang bangin awk i.

37 Amahte in a fapate rin raithawihnak in hmang ai a fenute khiah khuavang hnenah hlu i.

38 Amahte in mawh nai lo te thi khiah luang ruai ai a fapa le a fenute khiah Khanaan ai milim

zuk hnenah raithawihnak in pe ai a thi tian in luang ruai i.

39 Ciatih bangin amahte naperhnak in rim ruai ai,
amahte naperhnak in phatemah cang i.

40 Ciamanin BAWIPA khai a minungte lakah thinraw rauh ai,
A minungte khiah hua rauh i.

41 Ciamanin amahte khiah Zental mite hnenah pe ai, a huatute in amahte khiah uk i.

42 Amahte raalte in amahte khiah nemh meng ai,
amahte khiah amahte kuthnia ah dah meng i.

43 Pathian in amahte khiah vel tampui luat ruai napui ai,
Amahte in Pathian khiah tawng ngio ai
Amahte sualhnak manin amahte khiah mi hnia ah um ngio i.

44 Ikhalselai Pathian in amahte rimsuhnak khiah ruat sah i.
Amahte kaphnak khiah za sah i.

45 Amahte ca manin, lingdunhnak a thukhamhnak khiah hih ai,
A tamngai a ngaihharhnak manin a thinraw khiah awl leh i.

46 Cen amahte thawngtla tuhai thiar tute in khai amahte khiah ninghio thai in bawt sah i.

47 Kin o tu, aw kin otu Pathian;
Hmunkhat in kin khawm tulai,
Na hming a cianghlim khiah kinte in an tuhin le Na cuanhnak khiah thangphat tuhin Zental mite lakin kin suah tu.” ti in au tuu-ih.

48 Israel BAWIPA Pathian khiah kumzangza in kumzangza tian hmuifu tu seh!
Ciafangin mi veksenin, “Amen!”ti tu seh.
BAWIPA khiah cuan tu!

<<  PSALM 106  >>