Proverbs 5

<<  PROVERBS 5  >>

I fapa, i fimhnak khiah i ngai sah tu.
I ling thiamhnak khiah i ngai sah tu.

2  Ciafangin nangmah in ril thiam tuhai,
Na kaa songah fimhnak um tuh i.

3  Ziangmanti fangin hlotlau nuu kaa songin khoiti far i.
A kaa khiah thau tah in nem sawn i.

4  Ikhalselai a hnuahkhum ah nikkha bang
in kha ai ha nih nai vangsau bangin san i.

5  A ke khiah thihhnak hnenah feh i.
A kalsuan khiah hlankua lamah kawi i.

6  Amah in nunhnak lampui khiah ruat lo i.
A nundan khai kho lo i.
Cen cia khai amah in ling lo i.

7  Ciamanin i fate, i ngai tuu-ih.
I kaa songai thu hlun lo in um mah ih.

8  Na lampui khiah cia nuu hnenin tlan tu.
A inn dawngkham nong ah kawi tau mah.

 9  Cialo fangin na tha khiah mi dangte pe ngah tuh i si.
Na nunhnak khiah riahsia pa pe ngah tuh i si.

10 Ciafangin ram dang mite in na naihhnak khiah
na ping sah tuh i.
Na naperhnakte khiah mi dangte in
na long sah tuh i.

11 Hnuavai fangin na taksa le na pum pui khiah
ur sio fangin lungsia in kap tuh i si.

12 Ciafangin nangmah in, “Zaitluk in tiamhnak khiah
lo i hua awng i.
I thin in mi hauhnak khiah nautat awng ing.

13 I saza te thu khiah ngai awng lo ing.
I tiamtu te thu khai ngai awng lo ing.

14 Pawlpui le pumkhawmtu te hmaiah,
I hnawm tum ngaingai i.” ti in ti tuh i si.

15 Na tipamhnak songai ti lek ding tu.
Na namkum ai luanghnak ti lek ding tu.

16 Na cirhti khiah khua lakah luang ruai nga sim?
Cen na ti tampui khiah lentawng ah zu ruai nga sim?

17 Amahte khiah nangmah ai lek i tu seh.
Na hnenai mikhualte thawn hlawm mah.

18 Na cirhti khiah hmuifu tu seh.
Na naulai ai na nu thawn ang in um tu.

19 A daih kul kiho le a mawi niu kiho la bangin
A hnawi thawn a catlo in thin na khim ruai tu seh.

20 Ziangmanin, i fapa, hlotlau nuu in na uk tuh i?
Zaimanin mi dang nu khiah kuah tuh i si?

21 Ziangmanti fangin minungte nundan khiah
Bawipa in hmu liang i.
Amah in a lampui khiah a veksenin zong sah i.

 22 Mi sual pa khiah a sualhnak in thang bangin awk ruai i.
A sualhnak rihual thawn amah khiah pom lio i.

23 Amah veve uk ben lo manin thi tuh i.
A voi rauh ze manin amah khiah sual tuh i.

<<  PROVERBS 5  >>