1 Jakeh fapa Akur relhnak thu, Pathian relhnak thu.
He pa in Ithiel le Ukal hnenah rel i.
2 Thungai in mi danghnak in i voi sawn i.
Mi bangin ling thiamhnak nai lo ing.
3 Fimhnak khiah zir awng lo ing.
A Cianghlim Pa khai ling awng lo ing.
4 Vancung ah aisu kaai awng ai tolh leh tu um i?
Aisu in hlivua khiah a kut songah huam zo i?
Aisu in tipui te khiah angki songah fun zo i?
Aisu in laivum a tongtian in kho ruai i?
Cia pa hming khiah aisu i?
A Fapa hming tang aisu i? ling lesikhaw.
5 Pathian thu khiah a veksen in ciang liang i.
Amah khiah amah rinsantu te luumpui i.
6 A thu khiah belh sah mah.
Na hau mawh ngai.
Thudon rel na cang tuh i.
7 Thil panih na ngen ing.
I thi hlanah i pe siang lo in um mah.
8 A hmanlo thu le thudon khiah i hnenin
a hla ngai ah dah tu.
Mi farah le milian i cang ruai mah.
Ni siar in ei tuh rong i pe tu.
9 Cialo fangin rong i kham hiar fangin,
nangmah khiah zainam lo in na el in,
“Bawipa khiah aisu i?” na ti mawh ngang.
Cen farah fangin khai ruko ngah tuh ai
i Pathian hming khiah sia ruai mawh ngang.
10 Mi hnenum khiah a bawipa hnenah rawt mah.
Cialo fangin amah in awrsia na cam tuhai mawh tuh i.
11 A paa te awrsia camai a nuute khiah hmuifu bur lo tu fate um i.
12 Amahte veve khiah a ciang ngai vuah ai,
amahte sualhnak khiah som sah lohnak mite um i.
13 Cen amahte veve khiah hngal ngai in um ai,
hmuhheh kul ai umtu mite um i.
14 Amahte kaam khiah vangsau le vang bang ai san mite um i.
Amahte in mi farahte khiah laivum in dawp ai
samhnak naitute khiah mite lakin rek i.
15 Lit in fenu panih nai i. “I pe tu, i pe tu.”ti in au i.
A kham nia um lo thil pathum um i.
Cen thil pali te in,”Tham zo hang.” ti awng lo i.
16 Ciate khiah: mithi hlankua,
Fa paai awng lo sul,
Ti kham awng lo laipua,
“Tham zo hang,” ti a relnia um lo mai te i.
17 A paa zauhsuamtu mit le
a nuu thu ngai nuam lo te khiah,
Rawnkawng songai langaak te in
a mit khai sah tuh lio i.
18 Thil pathum lakah ngaihsun i ur rauh i.
Linglo hnak pali nai ing.
19 Ciate khiah: hli lakah mu zuang dan,
lung lakah ai rul vak dan tipui liateng ai
timbaw pasal le fenu te um dan te i.
20 He khiah phatemah nuu nundan i:
Amah in rong ei ai a ka nul ben fangin,
A pha lo bawn lo ing.” ti in rel i.
21 Thil pathum manin laipua hlin i.
Pali manin laipua in tuar ben lo i.
22 Ciate khiah: Hnenum in mi uk cang fangin,
Mivoi paa khiah rong kham fangin,
23 A luah kul fenu khiah pa nai fangin,
Hnenum nupang nuu in a bawinu khiah rol fangin.
24 Laivum ah thil pali khiah cikniu napui ai fim ngai i:
25 Sirsing te khiah cak ngai lo i.
Ikhalselai khuasa cuu ah amahte rong khiah ralring i.
26 Lungto lakai betza te khiah tha nai lo te i.
Ikhalselai amahte inn khiah lungto songah sa i.
27 Khokhuakte in kumpibawi nai lo i.
Ikhalselai amahte rank bangin hmailam ah feh i.
28 Hawngki khiah a kut thawn pom thill i.
Ikhalselai kumpibawi inn songah um i.
29 Thil pathum te khiah a mawi ngai in vak i.
Pali te khiah a bawi ngai in vak i.
30 Chintit khiah ramsa lakah a lian ber i.
Cen amah in aisu hmai in khai let lo i.
31 Vak niano arhli,
Me cang,
Kumpibawipa le amah thawn ai um tu a raalkapte.
32 Na voi in nangmah veve do hnelhno in,
ihlahle, a pha lo bawn tuh in tum taito lesikhaw
Na kaa khiah na kut thawn hup tu.
33 Ziangmanti fangin cawhnawi khiah
thawpah suak tuhin cok bangin,
Hnarkua khai nuai hnelhno fangin thi suak i.
Ciabangin thinraw tuhin tokdun hnelhno
fangin hauhnak suak i.