1 Hete khai Judah kumpibawipa
Hezekiah ai mite in khumhnak
Solomon proverb te i.
2 Pathian in thu thup tuh khiah a thangphathnak i.
Ikhalselai kumpibawite thangphathnak tu
amahte in thu khiah a khim niu in sii tuh i.
3 Van khiah saang ai laipua khiah thuk bangin,
Kumpibawite thinlung khiah ling sah thill lo i.
4 Ngun songin a rimhnak khiah lang tu lio lai,
Pumsupa in cia ngun khiah
thilri pha ngai ah cang ruai tuh i.
5 Mi sualte khiah kumpibawipa hmai in tlan tu lio i lai,
A ukhnak khiah dikcanghnak thawn kho ruai tuh i.
6 Kumpibawi hmai ah nangmah veve khiah do hnelhno mah.
Cen mi bawite ding hmunah khai ding mah.
7 Ziangmanti fangin na mit ai hmuhnak
bawi hmai ah a niam hmunah na dah tah in,
amah in, “Heta ah hong tu.”
ti in na ko tuh khiah pha sawn i.
8 A hnawraw in zungah kawi mah.
Ziangmanti fangin na ompui in
zakthi in na dah fangin,
a hnualeh ah zai bawn tuh i si?
9 Na thu khiah na ompui thawn relkawm hmasa tuu-ih.
Cen thuthup khiah mi dangte hnenah rel mah.
10 Cialo fangin na thu za tu hmuah in na
zakthi hnak khiah na rel sah tuhai, hming na sia tuh i.
11 A remniu ai ponghnak pon khiah
ngun vumah sui thawn suaihnak apple bang i.
12 Mifim pa in a bil thawn ai
thu ngai tu pa hnenah tiamhnak khiah,
sui bilvuh le a pha ngai sui khi bang i.
13 A rinsan tlak nalaang khiah a hlat tu pa hnenah,
rongkhawm cuu ai vur dap bang i.
Ziangmanti fangin amah in a bawite khiah
thin thar ruai i.
14 Mi thil sum napui lo ai, thudon in awrhlawng tu khiah
ruah um lo mairo le khuahu bang i.
15 Thinsau ngai in iang ngio fangin,
mi-uk te thin khai thleng thai i.
A nemniu pon in ruh rin ek ruai thil i.
16 Khoitilu tawk aw sim?
Na kham tian lek in ei tu.
Cialo fangin na kham ze lekhaw,
na awk mawh ngai.
17 Na ompui inn ah leng lek lo mah.
Na luah in na hua mawh ngai.
18 A ompui lakah thudon tettikhan tu khiah
Thingbol le vangsau le a san ngai conkiang bang i.
19 Rinsantlak lo pa rinsan heh a hnawm
kaam le a tol lio titiruh bang i.
20 Thincawl ngai pa hnenah la sak tu khiah,
Khuasik cu ai a angki hawk tu le
ti hlum songah capitti thur rawih bang i.
21 Na raalte rikaam lekhaw rong ei tuh pe tu.
Tihaal lekhaw, ding tuh ti pe tu.
22 Ciatih bangin nangmah in a lu ah
lungto maihol thawn vurh tuh i si.
Cen Bawipa in khai lehsawng na tham tuh i.
23 Saklam hlivua in ruah sii ruai i.
Mi siathnak ponka in mi hmai thim ruai i.
24 Katam nupui thawn inn kau ngai ah um kawm tahin,
innphu vumah amah lek in um pha sawn i.
25 Ram hlapui ai a pha thuthang khiah,
A cawl ngai paa hnenah tidap bang i.
26 Misualte hmai ah bah tu mi dikcang pa khiah
cirh songai nawng ti le namkum songai a rim ti bang i.
27 Khoitilu tam ze ei khiah pha lo i.
Ciabang in mah veve thangphathnak sii hnak khiah
thangphathnak i lo i.
28 Amah veve uk ben lo tu khiah
a renhnak sen um lo a hnawm khuapui bang i.