Numbers 32

<<  NUMBERS 32  >>

1Reuben fate le Kad fate in sum tamngai nai i. Jazer ram le Kilead ram khiah sum zua hmun pha khiah amahte in hmu fangin 2Kad fate le Reuben fate in Moses le phungki Eleazar le pawl upate hnenah kawi ai, 3“Ataroth le Dibon le Jazer le Nimrah le Heshbon le Elealeh le Sheban le Nebo le Beon  4ram khiah BAWIPA in Israel mite hmai in neh sahhnak ram i. Cen sum zua hmun pha ram khai i. Cen na hnenumte in sum nai i ing. 5Ciamanin ning in ngaih kin har leisikhaw, Jordan ralkhat ah kin fehpui lo in he ram khiah na hnenumte in ping tuhin kin pe tu.”ti in ngen i.

6Ciafangin Moses in Kad fate le Reuben fate hnenah, “Ningte khiah heta ah to thiang lakin ning unaute tu raal tawng tuh im? 7Ziangmanin Israel fate khiah BAWIPA in pehnak ramah feh tuhin thanau ruai i si? 8Ciatih bangin ning paate in Kadesh Barnea in ram cul tuhin i feh ruai fangin bawn awng i. 9Ziangmanti fangin Eskhol Rawn zawllai ah  hong fangin Israel mite thin khiah nau ruai manin anite khai BAWIPA ai pehnak ramah feh lo i. 10Ciamanin BAWIPA khai cia nia ah thinraw ai thukham thawn thukam ai, 11‘Izip ram ai suaktu mi kum kul le a tan vum te in a vuva in i hlun nuam lo manin, Abraham le Aizek le Zakuk hnenah i kamhnak ram khiah hmu tuh lo i. 12Keniz mi Jephunneh fapa Khaleb le Nun fapa Joshua lekin BAWIPA khiah a vuva in hlun manin anite lekin cia ram khiah hmu tuh i.’ti in ti i. 13Ciamanin BAWIPA khiah Israel mite lakah raw ai, BAWIPA hmai ah a pha lo bawntute khiah a veksenin thi sio hlan lo nelrawn songah kum sawm li vai ruai i. 14Sik tuu-ih! BAWIPA khiah thinraw ruai tuh amam in ning paate rol tuhin ningte misual te po i si. 15Ziangmanti fangin Amah khiah hlun awl leisikhaw amahte khiah nelrawn song ah zam leh tuh thio ai he mite a veksein rek ning cang tuh i.”ti in rel i.

16Ciafangin anite khai a nongah kawi ai, “Kin sumte ca in le kin fate ca in inn sa nga ing. 17Ikhalselai kin tu Israel mite khiah amahte umhmun tuh tian kin kawih hlan lo raal tawng tuhin a cialep in um i ing. Kin fate tu cia ramai umtu minungte manin a renhnak khua songah lo um tu seh. 18Israel mite a veksenin amahte ro co hlan lo kin khai inn ah tlung tuh lo i ing. 19Ziangmanti fangin kin ro tu Jordan runin nisuak hmunlam ah um zo manin amahte thawn Jordan khatlam ram ah amahte thawn ro co tuh lo i ing.”ti in ti i.

20Ciafangin Moses in amahte hnenah, “Ciatih in bawn in BAWIPA hmai ah raal tawng tuhin raal thilthuam vong in 21Raal thilthuam vongtu ning raalkapte a veksenin Bawipa hmai ah Jordan run khiah tan in A hmai ah a raalte khiah hnawt in 22BAWIPA hmai ah cia ram khiah neh ben fangin tlung thai i si. Ciafangin BAWIPA le Israel hmai ah mawhhluk tuh nai tuh lo i si. Cen he ram khiah BAWIPA hmai ah ningmah in ping tuh i si. 23Ikhalselai ciatihin bawn hlahleisikhaw, ngai tuu-ih. BAWIPA lakah ning sual zo i. Cen ning sual in ning tawk tuh ciacia khiah ling tuu-ih. 24Ning ka ai relhnak bangin ning fate le ning tu te ca in khua sa tuu-ih.”ti in sawn i. 25Kad fate le Reuben fate in Moses hnenah, “Kin BAWIPA ai ruai bamgin na hnenumte in bawn tuh i ing. 26Kin fate, kin nute, kin tute le kin sumte khiah Kilead khua ah um tuh i.  27Ikhalselai   na hnenumte tu na ruai bangin raal thilthuam thawn BAWIPA hmai ah raal tawng tuhin Joradan khiah tan tuh i ing.”ti in ti i.

28Ciamanin Moses in amahte thu khiah phungki Eleazar le Nun fapa Joshua le Israel mite hin songai upate khiah rel i. 29Ciafang in Moses in amahte hnenah, Kad fate le Reuben fate in ningte thawn raal tawng tuhin BAWIPA hmai ah raal thilthuam vongin Jordan run khiah tanin ning hmai ah cia ram khiah neh le i si, Kilead khiah amah ram tuhin pe tu. 30Ikhalselai raal thilthuam thawn Jordan khiah tan hlahlekhaw, Khanaan ramah ningmah thawn cia ram khiah co tuh i.”ti in rel i. 31Ciafangin Kad fate le Reuben fate in, “BAWIPA in na hnenumte rel bangin bawn tuh i ing. 32BAWIPA hmai ah raal thilthuam thawn Jordan khiah tanin Khanaan ramah feh tuh i ing. Ikhalselai kin ro tu Jordan runin he lam sawnah i.”ti in sawn i.

33Ciamanin Moses in Kad  fate le Reuben fate le Joseph fa Manasseh hin hrekkhate khiah Amor kumpibawi Sihon ram le Bashan kumpi bawi Ok ram le a khuari songai khuate le cia ram hiang cingkim ai khuate khiah pe i. 34Kad fate in a renhnak khuapui Dibon le Ataroth le Aroer le 35Atroth, Shophan le Jazer le Jokbehah le 36Beth Nimrah le Beth Haran khuate le tuu inn khiah sa i. 37Reuben fate in Heshbon le Elealeh le Kirjathaim le 38Nebo le Baal Meon (amahte hming khiah thleng sah i) le Shibmah khiah sa i. Amahte sahnak khuate khiah amahte hming in ko i. 39Manasseh fapa Machir fate in Kilead ah fehai Kilead khiah neh ai a songai umtu mite khiah hnawt sio i. 40Ciamanin Moses in Kilead khiah Manasseh fapa Machir pe ai ani khai cia khua songah um i. 41Cen Manasseh fapa Jair in khai khua niuniu khiah neh ai a hming khiah Havoth Jair ti in ko i. 42Ciafangin Nobah khai fehai Kenath le a khua niuniute khiah neh ai amah hming lang in Nobah ti in ko i.

<<  NUMBERS 32  >>