Malachi 2

<<  MALACHI 2  >>

1  “Aw phungki te,
He thukham khiah ningmah ca i.

2  Ningte in ngai ning nuam lo in,
ning thinlung in i hming khiah thangphat tuhin ruat hlah leisikhaw,
Ning vumah awrsia ning cam tuh ing.
Ning hmuifu khiah awrsia cam tuh ing.
Ningte in i thangphat tuh in ning thinlung in ruat lo manin,
Ning hmuifu te khiah awrcia cam zo ing.”ti in vancung mite BAWIPA in ti i.

3  “Ning fate khiah hau tuh ing.
Ning puai ai raithawihnak ningdulkkul saril te thawn ning hmai ah ning mat tuh ing.
Ciafangin ningte khai saril kawm in ning thiar tuh sek i.

4  Ciafangin ningte in he thukham khiah
Kaimah in ning hnenah ning kuat ai,
Levi thawn kin thukham dunhnak khiah um tuh ngio i ti khiah ling tuh i si.”ti in vancung mite BAWIPA in ti i.

5  Kin thukham dunhnak khiah Levi hnenah um i.
Cia thukham dunhnak khiah nunhnak le remhnak thukham i.
Amah in i kih thai in cia thukham khiah pe ing.
Ciamanin amah in i kih ai I hming khiah zul i.

6  A kaa songah a hman thucuk hnak um i.
A kahmur ah dikcang lo pakhat khai um lo i.
Amah khiah kaimah thawn a remniu in le a dikcang in vak i.
Amah in mi tam ngai khiah sual awl ruai i.

7  “Ziangmanti fangin phungki kahmur ah fimhnak um dan i.
Mite in a kaa song ah upadi dan khiah sii dan i.
Ziangmanti fangin amah khiah
Vancung mite BAWIPA ai thuthantu nalang i.

8  Ikhalselai ningte in upadi dan khiah hlun lo i si.
Mi tam ngai khiah upadi dan lakah sual ruai i si.
Ningte in Levi thawn kin thukham dunhnak khiah hnawm ruai i si.”
ti in vancung mite BAWIPA in ti i.

9  Ningte in i lampui khiah hlun lo manin le
Ningte in upadi dan songah danghan hnak bawn manin,
Mi hmuahhmuah hmai ah hmuhheh hnak le zauhsuamhnak tuh in ning bawn zo ing.”

10 Kin veksen in Paa pakhat nai tlang i lo sing?
Pathian pakhat in kin bawn tlang lo im?
Zaimanin kin paa te thukham khiah zainam lo in
Pakhat le pakhat khiah zawl dun i sing?

11 Judah in a hman lo in naper i.
Israel le Jerusalem ah ningdulkul khiah bawn zo i.
Ziangmanti fangin amah in ram dang mite pathian fenu khiah nu ai ciatih in Judah in BAWIPA ai ithnak a cianghlim a temple khiah zul lo i.

12 Amah khiah phawk ai ling napui ai,
he bang bawn tu pa khiah,
Vancung mite BAWIPA hnenah a hlu kawih khalselai,
Cia pa khiah BAWIPA in Zakuk buk songin lo hnawt tu lio seh.

13 Cen he khiah ning bawn hnak a panih hnak i.
Ning kaphnak le auhnak in awlta cabuai khiah ning mithli thawn khuk i si.
Ciamanin BAWIPA in ning hlu hnak khiah zai ning nam sah lo i.
Cen ning kut songin khai ning saang sah lo i.

14 Ikhalselai ning te in, “Zaiman in?”ti in ti i si.
Aw nangmah in na tlangval lai in na nu hnak na nu lakah hlotlau in um i si.
Amah khiah na rual le thukham hnak bangin na nu i.
Cia khiah BAWIPA in tettikhan zo i.

15 Ikhalselai BAWIPA in amahte khiah pum khat in bawn ai
A Ciang Rauhla khiah nai i lo im?
Ziangmanin pum khat in bawn i?
Aw BAWIPA in Pathian kih hal tu fate sii i.
Ciamanin ning nundan khiah ralring tuu-ih.
Aisu in khai a tlangval lai ai a nu lakah hlotlau in um ma seh.

16 “Ziangmanti fangin Israel BAWIPA Pathian in,
Nu maa dun khiah i hua i.
Ziangmanti fangin, cia pa in riahsia hnak khiah angki bang in sil i.” ti in vancung mite BAWIPA in ti i.
“Ciamanin ning nundan khiah ralring tuu-ih.
Hlotlau in um mah ih.”

17 Ning ponka thawn BAWIPA khiah luah ruai i si.
Ikhalselai ning te in,
“Akontih bangin amah khiah luah ruai i ing”? ti i si.
Aw ning te in, “A pha lo bawn tu hmuah khiah
BAWIPA hmai ah a pha bawn i.
Amahte lakah BAWIPA khiah lungkhim i.” ti in rel ai
“A hman ai thukhan tu Pathian khiah akonah i?” ti in ti rel i si.

<<  MALACHI 2  >>