1Ciafangin Bawipa in Moses hnenah, 2Mi phar pa a ciang ruai nia ah he bangin a upadi dan i tuh i: Amah khiah phungki hnenah kawi tu selai 3Phungki pa khai camp pua ah suakin cia pa khiah sik tuh i. Mi phar pa khiah ciang peu lekhaw 4a ciang ruai tuhhnak mi pa ca in a ciang a nung vaniu panih le sidar thing le ri san le hisop bor kawih ruai tuh i. 5Ciafang phungki pa in vaniu pakhat khiah lai bel songai ti fim vumah rek ruai tuh i. 5A khatta vaniu khiah phungki pa in lang tu selai sidar thing le ri san le hisop bor khiah cia vaniu kawmin ti fim vumai rekhnak vaniu thi songah nim tu seh. 7Cen a ciang ruai tuhhnak mi phar pa khiah vel sarih phiah tu selai amah khiah a ciang i ti in sungphiat tu selai a nung lai vaniu khiah hampalak ah hlat tu seh. 8Cen a ciang ruai tuh hnak pa in a thilthuam khiah sawp tu selai a sam khiah met tu selai ti thawn takhlu tu selai amah khiah ciang tuh i. Ciaben fangin camp songah lut tu selai a buk pua ah ni sarih um tu seh. 9Ikhalselai ni sarih nia fangin a lu ai a sam le a kahmul le a mithmul khiah a veksenin met tu sio seh.
10Ni riat nia fangin maa nai lo tuufa a cang panih le a maa nai lo tuufa a nu kum khat le rongmu hlu tuhin ephah hmun ha khan hmun khat sangvut nawi le thau rawihhnak le thau pawng khat kawih tu seh. 11Ciafangin cia pa ciang ruai tu tuh phungki pa in a ciang ruai tuhhnak pa khiah ciate kawmin Bawipa hnenah tawkdunhmun tabernacle dawngkham ah kawih tu seh.
12Ciafangin phungki pa in tuufa niu a cang pakhat khiah lang in khelhhnak ca ai a hlu ca in thau pawng khat thawn Bawipa hmai ah zap in hlu tu seh. 13Ciafangin a cianghlim hmun ah sualhnak ca ai a hlu le mai ai taihnak a hlu, hlu hmunah cia tuufa niu khiah ro tu seh. Ziangmanti fangin sualhnak ca ai hluhnak a hlu khiah phungki pa ai i bangin khelhhnak ca ai a hlu khai phungki pa ai i. A cianghlim ber i. 14Phungki pa in sualhnak ca ai hluhnak tuufa thi khiah lang tuh ai a ciang ruai tuhhnak pa kiahhan lam bil le a kiahhan lam zungpui le a kiahhan lam ke zungpui vumah nawih tu seh. 15Cen phungki pa in thau pawng khat khai lang tu selai a kekeh kut ah bung tu selai 16a kiahhan kut zung thawn a kekeh kut song ai thau khiah tok tu selai a kut zung thawn cia thau khiah Bawipa hmai ah vel sarih phiah tu seh. 17Cen a tanghnak a kut ai thau khiah phungki pa in a ciang ruai tuhhnak pa kiahhan lam bil par ah le a kiahhan lam kut zungpui ah le a kiahhan lam ke zungpui le sualhnak ca ai hlu tuhhnak tuufa niu vumah nawih tu seh. 18Cen phungki pa kut ai a tanghnak thau khiah a ciang ruai tuhhnak pa lu ah pawh tu seh. Ciatih bangin phungki pa in cia pa sualhnak khiah Bawipa hmai ah khuk tu seh. 19Ciafangin phungki pa in sualhnak ca ai a hlu khiah hlu tuhai a ciang lo songin ciang ruai tuhhnak pa khiah khuk tu seh. Ciaben fangin mei thawn taihnak a hlu khiah hlu tu seh. 20Ciafangin phungki pa in mei ai taihnak a hlu le rongmu a hlu khiah awlta vumah hlu tu seh.
21Cen cia pa khiah mi farah ze manin ciabang in hlu ben hlahlekhaw a zap ai hlu tuhin tuufa niu a cang pakhat khiah a sualhnak khukhnak tuhin sangvut nawi khiah thau thawn rawih in hmun ha khan hmun khat khiah rongmu ca ai hlu tuhin le thau pawng khat kawih tu seh. 22Cen a benhnak bangin khuro panih i hlahle laileng niu panih khiah sualhnak ca in hlu tuhin le mei in tai ai hlu tuhin pakhat veve kawih tu seh. 23Ciate khiah a ciang ruai tuhhnak pa in ni riat nia fangin phungki hnenah Bawipa hmai ah tawkdunhmun tabernacle dawngkham ah kawih tu seh. 24Ciafangin phungki pa in sualhnak ca ai hlu tuhhnak tuufa niu le thau pawng khat khiah lang tuh ai, phungki pa in Bawipa hmai ah zap tuhai hlu tuh i. 25Ciafangin phungki pa in cia khelh hnak ca ai hlu tuhhnak tuufa niu khiah ro tuhai, cia tuufa niu thi khiah lang tuh le a ciang ruai tuhhnak pa kiahhan bil par le a kiahhan lam kut zungpui le a kiahhan lam ke zungpui khiah nawih tuh i. 26Ciafangin phungki pa in thau khiah a kekeh kut ah burh tuh i. 27Ciaben fangin a kiahhan kut zung thawn a kekeh kut songai thau khiah Bawipa hmai ah vel sarih phiah tuh i. 28Ciale phungki pa in a kut ai thau khiah a ciang ruai tuhhnak pa kiahhan lam bil par ah le a kiahhan zungpui ah le a kiahhan ke zungpui ah sualhnak ca ai hluhnak thi nawih hmunah nawih tuh i. 29Cen phungki pa kut songai a tanghnak thau khiah a ciang ruai tuhhnak pa lu ah pawh tuh ai ciatih in Bawipa hmai ah a sualhnak khuk sah tuh i. 30Cen khuro a khatta sawn i hlahle laileng niu khiah, 31amah benhnak zahin a khatta khiah sualhnak ca in cen a khatta khiah mei ai taihnak a hlu bangin rongmu a hlu kawmin hlu tuh i. Ciatih in phungki pa in a ciang ruai tuh hnak pa khiah Bawipa hmaiah a sualhnak khuk sah tuh i. 32He khiah a phar urhnak naitu pa in a dan bangin hlu ben lo fangin hlu tuh dan upadi i.’ ti in rel i..
33Ciafangin Bawipa in Moses hnenah, 34“Ning ping tuhin kaimah in ning pehnak Khanaan ramah ning hleng fangin ning ramai ning inn ah a phar urhnak ning dah sah fangin, 35inn naitu pa in phungki pa hnenah kawi in, ‘I inn songah pharhnak ur um bang i.’ti in rel tu selai, 36ciafangin inn naitu pa in phungki pa in cia urhnak sik tuhin a inn songah lut hlanah a inn ai thilri hmuah khiah suah tu sio seh. Cialo fangin a inn songai thil khiah rim mawh ngai. Ciaben fangin a sik tuhin inn songah lut tu seh. 37Ciafangin phungki pa in cia urhnak khiah sik tu seh. Cia urhnak khiah bangkhang song ah lut bangin umin tangphaw i hlahle a san thah ilekhaw, 38phungki pa khai dawngkham songin in suak tu selai cia inn khiah ni sarih song dawngkham khum in dah tu seh. 39Ni sarih nia fangin sik leh tu thio selai cia urhnak khiah bangkhang ah a tam am am in zaai lekhaw, 40cia urhnak umhmun bangkhangte khiah bal in khua pua a ciang lo hmunah lon tuhin phungki pa in ruai tu seh. 41Cen a inn song khai a pumpalah in ziah ruai tuh ai a ziahhnak ai a vutte khiah khua pua a ciang lo hmunah lai ruai tu. seh. 42Ciaben fangin bangkhang thar thawn cia a hlun bangkhang khiah rol tu selai simat tu seh.
43Cen amah in bangkhang khiah bal ai inn khai ziah ai simat ben fangin cia urhnak khiah suak leh thio lekhaw, 44phungki pa khai kawi in sik tu seh. Cia urhnak khiah inn songah zaai lekhaw cia khiah urhnak a sia inn i ai a ciang lo i. 45Ciafangin cia inn khiah a veksenin bal tu sek selai khua pua a ciang lo hmunah thiar tu seh. 46Ciazolo ah cia inn dawngkham khum tengin inn songah lut tu khiah zanlam tian ciang tuh lo i. 47Cen inn songai a it tu le inn songai rong ei tu in a thilthuam khiah sawp tu seh.
48Ikhalselai phungki pa khai kawi in inn khiah sik in cia urhnak khiah cia inn simat hnua ah zaai hlahlekhaw, phungki pa in cia inn khiah a ciang i ti in sungphiat tu seh. Ziangmanti fangin cia urhnak khiah cak leh i hang. 49Ciafangin cia inn ciang ruai tuhin amah in vaniu panih le sidar thing le ri san le hisop bor khiah kawih tuh ai, 50vaniu a khatta khiah lai bel songah tifim vumah rek tuhai, 51sidar thing le hisop bor le ri san le a nung lai vaniu khiah lang in a rekhnak vaniu thi song le ti fim songah nim in cia inn khiah vel sarih phiah tu seh. 52Cia inn khiah vaniu thi le ti fim le a nung lai vaniu le sidar thing le hisop bor le ri san kawm in ciang ruai tuh i. 53Ciafangin a khatta vaniu khiah khua pua hampalak ah hlat tuh le cia inn ca in a sual khukhnak bawn tuh le cia inn khiah ciang tuh i.
54He khiah phar urhnak le thakthak le, 55thilthuam ai le inn ai a phar urhnak le 56a bol le hmaihma beng le a ngo urhnak le 57zaifangin a ciang lo i, zaifangin a ciang i ti zirhhnak tuhin dan upadi i. He khiah a phar urhnak ca ai upadi dan i.”ti in rel i