1Ciafangin Joshua in Israel hinte khiah a veksenin Shekhem ah khawm ruai ai Israel mi upate le mi-uk te le thukhantute le amahte raalbawite khiah ko ai anite khai Pathian hmai ah kawi tlaang i. 2Ciafangin Joshua in mite veksen hnenah, “Israel Bawipa Pathian in, ‘Ning paate, Abraham le Nahor paa Terah te khiah Runpui ralkhat lamah hlanlai ah um awng ai a dang pathiante khiah bia awng i. 3Ciafangin kaimah in ning paa Abraham khiah Runpui ralkhat lamin lang ai, Khanaan ram pumpalah ah fehpui ai, a tesin fate khiah zaai ruai ai Aizek khiah pe ing. 4Aizek hnenah Zakuk le Esau pe ing. Esau hnenah Seir mual khiah ping tuhin pe ing. Ikhalselai Zakuk le a fate khiah Izip ramah zu i. 5Cen Moses le Aaron khai Izip ah hlat ai Izip mite khiah ur ruai ing. Ciahnua fangin cia ramin ning suah ing. 6Ciafangin ning paate khiah Izip in suah ai tipui hnenah hleng i si. Ciafangin Izip mite in ning paate khiah siphuh le siphuh leng kawmin Tipui San tian hnawh i. 7Ciamanin anite khai Bawipa hnenah au i. Ciafangin Bawipa in ningte le Izip mite lakah khuathim dah ai amahte vumah tipui khiah hleng ruai ai ti in cum berh i. Ning mit in Izip ai i bawnhnak khiah hmu i si. Ciafangin nelrawn songah a rai ngai um i si. 8Ciafangin Jordan ralkhat lamai umtu Amor mite hnenah ning kawih ai anite in ning tawng i. Ikhalselai amahte khiah kaimah in ning kut ah ning ap ai amahte khiah ning hmai ah ning rek sah ai amahte ram khiah co sah i si. 9Ciafangin Moab kumpibawipa Zippor fapa Balak in Israel khiah tawng tuhin tho ai ning cam tuhin Beor fapa Balaam khiah ko ai feh ruai i. 10Ikhalselai Balaam thu khiah ngai sah lo ing. Ciamanin amah in ningte khiah hmuifu ning bur thliahthlo i. Ciamanin a kut songin ning o ing. 11Ciafangin ningte khai Jordan run khiah tan ai Jerikhu ah hleng i si. Ciafangin Jerikhu mite in ning tawng i. Cen Amor mite le Periz mite le Khanaan mite le Hit mite le Kirkash mite le Hiv mite le Jebus mite in khai ning tawng i. Ikhalselai amahte khiah ning kut songah ning ap sio ing. 12Cen ning hmai in tunngal khiah hlat ai amahte khiah ning hmai in hnawt sio i. Amorte kumpibawi panih khai hnawt i. Ikhalselai ning vangsau le ning kahpuk thawn hnawthnak i lo i. 13Ning vaai lohnak ram ning pe ing. Ning sa lohnak khuapuite ning pe ai cia khua songah um i si. Ning bir lohnak capit vuandum le oliv vuandum khiah ei i si.’ti in Bawipa in rel i.
14Ciamanin Bawipa khiah kih tu i lai amah na khiah ning thin ngaingai in le a hman niu in per tuu-ih. Cen ning paate in Runpui ralkhat lamai biahnak pathiante le Izip ramai biahnak pathiante khiah lon tu sio ih. Bawipa na sawn per sah tuu-ih. 15Cen Bawipa naper sah tuh khiah a pha lo in ruat leisikhaw, tunnia ah aisu naper sah nga i si? Runpui ralkhat lamai ning paate ai a naper sahhnak pathiante i hlahle a ram songai ning umhmun Amor te pathian sawn a naper sah tuh in ril tuu-ih. Ikhalselai kaimah le i innkuate tu Bawipa na per sah tuh i ing.” ti in rel i. 16Ciafangin mi zapui in, “A dang pathiante sawn na per sah tuhin Bawipa sawn zam tuh tu rel tau mah. 17Ziangmanti fangin Bawipa kin Pathian khiah kinte le kin paate khiah Izip ram le mi cengfa songin kin suahtu le kin mithmuh in ngaihsun urkul a lian ngaingai bawntu le kin feh hmun cang ah kin him ruaitu le kin khel hmun cang ai minungte lakin kin luat ruaitu i. 18Cen Bawipa in kin hmai in mi hmuahhmuah khiah cia ram ai umtu Amorte kawmin kin hnawt sah i. Ciamanin kin khai Bawipa na per sah tuh ve i ing. Ziangmanti fangin amah khiah kin Pathian i.” ti in sawn i. 19Ikhalselai Joshua in mi zapui hnenah, “Ningte in Bawipa na khiahper sah thill lo i si. Ziangmanti fangin Bawipa khiah a cianghlim ze i. Cen amah khiah iksik Pathian i. Ning khelhhnak le ning sualhnak khiah ning hlat sah tuh lo i. 20Bawipa khiah zam in ramdang pathiante na per sah leisikhaw, Amah in ning vumah a pha bawn awng bangin, let tuhai ning ur ruai tuhai ning rek tuh i.” ti in rel i. 21Ciafangin mi zapui in Joshua hnenah. “I lo i. Bawipa na ian per sah tuh i ing!”ti in sawn i. 22Ciamanin Joshua in mi zapui hnenah, “Bawipa na khiah per sah tuhin Bawipa khiah ril ai tetti khan zo i si.” ti in ti i. Amahte in, “Tetti khan i ing.” ti in ti i. 23Ciafangin Joshua in, “Cia ilekhaw ning lakai ram dangte pathiante khiah lon tu sio i lai, Israel Bawipa Pathian khiah ning thinlung thawn hngai tuu-ih.” ti in rel i. 24Ciafangin mi zapui in Joshua hnenah, “Bawipa kin Pathian khiah a na per sah tuh i ing. A aw khiah ngai tuh i ing.” ti in ti i.
25Ciamanin Joshua in mi zapui thawn cia nia ah lungkhimhnak thukham bawn ai Shekhem ah amahte ca in upadi dan thukham bawt i.
26Ciafangin Joshua in he thute khiah Pathian Dan Upadi Cauk songah khum i. Lungto lianpui pakhat khai lang ai Bawipa sanginn hiang ai thing hnia ah cia lungto khiah dah i. 27Ciafangin Joshua in mi zapui hnenah, “Sik tuu-ih. He lungto khiah kin tettikhan tu i. Ziangmanti fangin he lungto in Bawipa ai kin relhnak thu hmuah khiah zazo i. Ciamanin he lungto khiah ning tetti khan tu i. Cialo fangin ning Pathian khiah el mawh nga i si.”ti in ti i. 27Ciafangin Joshua in mi zapui khiah tlung ruai ai anite khai amahte ro co hmun ram ten ah tlung i.
29Hete ben fangin Bawipa hnenuum Nun fapa Joshua khai thi ai amah khiah kum za le kum haa i. 30Ciafangin amahte in Joshua khiah Kaash Mual saklam ai Efraim mualtlaang ai Joshua ro cohnak ram Timnath Serah ah vui i. 31Israel mite in Bawipa na perhnak hmuahhmuah le Israel ca ai a bawthnak hmuah lingtu Joshua le Joshua hnua ai upate nung song hmuah Bawipa na khiah per sah i.
32Israel mite in Izip ai a phurhnak Joseph ruh khiah Zakuk in Shekhem paa Hamor fate hnenin tangka zakhat ai laihnak Shekem laipua ah phum i. Cia laipua khiah Joseph fate in cohnak laipua i. 33Ciafangin Aaron fapa Eleazar khai thi ai a fapa Phinehas naihhnak tlaang vumah amahte in vui i. Cia tlaang khiah Efraim mual vumah amah hnen ah pehnak tlaang i.