Joshua 23

<<  JOSHUA 23  >>

1BAWIPA  in Israel mite khiah amahte  hiang cingkim ai  raalte hnenin comhmun pe khelleh a raipui fangin Joshua khai a kum tar ngai i hang. 2Ciafangin Joshua in Israel mi veksen, mi upate le mi ukte le thukhantute le raalbawite khiah ko ai amahte hnenah, “Kaimah khiah i kum i tar ngai i hang. 3BAWIPA ning Pathian in ningmah manin he mi phunte hnenah bawnhnak khiah a veksenin hmu zo i si. Ziangmanti fangin ning tawng sah tu khiah BAWIPA ning Pathian i. 4Sik tuu-ih! A taanghnak ram khiah ning hin te in co tuhin Jordan ai panin i rekhnak mi phun hmuahhmuah kawmin nitla hmunlam  ai Tipui tianin aungbali suai in ning zem zo ing. 5BAWIPA ning Pathian in amahte khiah ning hmai in ning hnawt sah tuh sio i. Ciamanin BAWIPA ning Pathian in ning kham bangin amahte ram khiah ping tuh i si. 6Ciamanin Moses Dan Upadi Cauk songai nganhnak khiah a veksenin hlun tuhin zuam tuu-ih. Cialo fangin kiahhan lam le kekeh lamah lam ning tler tuh zel ai  7ning lakai um tute he mi phun dangte khiah pawl ngah  tuh zel i si. Amahte pathian te hming khiah rel tuh lo i si. Cen amahte hming in khai thukham dun tuh lo i si. Amahte khiah naper sah tuh lo i si. Bia khai  bia tuh lo i si. 8Ikhalselai BAWIPA ning Pathian hnenah tunnia tianai ning bet bangin bet tuh ngio i si. 9Ziangmanti fangin BAWIPA  in a lian ngai mi phun dangte khiah ning hmai in ning hnawt sah zo i. Ikhalselai tunnia tian aisu in khai ning tawng ben lo i. 10Minung pakhat in minung thawngkhat khiah hnawt tuh sek i si. Ziangmanti fangin BAWIPA ning Pathian in ning kham bangin Amah in ning tawng sah i. 11Ciamanin BAWIPA ning Pathian khiah it tuhin a kungniu ralring  tuu-ih. 12Cialo in ningte in ning khel lamah let leh in he ning lakai umtu mi phun dang te khiah pawl in amahte thawn nu dun pa dun leisikhaw, 13BAWIPA ning Pathian in he mite khiah ning hmai in ning hnawt sah tuh nawn lo khiah ling tu rori ih. Ikhalselai BAWIPA ning Pathian ai ning pehnak he ram pha songin ning cimpil hlan lo amahte khiah thang bangin ning awk ruai tu le ning nak  vithnak rihual le ning mit ai hling ah cang tuh i.

14Sik tuu-ih! Tun nia ah laivum hmuahhmuah dan bang in feh tuh ing. Ning thinlung veksen le ning rauhla veksenin ning thawn senghnak lamah BAWIPA ning Pathian ai relhnak thil pha pakhat bang khai khim lo in um lo khiah ling i si. Ning ca ah a veksenin khim liang ai pakhat bang khai  khim lo in um lo i. 15Ciamanin BAWIPA ning Pathian in ning khamhnak a pha thil khiah ning vumah hleng bangin,  a pha lo thil khai, BAWIPA ning Pathian ai ning pehnak he a pha ramin ning cimpil hlan lo, BAWIPA in ning vumah hleng ruai tuh i. 16Ningte in BAWIPA ning Pathian thawn lungkhim dunhnak thukham lakah sual in pathian dangte na khiah per sah in amahte khiah bia leisikhaw, BAWIPA  thinrawhnak in mei bang in ning kang tuhai, amah ai ning pehnak a pha ram songin a rang ngai in ning rall tuh sek i.” ti in rel i.

<<  JOSHUA 23  >>

Recent Posts