1 Zion ah thirhlung tum tu.
A cianghlim i mual vumin raalring tuhin thu sap tu.
Ram songai um tu hmuahhmuah in lau tu seh.
Ziangmanti fangin Bawipa niakhua khiah hleng i hang.
A nong niu ah i hang.
2 Cia nia khiah khuathim le thinhnawm kul nia i tuh i.
Cia nia khiah mairo kai nia le khuathim bik nia i tuh i.
Mual vumah zing ai mairo khukhnak bang i tuh i.
A lian ngai le a hat ngai mite khiah hleng i.
Amahte bang khiah um awng lo i.
Tunhnua san tam pui rinah,
amahte bang um awng tuh nawn lo i.
3 Amahte hmai lamah mai in kang i.
Amahte hnua lam khai mai in kang i.
Amahte hlan ah cia ram khiah
Eden Vuandum bang i awng i.
Amahte hnua ah cia ram ah
zaikhai bek lo nelrawn cang i.
Amahte hnenin zaikhai luat tuh lo i.
4 Amahte hmuihmel khiah siphuhte
hmuihmel bang i.
Amahte khiah siphuh bang in a cak ngai in dawp i.
5 Siphuh leng pau hnak aw bang in
amahte in mual vumah dawk i.
Amahte aw khiah mai in thing kang ai
puak hnak aw bang i.
Amahte khiah raaltawng tuhin raalring tu
a cak ngai mite bang i.
6 Amahte hmai ah minungte khiah a ur in cai hnelhno i.
Amah te hmai khiah raudia i.
7 Amahte khiah mi thahat ngai te bang in dawp i.
Raalkap te bangin sen vumah kai i.
A veksenin a cang niu in vak i.
Amahte in lamtler lo i.
8 Pakhat le pakhat khiah tul dun lo i.
Amahte hmailam ten ah vak i.
A bawhtu te hnenlam ah lamtler lo in nawt i.
9 Amahte khiah khua song pumpalah ah dawp i.
Sen vumah dawp i.
Inn vumah kai i.
Ruko bangin padinpauh songin lut i.
10 Amahte hmai ah laipua khiah hlin i.
Van khai hlin i.
Ni le hla khai thim i.
Arsi te khai a tlawm deuh in tleu i.
11 BAWIPA in amah raalkap te hmai in thurel i.
Ziangmanti fangin a raalkapte khiah tam ngai i.
A thu bang ai bawn tu Pa khiah thahat ngai i.
Ziangmanti fangin BAWIPA niakhua khiah
lian ngai ai laukul bik i.
Aisu in tuar ben tuh i?
12 “Ciamanin,” BAWIPA in ti i.
“Ning thinlung ngaingai in i hnenah let leh tuu-ih.
Rong ul in le kap kong le lungsia kong in let tuu-ih.
13 Ning thilthuam i lo in ning thinlung sawn zik tuu-ih.
BAWIPA ning Pathian hnenah let leh tuu-ih.
Ziangmanti fangin amah khiah
mi hmunthiam le mi ngaihhar thai i.
thinraw baai lo, mi ninghio thai i.
Cen amah in cawhkuan khai pe awl thai i.
14 Amah khiah a thin thleng leh in cawhkuan
khiah pe awl in, a hnua ah ning Pathian
Bawipa hnenah hlu tuh in rongmu le ding
tuh a hlu hmuifu pakhat hlum tuh le tuh lo
khiah aisu in ling thill i?
15 Zion ah thirhlung tum tuu-ih.
Rong ul tuu-ih.
Sawngen tuhin pumkhawm ko tuu-ih.
16 Mi zapui khiah khawm ruai tu.
Pawlpui te khiah ciang ruai tu.
Upate khiah khawm ruai tu.
Naupang te le hnawifawp nausen te khai khawm tu.
Mohoi pa khiah a khaan songin suak tu seh.
Monuu khai a paarhmun khaan songin suak tu seh.
17 BAWIPA hmai ah naper tu phungki te,
Awlta cabuai le donsuk laklawh ah kap tuu-ih.
Phungki te in, “Aw BAWIPA, na minung te khiah zah tu.
Na minung te khiah ram dang mite in
zauhsuam tuhin siang mah.
Zaimanin amahte in mi phun dang te lakah,
‘Amahte Pathian khiah akonah i hang.?’
ti in ti tuh i.” ti in rel tu seh.
18 Ciafangin BAWIPA khiah amah ram ca in thahiam tuh i.
Ciafangin amah minungte khiah ninghio tuh i.
19 BAWIPA in a minungte hnenah,
“Rongmu le capittizu thar le thau ning kuat tuh ing.
Ciate in rong ning kham ruai tuh i.
Ram dang mite in zauh ning suam ruai tuh nawn lo i hang ing.
20 Ikhalselai saklam ai raalkapte khiah ning
hnenin a hla ngai ah hnawt tuh ing.
Amah khiah zaikhai po lo aisu khai
um lo hmunah hnawt tuh ing.
Amah in nisuah hmunlam ai tipui lam hoi tuhai,
nitla hmunlam ai tipui khiah a hnuahlam ah um tuh i.
Amah khiah uih tuh i.
Ciamanin a nam khiah sia tuh rauh i.”
ti in BAWIPA in rel i.
21 Aw laipua, lau mah.
Ang in hiam tu.
Ziangmanti fangin BAWIPA in ngaihsun urkul te bawn zo i.
22 Lo lai ramsate, lau mah ih.
Ziangmanti fangin hampate khai po liang lo i hang.
Thingkung te in khai thai liang lo i hang.
Capit kung le thaikung te khai thai i hang.
23 Ciamanin Zion fate, ningte khai ang tuu-ih.
Ning Pathian BAWIPA lakah hiam tuu-ih.
Ziangmanti fangin amah in a hmasa ruah
khiah a hman niu in ning pe zo i.
A hmasa le a hnuata ruah khiah
hma hmasa ber ah ningmah ca in sii ruai tuh i.
24 Rongcil hmun khiah sangvut thawn dim tuh i.
Capittizu le thau khawihmun bel te khai
capittizu thar le thau thawn dim in leet tuh i.
25 Ning hnenah i hlathnak a lian ngai i
raalkap khokhuak lian te le
Khokhuak cik niuniu te le
a dang khokhuak te le
a kial ai rong ei pawl khokhuakte
ai ei hnak rong te khiah ning pe leh tuh ing.
26 Ning te in a tam ngai in ei tuh ai ning kham tuh i.
Ciafangin ngaihsun urkul ngai ai
kil ning khawl tu ning Pathian BAWIPA hming
khiah cuan tuh i si.
I minung te khai zaikom in khai zakthi in dah tuh lo i hang.
27 Ciafangin kaimah khiah Israel mite lakah
um ai, kaimah khiah ning Pathian
BAWIPA i ti le kaimah lo a dang Pathian
um lo i ti khiah ling tuh i si.
I minung te khai zaikom in khai zakthi in dah tuh lo i hang.
28 Ciafang in i Rauhla khiah mi veksen
vumah burh tuh nia khiah hleng tuh i.
Ning fapa le ning fenu te in prawfet thu rel tuh i.
Ning patar te in mang man tuh i.
Ning tlangval te in Pathian hmuhhnak mithla te hmu tuh i.
29 Cia nia lamah i hnenum pasal le nupang te
vumah khai i Rauhla khiah burh tuh ing.
30 Van vumah le laivum ah ngaihsun urkul te hmuh tuh ing.
Thi san le mai le maikhu puipui hmuh tuh ing.
31 A laukul ngai BAWIPA niakhua
hleng hlan ah ni khiah thim tuh i.
Hla khiah thi bang in san tuh i.
32 Ciafangin BAWIPA hming ko tu
hmuahhmuah khiah o tuh i.
Ziangmanti fangin BAWIPA ai relhnak bangin,
Zion Mual vumah le Jerusalem ah
BAWIPA ai kohnak a taang hnak mite in ohnak ngah tuh i.