Job 23

<<  JOB 23  >>

1  Ciafangin Job in,

2  “Tunnia rinah a sia ngai in cam ing.
I hukhnak in i kutte khai com tau lo in mer i.

3 Aw, Amah tawk hmun tuh khiah ling inglai
a to hmun ah kawi tuh napui ing!

4 Amah khiah i thu rel tuh napui ing.
I kaa thawn el tuh napui ing.

5 Amah ai i sawn tuhhnak khiah ling i nuam i.
I hnenah a relhnak thu khiah ling i nuam napui

6  A huthawm lianpui thawn i tawng ni tur im?
I tawng tuh lo i.
Ikhalselai amah in i ling tuh i.

Ciata ah mi dikcangte in amah thawn thu rel kawm thill tuh i.
Ciafangin i Thukhantu pa kut in kumzangza in i luat ruai tuh i.

8  Hmailam ah feh inglai amah khiah ciata ah um lo i.
Hnualamah let inglai, amah khiah hmu thill lo ing.

Amah in kekeh lamah naper fangin
amah khiah hmu thill lo ing.
Kiahhan lamah her fangin khai
amah khiah hmu thill lo ing.

10 Ikhalselai amah in i feh hmun lampui khiah i ling sah i.
Amah in i cu ben fangin,
sui bang in i suak tuh i.

11 I ke in a kalsuanhnak khiah a rang ngai in hlun i.
Kaimah in amah lampui khiah hlun ai tlamtler in vak lo ing.

12 A kaa ai ponghnak thukham khiah hlunlo in um lo ing.
A ponka khiah ronghnak in thupui sawnin ruat ing.

13 Ikhalselai amah khiah aisu thawn khai bang lo i.
Aisu in amah khiah thleng ruai thill i?
Amah nuamhnak bangin bawn i.

14 Ziangmanti fangin i ca ai a dahhnak hmuah khiah amah in i bawn sah i.
Amah thawn cia bang thil tampui um i.

15 Ciamanin amah hmai ah i lau rauh i.
He khiah ruat fangin amah khiah kih rauh ing.

16 Ziangmanti fangin,Pathian in i thin khiah nau ruai i.
A Cungnung Pathian khiah kih ngai ing.

17 Ziangmanti fangin amah in khuathim songin i vawng lio lo i.
Amah in mitsin bang khuathim khiah i hmai in thup lo i.

<<  JOB 23  >>