1 Ciafangin Teman mi Eliphaz in,
2 “Mifim pa in fimhnak nai lo bang in,
sawn tuh im?
Amah veve khiah nisuak lamai hlivua
thawn dim tuh im?
3 Thu lovang pon le a man nai lo
ponka thawn el tuh im?
4 Pathian khai zul lo i si.
Cen Pathian hnenah khai
sawngen in um lo i si.
5 Na sualhnak in na kaa khiah thucuk i.
Cen hrokhrolte pon pong i si.
6 Kai in na cawh lo ai nangmah kaa in na cawh i.
Nangmah kaa rori in nangmah lakah tettikhan i.
7 Nangmah khiah a te hmasaber minung i sim?
Mualtlangte hlanah na bawnhnak i aw im?
8 Pathian ai thusawmhnak tang zaa awng aw sim?
Nangmah lekin fimhnak nai vuah i aw sim?
9 Kin ling lohnak zai ling pa si?
Kin hmu lohnak zai hmu pa si?
10 Na paate hnak in tar sawn patarte le
puak paar naite khiah kin hnenah um i.
11 Pon neem niu in pong ai
Pathian topuihnak khiah na ca ah a cik ze im?
12 Zaimanin na thinlung in na thiar teu i?
Ziangmanin na mit te khiah khep i pa?
13 Ciamanin Pathian lakah na raw ai
cia bang pon khiah na kaa songin suak ruai i si.
14 Aisu bang minung in cianghlim thill i?
Nupang songai tehnak minung in dikcang thill tuh im?
15 Pathian in a vancung mite rin sang lo ai
a hmai ah vancungte khai ciang lo i fang tu,
16 Ningdulkul le a rim le sualhnak khiah
ti bang ai ding tu minung khiah akontih in
cianghlim tuh zel i.
17 Na rel tuh ing, i ngai tu.
I hmuhnak khiah na rel tuh ing.
18 Cia khiah mifim te in a paate hnenin ngahhnak
thu khiah thup lo in pehnak i.
19 (Cia a paate hnen lekah he ram khiah pe awng
ai cia ram songah ramdang mi vak awng lo i):
20 Cia thu khiah zai i ti fangin,
misualte khiah amahte nun song urhnak tuar i.
Mi nemh tu pa khai amah ca ai kum tampui
khawihnak khiah tuar i.
21 A bilkua ah laukul aw lolek um i.
A nunnuam ai um teng fangin khai,
mi hnawmcan tute khiah a vumah hleng i.
22 Khuathim songin suak ngah leh tuhin
amah in umm lo i.
Amah khiah vangsau thawn rek tuh ai
bawnhnak i.
23 Rong sii in vak ai, ‘A konah um i?’ ti in ti i.
Khuathim khiah a kutpur a nong niu ah um
khiah ling i.
24 Rimsuhnak le thinurhnak in amah khiah lau ruai i.
Kumpibawi raaltawng tuh pai bangin,
ciate in amah khiah neh i.
25 Ziangmanti fangin amah in Pathian khiah
a kut thawn kawk ai,
a Cungnung Pathian khiah zainam lo in nung i.
26 A lum lianpui thawn Pathian tawng tuhin dawp
27 A hmai khiah thau ruai ai,
a el khai lian in thau ruai napui ai,
28 Amah khiah hnawmcan tuhai dahcia hnak
minung um lo hmun khuate songah khuato ai
aisu khai um lohmun inn songah um i.
29 Amah khiah milian cang tuh lo i.
A naihhnak khai khaang tuh lo i.
A naihhnak khiah laipua vumah zaai tuh lo i.
30 Amah in khuathim songin suak tuh lo i.
Mailei in a kakte khiah ro ruai tuh i.
Pathian kaa songai haihawh in amah khiah lan tuh teu i.
31 A lovang thil khiah rinsan ma seh.
Amah veve zawl i.
Ziangmanti fangin a hlawhtham khiah zaikhai i tuh lo i.
32 Amah cuu khim hlanah amah khiah
a khim niu in rul tuh i.
A kakte khiah zaai tuh lo i.
33 Amah khiah capit thai kuruh loih siohnak
capit kuang bang i tuh i.
A paar tlok siohnak oliv thing bang i tuh i.
34 Ziangmanti fangin misualte kom tute khiah thai nai tuh lo i.
Nawhthuh daihte khiah mai in kang tuh i.
35 Amahte in rimsuhnak khiah nau bangin pai ai,
sualhnak khiah nau bang in te ruai i.
Amahte sul songin thudon khiah tumcia i.” ti in rel i.