1 BAWIPA in, “Babilon le Leb Kamai ai umtu mite khiah khuahu thawn seu tuh ing.
2 Kaimah in Babilon ah fang khaaptute hlat tuh ai,
Amahte in khaap tuhai, a ram ah zaikhai
um lo in dah tuh i.
Ziangmanti fangin hnophnak nia ah
amahte in amah khiah nuamhmun caang in tawng tuh i.
3 Kahpuk sai tu pa in a kahpuk khiah er ma seh.
Cen amah in raaltawnghnak thilthuam khai sil ma seh.
A tlangvalte khiah zah mah ih.
A raalkapte khiah a veksenin rek tu sio ih.
4 A rekhnak mite khiah Khaldean ram ah tlu tuh i.
Amahte lampui lakah amahte khiah a raalte in ur ruai tuh i.
5 Ziangmanti fangin amahte ram khiah
Israel mite ai a Cianghlim Pa lakah
sualhnak thawn dim napui ai,
Israel le Judah khiah a Pathian,
vancung mite BAWIPA in zam lo i.”
6 Babilon khua songin tlan tuu-ih.
Aisu hmuah in amahte nunhnak khiah o tu seh.
Amah sualhnak manin thihhnak tuar mah ih.
Ziangmanti fangin tun heh BAWIPA in phuzul cu i.
Amah khiah a phutua in BAWIPA in tham tuh i.
7 Babilon khiah BAWIPA kut songah sui khuat i.
Babilon in laivum hmuahhmuah zukham ruai i.
Mi hmuahhmuah in a capittizu khiah ding sah i.
Ciamanin amahte khiah am sek i.
8 Babilon khiah cammalak in tlu tuhai khoi tuh lio i.
Amah khiah kah tu.
A urhnak ca in sii kawih tu.
A urhnak cak thai pang i.
9 Babilon khiah ur lawm ruai kin nuam napui i.
Ikhalselai a urhnak lawm thill lo i.
Amah khiah hlum in kinmah ram ten ah tlung nga sing.
Ziangmanti fangin a cawhkuan khiah
vancung tian in hleng i.
Van vum tian in ban i.
10 BAWIPA in kin dikcanghnak larruai zo i.
BAWIPA kin Pathian naper khiah
feh in Zion ah rel nga sing.
11 Conkiangte khiah zum tuu-ih.
Lumpuite khiah lang tuu-ih.
BAWIPA in Mede kumpibawte khiah thinso ruai i.
Ziangmanti fangin a tumhnak khiah
Babilon hnawmcan tum i.
BAWIPA in phuzul tuh i.
A temple ca in phuzul tuh i.
12 Babilon renhnak seen ah a lan tar tuu-ih.
Kat kiltute khiah kho ruai tuu-ih.
Raalviltute khiah dah tuu-ih.
Amahte khiah bawh tuu-ih.
BAWIPA in Babilon mite vumah
a thu pehnak bangin, bawn tuh i.
13 Ti tam ngai hiang ai umtu le thilri tamngai nai tute,
Ning bohnak cu hleng i hang.
Ning nunhnak ri khiah cem lio i hang.
14 Vancung mite BAWIPA in,
“Nangmah khiah khokhuak burpui bangin
minungte thawn na dim ruai tuh ing.
Na neh manin amahte khiah au tuh i.”
ti in Amah veve thukam i.
15 Amah power thawn laipua khiah bawn i.
A fimhnak thawn laivum pumpuhluk khiah sa i.
A linghnak thawn vancungte khiah kau ruai i.
16 Amah in khuari bangin au fangin,
vancung ai ti te khiah huk i.
Amah in mairo khiah laipua a tong hmun in suak ruai i.
Amah in vantlingtlaleuh khiah ruah thawn hleng ruai i.
Hlivua khiah a rong khawihmun inn songin suak ruai i.
17 Aisu hmuah khiah ruathnak nai lo le linghnak nai lo i.
Sui pumsutute khiah amahte milim zuk in zakthi ruai i.
A zukte khiah thu lovang i.
Amahte songah haihawh um lo i.
18 Amahte khiah zaikhai hnempui lo i.
Ruat sualhnak naper i.
Amahte khiah cawh nia ah amahte khiah rall tuh i.
19 Zakuk Ro tu ciate bang lo i.
Ziangmanti fangin amah khiah
zai hmuahhmuah bawntu paa i.
Israel khiah Amah ro le amah mi phun i.
A hming khiah vancung mite BAWIPA i.
20 Nangmah khiah i raaltawnghnak haihpui i si.
Raaltawnghnak thilri i si.
Nangmah thawn kumpibawi ramte khiah
hnawmcan tuh ing.
21 Nangmah thawn siphuh le a totu pa khiah
a cik niu niu in khoi ruai tuh ing.
Nangmah thawn siphuh leng le
a vumai totu khiah a cik niuniu in khoi ruai tuh ing.
22 Nangmah thawn pasal le nupang khai
a cik niuniu in khoi ruai tuh ing.
Nangmah thawn a tar le a dawn te khiah
a cik niuniu in khoi ruai tuh ing.
Nangmah thawn tlangval le fenu khiah
a cik niuniu in khoi ruai tuh ing.
23 Nangmah thawn tukhal tu le a tu te khiah
a cik niuniu in khoi ruai tuh ing.
Nangmah thawn lovai tu le a kawlpaw
cang te khiah a cik niuniu in khoi ruai tuh ing.
Nangmah thawn mi-uk le khuabawite
khiah a cik niuniu in khoi ruai tuh ing.
24 “Babilon le Khaldea ai umtu mite khiah
Ning mithmuh in Zion ah amahte bawn
sualhnak manin rul leh tuh ing.” ti in BAWIPA in ti i.
25 “Siktu. Laivum pumpalah hnawmcantu
aw hnawmcantu mualpui, kaimah khiah
na raal ing.” ti in BAWIPA in rel i.
“I kut thawn na tawng tuhai khu vumin na cin ruai tuh ing.
Mai ai kang lio mual ah na cang ruai tuh ing.
26 Inn ning lungto tuhin na hnenai amahte in
lungto lang tuh lo i.
Inn ham ca in khai na hnenin lungto lang tuh lo i.
Ikhalselai kumzangza in zaikhai
um lo hmunah na cang tuh i.”
ti in BAWIPA in rel i.
27 Ram songah a lan tar tuu-ih.
Mi phun caang hnenah thirhlung tum tuu- ih.
Mi phun caang in amah tawng tuhin pai ruai tuu-ih.
Ararat, Minni, le Ashkhenaz kumpibawite khiah
amah tawng tuhin ko tuu-ih.
Amah tawng tuhin raalbawi pakhat haih tuu-ih.
Khokhuak bangin lawilio in siphuhte khiah kuat tuu-ih.
28 Mi phun dangte -Mede kumpibawite,
acuzahte le a bawite le amahte ukhnak ram hmuah khiah,
amahte tawng tuh in pai tuu-ih.
29 Ciafangin cia ram khiah hlin tuhai lungsia tuh i.
Ziangmanti fangin Babilon khiah
zaikhai um lo hmun ah cang tuhin,
BAWIPA in a tumhnak hmuah khiah
Babilon lakah bawn tuh i.
30 Babilon raalbawite in raaltawng awl lio i.
Amahte raalkap inn songah um meng i.
Amahte in tha nai nawn lo i.
Amahte khiah nupang bang in cang i.
A innte khiah mai in tai sah i.
A thir kawldawngkham khai ek sah sio i.
31 Babilon kumpibawipa khiah
a khua khiah a veksenin neh sio i hang ti rel tuhin,
laisan tu pakhat hnua pakhat,
thuthantu pakhat hnua pakhat khiah hlun dun in feh i.
32 Lampuite khiah pit sio i.
Cirh lakai hampate khai mai thawn tai i.
Cen a raalkapte khiah lau rauh i.
33 Israel mite Pathian, vancung mite
BAWIPA in, “Babilon fenu khiah ke ai tlawh
hnak fangcil hmun khang bang i.
Amah khiah rong bangin khawm nia khiah
hleng cing tuh i.” ti in rel i.
34 “Babilon kumpibawipa Nebuchadnezzar
in kin ei ai, hnawm kin can i.
Zaikhai um lo palang kualawng bangin kin dah i.
Rulpui bangin kin lem ai kin sa thawn
a pumpui khiah dim ruai i.
Ciaben fangin cil bangin kin thuih i.
35 Kin taksa vumah bawnhnak rimsuhnak
khiah Babilon vumah lo hleng tu seh.”
ti in Zion ai umtu te in rel i.
“Kin thi khiah Babilon ai umtu te vumah
hleng tu seh.” ti in Jerusalem in ti i.
36 Ciamanin BAWIPA in,
“Ning thu khiah ning rel sah ngang.
Ning ca in phuzul tuh ing.
A tipui khiah kaang ruai tuh ing.
A cirhtite khiah ro ruai tuh ing.
37 Babilon khiah hnawmcan tuh sio i.
Mehlengte kua ah cang tuh i.
Mite ai ngaihsunurhnak le zauhsuamhnak ah cang tuh i.
Cia khua ah minungte in khuato tuh lo i.
38 Amahte khiah chintit bangin huk tlang tuh i.
Chintit fate bangin nger tuh i..
39 Amahte khiah thin so rauh in um tengin,
Amahte khiah puai bawt sah tuh ing.
Zukham ruai tuh ing.
Ciafangin amahte in ang tuhai,
a kumkhua in mitmu tuh ai phawk tuh nawn lo i.”
ti in BAWIPA in ti i.
40 Amahte khiah a rek hmun ah kawihhnak
tufa le tu cang le me cang te bangin kawih tuh ing.
41 “Aw, Sheshak khiah neh lio i.
Aw, laivum pumpalah ai cuanhnak khua khiah pom lio i.
Babilon khiah mi phun lakah zaikhai um lo hmun ah cang lio i.
42 Tipui in Babilon khiah cum lio i.
Amah khiah tihual tam ngai in khuk lio i.
43 A khuate songah aisu khai um nawn lo i.
Lai ro le nelrawn, aisu khai um lo hmun ram cang lio i.
44 Babilon ah Bel khiah cawh tuh ing.
A kaa ai lemhnak khiah suah sah leh tuh ing.
A hnenah mi phun dangte khiah zu tuh nawn lo i.
Babilon renhnak seen khiah tlu tuh i.
45 “I minungte, a songin suak tuu-ih.
Aisu hmuah in BAWIPA thinrawhnak
hmunin amah veve khiah luat ruai tu seh.
46 Ram songah zaipah lin lo thu za fangin,
thinhnawm mah ih. Lau khai lau mah ih.
Tun kumah zaipah lin lo thu hleng tuhai,
kum thar fangin a dang thu suak tuh lala i.
Ram songah rimsuhnak thu le
uktu bawi pakhat le pakhat
tawngdun hnak thu khiah dak tuh i.
47 Ziangmanti fangin Babilon ai mizuk te
i cawh nia khiah hleng tuh i lai.
A ram veksenin hmaisia tuh i.
A minung rekhnak te khai a ram songah tlu tuh i.
48 Ciafangin vancung le laivum le a songai
umte khiah Babilon lakah ang in au tuh i.
Ziangmanti fangin, saklam in hnawmcantu
te in amah khiah taih tuh i.” ti in BAWIPA in rel i.
49 Babilon in Israel ram ai rekhnak mite tlu ruai bangin,
Babilon ah khai laivum hmuahhmuah ai
rekhnak mite khai tlu tuh ve i.
50 Vangsau hnenin luat ngah tute, tlan tu teu ih.
Ding meng in um mah ih.
Ram hla ngai in BAWIPA khiah hih tuu-ih.
Jerusalem khiah ning thin songin ruat tuu-ih.
51 Zauhsuamhnak thu za manin, zak kin thi i.
Kin hmai khiah zakthi in kin khuk i.
Ziangmanti fangin BAWIPA inn songah
ram dang mite lut te i.
52 Ciamanin BAWIPA in rel i.
“Amahte milim zukte khiah cawh tuh ing.
A ram song pum palahah hmaihma
naite khiah a ur in au tuh i.
53 Babilon in van tian in kai in,
A thahathnak khiah a sang ngai in ren khalse lai,
I hnenin hnawmcantute khiah
a hnenah hleng tuh i.” ti in BAWIPA in ti i.
54 Babilon in kaphnak aw khiah hleng i.
Khaldean te ram songin hnawmhnak
lian ngai aw khiah hleng i.
55 Ziangmanti fangin BAWIPA in Babilon
khiah hnawmcan ai,
A cawm ngai ai a aw khiah dap ruai i.
Amahte auhnak aw khiah tihual lian ngai bangin huk i.
Amahte auhnak aw khiah cawm i.
56 Hnawmcantute khiah Babilon tawng tuhin hleng i.
A raalbawite khiah pom sek i.
Amahte kahpuk khiah a veksenin ek sah sio i.
Ziangmanti fangin BAWIPA khiah a rul thai leh Pathian i.
Amah in rul tuh rori i.
57 “A bawite le a mifimte le a uktubawite le
a bawmtute le a raalbawite khiah zukham ruai tuh ing.
Amahte khiah kumkhua in mitmu tuh ai
phawk tuh nawn lo i.” ti in Kumpibawipa in rel i.
Cia Kumpibawipa hming khiah, vancung mite BAWIPA i.
58 Vancung mite BAWIPA in,
Babilon renhnak a kau ngai seen khiah a veksenin ek tuh sio i.
A saang ngai a kawldawngkham khai mai thawn tai tuh i.
Cia mai manin cia mite le mi phun dangte
khai a naperhnak khiah a lovang cang tuh i.
Amahte khiah cawl tuh menma i.” ti in ti i.
59He khiah prawfet Jeremiah in Mahseiah fapa Neriah fapa Seraiah khiah Judah kumpibawipa Zedekiah thawn Babilon ah a ukhnak kum li fangin feh kawm fangin, rel hnak thu i. Seraiah khiah bawi pakhat lo i. 60Ciamanin Jeremiah in Babilon vumah hleng tuhhnak a pha lo te khiah a veksenin ca-uk songah he thute khiah ngan sio i. 61Ciafangin Jeremiah in Seraiah hnenah, “Babilon ah na hleng fangin, he thu khiah a veksen in siar tulai, 62 hetih in rel tu: ‘Aw BAWIPA, Nangmah in he hmun khiah cem tuhai a songah minung le ramsa khai taang tuh lo ai, kumzangza in zaikhai um lo hmunah cang ruai tuh in rel zo i si.’ ti in rel tu. 63He ca-uk na siar ben fangin, ca-uk khiah lungto vumah pen tulai, Zufraitis runti songah lon tu. 64Ciafangin nangmah in, ‘Hetih bangin Babilon khiah a vumah i hleng ruaihnak a pha lo thawn tlok tuh ai tho leh tuh nawn lo i. Amahte khiah cawl tuh i.’ ti in rel tu.” ti in ruai i. He khiah Jeremiah relhnak thute i.