1Babilon kumpibawi Nebukhadnezzar in Judah kumpibawi Jehoiakim fapa Jekhawniah le Judah mi bawite le lettamate le pumsutute khiah Jerusalem in pom ai Babilon ah phur hnua fang in, temple hmaiah thaihmin dim bawm panih khiah Bawipa in i hmuh i. 2Bawm pakhat songah tu thaihmin a hmin pha ngai um i. A khatta bawm songah tu a pha lo ei tlak lo thaihmin um i. 3Ciafangin Bawipa in i hnenah, “Jeremiah, zai hmu pa si?” ti in i zawt i. Kai in, “A pha ngai thaihmin, le a pha lo ze ai ei tlak lo thaihmin hmu ing.” ti in sawn ing.
4Ciafangin BAWIPA thu khiah i hnenah, 5“Israel Pathian BAWIPA in, ‘He a pha thaihminte bangin, amahte phathnak ca in kaimah in amahte khiah Khaldean ramah i feh ruaihnak a phurhnak Judah mite khiah a pha i. 6Ziangmanti fangin amahte khiah kaimah in a kungniu in sik tuh ai he hmunah kawih leh tuh ing. Amahte khiah sa tuhai bal tuh lo ing. Amahte khiah cing tuhai phai tuh lo ing. Amahte in kaimah khiah BAWIPA ti in ling thaihnak thinlung pe tuh ing. Ciafangin amahte khiah i minung cang tuhai, kaimah khiah amahte Pathian cang tuh ing. Ziangmanti fangin amahte khiah a thinlung ngaingai in i hnenah let leh tuh i.
8Cen a hnawm ze manin ei thil lo thaihmin hnawm bang in, BAWIPA in, ‘Judah kumpibawi Zedekiah le a bawite le he ramai umtu a taang hnak Jerusalem mite le Izip ramai umtu mite khiah zam tuh lio ing.’ ti in ti i. 9Amahte khiah laivum kumpibawi ram caangah amahte khiah rimsu le ur tuhin ap tuh ing. Ciafangin amahte khiah i hnawt hmun caang ah mi zauhsuamhnak, mi santehhnak, mi ai lekhnak le mi in awrsia ai camhnak tuar tuh i. 10A paate hnenah i pehnak ram songin amahte khiah bo hlan lo, amahte hnenah vangsau le rian le urhnak khiah hlat tuh ing.’ ti in ti i.” ti in i rel i.