1 “Awl lo in a cawm ngai in au tu.
Thirhlung bang in na aw suah tu.
I minungte khiah amahte sualhnak rel tu.
Jacob mite khiah a sualhnak rel tu.
2 Ziangmanti fangin amahte in ni siar in i sii i.
A hman bawntu mi phun le amahte Pathian
thukham khiah zaam lo tu mite bangin
I lampui khiah ling nuam i.
A hman ai thukhan dan khiah ii zawt ai
Amahte in Pathian khiah nong hiam i.
3 Amahte in, ‘Zaiman in rong ul napui ai
kin hmu sah lo i si?
Zaimanin thinniam in um napui ai
zaikhai kin nam sah lo i si?’ti in ti i.
Ikhalselai ning rong ul nia ah
ning nuam bang in bawn ai
ning naper sahtute khiah a veksen in rok sah i si.
4 Tawng dun tuh le el dun tuhin rong ul ngawn i si.
Sualhnak kut tum thawn seu dun i si.
Tunnia ai bang in rong ul le isikhaw,
vancung in ning aw khiah ning za sah tuh lo i.
5 Ni khat lek thinniam ai um tuhin rong ul khiah i rilhnak im?
Phaikung bangin a lu khiah ut tuh nia menma im?
Vaidip sil ai vutkuang vum ah taal tuh nia menma im?
Cia heh rong ul ti in ko i sim?
Bawipa in ning saangsah tuhin nam i sim?
6 I rilhnak rong ul tu hetih bang i ta lo im?
Misualte henhnak hlat sah tuh.
Thilrit te hmasa tuh.
A nemh hnak mite luat ruai tuh.
Thilrit hmuahhmuah sawng tuh
7 Ning rong khiah rikaam te thawn sem tuh.
Sumpua ah hnawthnak mi farahte khiah
ning inn ah kawih tu.
Kawngkolhte hmu fangin pon sil tuh.
Ning thi le ning sa te hnenin relh tuh lo
Ciabang khiah i rilhnak rong ul i ta lo im?
8 Ciafangin ning khuavar khiah
zing khuavar bang in tlang tuh ai
a rang ngai in ning urhnak ning lawm tuh i.
Ning dikcanghnak khiah ning hmai in feh tuhai
Bawipa thangphathnak khiah
ning hnua in ning khor tuh i.
9 Ciafangin ningte in Bawipa khiah ko tuhai,
amah in ning awi tuh i.
Ning in kap fangin amah in,
‘Heta ah ing.’ti in ning sawn tuh i.
Ningte in ning lakai thilrit khiah hma lio in,
Ning kut zung in mi khiah kawk awl in,
Mi khiah siat awl in,
10 Rikamte khiah ninghio in
Rimsu mite khiah bawm le isikhaw,
Ning khuavar khiah khuathim songah tlang tuhai
Ning khuathim khiah sunlai bang in var tuh i.
11 Bawipa in a catlo in kong ning hoi tuh i.
Ning samhnak khiah ning pe tuh i.
Ning ruhte khiah tha pe tuh i.
Tiburhhnak vuandum thawn ning bang tuh i.
A kaang nia um lo cirhti bang tuh i si.
12 Ningte lakai mite in he hlan ai
hmawm hmunte khiah sa leh tuh i si.
San tam ngai ca in a ham khiah sa tuh i si.
Ciafangin ningte khiah
A Tluhnak Sen sa leh tu le
Inn sa hmun tuh Lampuite Remleh tu, ti in ning ko tuh i.
13 I cianghlim nia, Sabbath nia ah
na nuamhnak bawn lo in na ke khiah sup in,
Sabbath nia khiah umm ngai in hmang in
Bawipa ai a cianghlim nia khiah zul in
Bawipa khiah upat in na nuamhnak khiah bawn lo in,
Na hiamhnak khiah sii lo in,
Nangmah thu khiah rel lo in um le sikhaw,
14 Ciafang in nangmah khiah Bawipa lakah na ang tuhai,
kaimah in nangmah khiah laivum ai mualtlang
sang vumah na vak ruai tuh ing.
Cen na pa Jacob ro thawn na cawm tuh ing.
Bawipa ka in rel zo i.”