1 Ephraim zukhamte lu ai hngalhnak papar lukhip le
A thangphatkul a mawi a voi riaro papar hnenah rimsuhnak um tu seh.
Cia Ephraim khiah zukham te umhmun rampha ngai rawn vum lamah um i.
2 Sik tuu-ih. Bawipa in a lian ngai le a cak ngai pakhat nai i.
Rial haa le khuahupui bangin le
Runpui ti in a varkam khiah cum bangin,
Amah in a kut thawn amahte khiah laipua ah sep tuh i.
3 Ephraim ai zukhamte hngalhnak papar lukhip khiah ke in tlawh sah tuh i.
4 Rampha ngai rawn vum lamai umtu
A thangphatkul a mawi a voi riaro papar khiah
rongkhawm hlan ai thai hmin bang tuh i.
Cia thai hmin khiah mi in hmu sawng fangin, a kut in loih ai ei lio i.
5 Cia nia ah vancung mi Bawipa khiah a taanghnak a minungte lakah
thangphathnak kukhip le a mawi lukhuk i tuh i.
6 Aman khiah, thukhan tuh ai to tu pa hnenah,
a hman ai thukhanhnak rauhla i tuh i.
Amah khiah kawldawngkham ah raalte tawng ben tute tha i tuh i.
7 Ikhalselai amahte in capittizu manin khelh i.
Zukham manin lam khelh i.
Phungki le prawfet te in zukham manin khelh i.
Amahte khiah capittizu in lem lio i.
Zukham manin amahte in lam khelh i.
Amahte in hmu khelh i.
A khelh in thukhan i.
8 Ziangmanti fangin cabuai khiah awk le ningdul kul thawn dim i.
A ciang hmun pakhat khai um lo i.
9 “Amah in aisu khiah fimhnak cuk tum i?
Cen aisu hnenah a thu khiah ling ruai tum i?
Hnawi ding awl sawng nausen te hnenah maw?
Hnawi fop awl sawng nauniu te hnenah maw?
10 Dan pakhat hnua ah dan pakhat,
Dan pakhat hnua ah dan pakhat,
Rin khat hnua rin khat, rin khat hnua rin khat,
Heta ah a tlawm niu, khiata ah a tlawm niu.”
11 Ziangmanti fangin amah in pon ting ngai le
mi ram dang pon thawn
He minungte khiah pon tuh i.
12 Amah in amahte hnenah,
He tih bangin a cawl te khiah com ruai tuh i si.
He khiah comhmun i.”ti in rel tuh napui ai,
Amahte in ngai nuam tuh lo i.
13 Ikhalselai amahte in Bawipa thu khiah,
“Dan pakhat hnua dan pakhat,
Dan pakhat hnua dan pakhat,
Rin khat hnua rin khat, rin khat hnua rin khat,
Heta ah a tlawm niu, khiata ah a tlawmniu.”ti in ruat i.
Ciamanin amahte khiah feh tuh ai, a hnualam ah tlu in ek in thang songah awk tuh i.
14 Ciamanin Jerusalem ai umtu mite uktu,
Mi puar thau, mi hngalte ,
Bawipa relhnak thu khiah ngai tuu-ih.
15 Ningte in, “Thihhnak thawn thukham dun zo i ing.
Hlankua thawn khai lungkhim dun zo i ing.
A rel zo lo rimsuhnak hleng fangin,
Kin hnenah hleng tuh lo i.
Ziangmanti fangin thudon khiah kin buanhmun i.
Thu hmanlo songah relh zo i ing.”ti in rel i si.
16 Ciamanin Bawipa Pathian in,
“Zion ah innham tuhin lungto zau zo ing.
Lungto kho ngai, a mankhung innning,
a kho ngai innham i.
A sang tu in hnawraw in bawn tuh lo i.
17 A caang le caang lo khiah thuhman thawn teh tuh ing.
Zawllai le zawllai lo khiah dikcanghnak thawn teh tuh ing.
Thudon buanhmun te khiah rial in lan tuh sio i.
Relh hmunte khiah ti in cuum tuh i.
18 Thihhnak thawn ning thukham khai pilh ruai tuh ing.
Hlankua thawn ning lungkhim dunhnak khai fai thill tuh lo i.
A rel zolo rimsuhnak hleng fangin,
A hnia ah ning tlawh tuh lio i.
19 A hleng caangcaang in, ning lan tuh i.
Ziangmanti fangin zing khat hnua zing khat, hleng tuh i.
Sun le zan in hleng tuh i.
A thu relhnak menma rin in ning lau ruai tuh ngai i.”ti in rel zo i.
20 Ziangmanti fangin khuahluan khiah a vumah it tuhin a com ze i.
A pon khai cik ze manin sil tham lo i.
21 Ziangmanti fangin Bawipa khai Perazim Mual vumah tho bangin tho tuhai,
Gibeon Rawn zawllai ah rawn awng bangin thinraw tuh i.
Ciafangin ngaihsun urkul na khiah per tuh ai,
Ngaihsun urkul a perhnak khiah khim ruai tuh i.
22 Ciamanin hngal hnelhno mah ih.
Ziangmanti fangin a kho am am in ning hen mawh ngai.
Ziangmanti fangin laivum pumpalah ah hnawmcanhnak hleng tuh khiah vancung mite Bawipa Pathian hnenin za zo ing.
23 I aw khiah ngai in za tuu-ih.
I relhnak thu khiah ngai in za tuu-ih.
24 Lovai tu pa in sunnivui in ci cing tuhin lovai awm?
A cekhnak laikhalte khiah nawi lio in seu aw hnelhno im?
25 Laipua khiah mam ruai ben fangin,
Ci cing in rongci khiah vorh in
Sangvut ci khiah a tluang in pawi ai,
Kawlkawn ci le nimden te khai amahte
po hmun tuh tenah pawi lo im?
26 Ziangmanti fangin amah in a hman in thia thiam thai in amah khiah Pathian in cuk i.
Pathian in amah khiah zirh i.
27 Rongci hrekkhat khiah haihpui thawn khawm lo i.
Cen rongci hrekkhat khai kawlpaw leng thawn rial lo i.
Ikhalselai rongci hrekkhat khiah fungkek thawn seu ai
rongci hrekkhat khiah tokrolh thawn seu i.
28 Sangvut khiah rial kul i.
Ciamanin a zomzet in cil hnelhno lo i.
A kawlpaw leng thawn khai rial kul lo i.
A siphuh ke thawn khai cil kul lo i.
29 He te khiah mi tiam thiam ngai le mi kongkoi thiam ngai vancung mite Bawipa hnenin hleng hnak i.