Isaiah 11

<<  ISAIAH 11  >>

1A taanghnak Jesse thingtum songin a kaak khiah tot tuh i.
A hnuk songin a Kaak khiah suak tuh i.

2 Bawipa Ciang Rauhla,
Fimhnak le thiamhnak Rauhla,
Thusawmtu le thahat Rauhla,
Linghnak Rauhla
le Bawipa kihhnak
khiah a vumah um tuh i.

3 Amah in Bawipa kih hiam i.
A mit ai hmu bang menma in thukhan tuh lo i.
Cen a naa in zahnak menma bangin khai
thukhan tuh lo i.

4 Ikhalselai amah in dikcang niu in
mi farahte khiah thukhan sah tuh i.
Cen laivum ai thinniam tute khiah a bangvek in
thurel sah tuh i.
A kaa ai a haihawh thawn mi sualte khiah rek tuh i.

5 A kawngpui ah dikcanghnak thawn pen tuh i.
A el ah rinsantlak elpen pen tuh i.

6  Mahleng khiah tufa niu thawn umkhat tuh i.
Tlavang khai me niu thawnbual khat tuh i.
Kawlpaw niu le chintit niu le kawlpaw laa
te khai umkhat tuh i.
Amahte khiah naupang niu in konghoi tuh i.

7 Kawlpaw le vom khai tlang khat tuh i.
A fate khai bual tlang tuh i.
Chintit in kawlpaw bangin hampa ei tuh i.

8 Nausen niu khai cobra rul kua hiang ah sal tuh i.
Hnawi ding awl zo nau khai
a ru nai rul kua songah a kut in pur tuh i.

9 Amah in a cianghlim I mual vumah tawng in
ur ruai dun tuh lo i.
Ziangmanti fangin Bawipa thangphathnak khiah
Ti in tipui khuk bangin, laivumah dim tuh ai
laivum mite in ling tuh i.

10 Cia nia ah Jesse Hnuk khiah mite hmai ah
a lan bang in ding tuh i.
Amah khiah Gentile mite in sii tuh i.
A comhmun khiah hming thang rauh tuh i.

11 Cia nia ah Assyria ram le Izip ram le
Pathros le Cush ram le
Elam le Shinar le
Hamath ram le ti ai kulhhnak ram hmuahhmuah ai
a taanghnak a minungte khiah
Bawipa in a kut thawn a vel nihhnak lang leh tuh thio i.

12 Mi phun hmuahhmuah te ca in amah in
a lan khiah tar tuh i.
Raalte ai pomhnak Israel mite khiah
hmunkhat in amah in
khawm leh tuh i.
Nuamhmun cang ai peuhnak
Judah mite khiah amah in
hmunkhat in khawm leh tuh i.

13 Ephraim mite ai iksik khai pai tuh i.
Judah raalte khai cem sah tuh sio i.
Ephraim in Judah khiah iksik tuh lo i.
Judah in Ephraim khiah hua tuh lo i.

14 Amahte in nitla hmunlam ai Philistia te ramah
mu bangin zuang tuh i.
Amahte in nisuak hmunlam ai
mite khiah rok sah tuh i.
Amahte in Edom le Moab mite khiah pom tuhai,
amahte in Ammon mite khiah uk tuh i.

15 Bawipa in Izip tipui khiah kaang ruai tuh i.
Hlivua sa ngai khiah a kut thawn
Euphrates Runti vumah
zuang ruai tuh i.
Amah in cia Run khiah
hmun sarih in khan tuh sio ai,
ciamanin mite in kezep thawn
tan ben tuh sio i.

16 Israel mite khiah Izip in suak awng bangin,
Assyria ram ai a taanghnak a minungte ca in
lamceh pui um tuh i.

<<  ISAIAH 11  >>