1Ciafangin Joseph khai Pharaoh hnenah kawi ai, “I paa le i unaute le amahte tuu le kawlpawte le a naihnak kawmin Khanaan ram in suak ai Koshen ramah hleng zo i.” ti in rel i. 2Joseph in a unau panga khiah keng ai Pharaoh hmuh i. 3Ciafangin Pharaoh in Joseph unaute khiah, “Zai per i si?”ti in zawt i. Amahte in Pharaoh khiah, “Na hnenum kinte khiah kin pupate sanai panin tuukhaltute i ing.” ti in sawn i. 4Cen amahte in Pharaoh hnenah, “He ramah um tuhin hleng i ing. Ziangmanti fangin Khanaan ramah rian rauh ze manin kin sumte ei tuh hampa um tau lo i. Ciamanin na hnenumte khiah Koshen ramah um siang tuhin na ngen i ing.” ti in ti i. 5Ciafangin Pharaoh in Joseph hnenah, “Na paa le na unaute khiah na hnenah hleng zo i. 6Izip ram khiah hmu liang i si. Ram pha ber hmunah na paa le na unaute to ruai tu. Koshen ah to tu seh. Cen amahte songah thiamhnak naitu ling le sikhaw i kawlpawte khal ruai tu.” ti in rel i.
7Joseph in a paa Zakuk khiah Pharaoh hmai ah kawih ai Zakuk in Pharaoh khiah hmuifu bur i. 8Ciafangin Pharaoh in Zakuk khiah, “Kum zaizah i si?” ti in zawt i. 9Zakuk in Pharaoh khiah, “I khualsi hnak khiah kum za le sawmthum i hang. I kum khiah i tlawm ai i har ngai i. Ciamanin i khualsi hnak kum khiah i paate khualsihnak kum thawn cam ben lo ing.” ti in sawn i. 10Zakuk in Pharaoh hmuifu bur ben fangin Pharaoh hnenin thawn i. 11Ciamanin Pharoah ruaihnak bangin Joseph in a paa le a unaute khiah Rameses ramai ram pha ber hmun pe i. 12Joseph in a paa le a unaute le a paa innsong khat hmuah a vekin rong cawm i. 13Ciafangin ram caangcaang ah rian rauh ze tlung manin rong um tau lo i. Ciamanin Izip ram le Khanaan ram khiah cia rian manin thi banghma in um i. 14Ciafangin rong laihnak ai hmanghnak Izip ram le Khanaan ramai tangka a veksen khiah Joseph in khawm ai Pharaoh inn ah kawih i. Izip ram songah le 15Khanaan ram songah tangka bo sio fangin Izip minung veksenin Joseph hnenah kawi ai, “Paisa um lo i hang. Ciamanin zaimanin na hmaiah kin thi kul i? Rong kin pe tu.” ti in ngen i. 16Ciafangin Joseph in, “Paisa nai hlahleisikhaw ning sumte i pe tu i lai ning sum ca in rong ning pe ngang.” ti in ti i. 17Ciamanin anite in amahte sum khiah Joseph pe i. Ciafangin Joseph in amahte siphuh le tuurual le kawlpawrual le lakte ca in rong pe ai cia kum song amahte khiah amahte sum kawmin rong cawm i. 18Cia kum bo ai a kum nihhnak fangin anite khai Joseph hnenah kawi ai, “Na lakah thup tuh lo i ing. Kin paisa khai bo zo berh i. Cen kin sum khai nangmah in nai liang i hang si. Bawipa na hmai ah zaikhai taang nawn lo ai kin pumpui le kin lofingte lek taang i hang. 19Kin lofing thawn na hmai ah kin thi nga im? Kin lofing le kin pumpui khiah rong ca in kin lai tulai kin lofingte kawmin Pharaoh hnenum cang nga ing. Kin lofingte khiah ngawlh lio in um lohnak tuhin le thi lo in kin nung thai in rongci kin pe tu.” ti in ngen i.
20Ciamanin Joseph in Izip ram a veksein Pharaoh ca in lai sio i. Ziangmanti fang in rian sia ze manin amahte lo khiah Pharaoh hnenah zuar sio i. Ciamanin lofingte khiah Pharaoh in nai sio i. 22Phungkite lo lek lai sah lo i. Ziangmanti fangin Pharaoh in phungkite khiah lofing semcia le Pharaoh in phungkite khiah rong pe manin amahte lofing khiah zuar kul lo i. 23Ciafangin Joseph in mite hnenah, “Tunnia ah ning lofingte khiah Pharaoh ca in ning lai zo ing. He rongcii ning pe ing. Ning lo ah cing tuu-ih. 24Rongkhawm cu fangin hmun nga khan hmun khat khiah Pharoah pe tuh i si. Cen hmun li lam tu ning lo ai cing tuh rongcii ca le ning ei tuh rong ca in le ning innsang te rong ca le ning fate rong ca in ningmah in ping tuh i si.” ti in rel i. 26Ciamanin tunnia tianin Izip ram khiah hmun nga khan hmun khat khiah Pharoah ai cang tuhin Joseph in thusuah i. Phungkite lofing lek Pharaoh in ping sah lo i.
27Israel khai Izip ramai Koshen ramah to ai amahte in thilri nai bial ai a rauh ngai in zaai ai khang i. 28Zakuk in Izip ramah kum hlaisarih um ai Zakuk khai a veksenin kum za le kum sawmli le kum sarih nung i. 29Israel thi tuhhnak nong i hang. Ciamanin a fapa Joseph khiah ko ai, “Ngaih i har le sikhaw, na kut khiah i kawngpui kualakah dah tulai a phantak niu in i bawm tu. Izip ramah i phum tau malaw. 30Ikhalselai i paate hmunah zau ve i nuam i. Izip ramin i phur tu teu lai amahte phum hmunah i phum tu.” ti in rel i. Ciafangin Joseph in, “Na ruaihnak bangin bawn tuh ing.” ti in sawn i. 31Ciafangin Zakuk in, “Cukti ding in i kham tu.” ti in ruai i. Ciafangin Joseph in cukti dingin thukham i. Ciafangin Israel khai a khuahluan lu lam hngai in Pathian bia i.