1Cia ramah rian khiah rauh am am i. 2Izip ramai amahte phurhnak rong khiah khawng sio fangin a paa in amahte hnenah, “Feh leh tu thio i lai rong kin lai tuu-ih.” ti in ruai i. 3Ciafangin Judah in a paa hnenah, “Khia pa in, ‘Ning nautaber kawih hlahleisikhaw i hmai i hmu tuh lo i si.’ ti in a thupui in kin hawk zo i. 4Kin nautaber feh siang lesikhaw rong na laih tuh in feh nga ing. 5Feh siang hlahlesikhaw, feh tuh lo i ing. Ziangmanti fangin khia pa in, ‘Ning nautaber kawih hlahleisikhaw i hmai i hmu tuh lo i si.’ ti in kin ti zo i.” ti in sawn i. 6Ciafangin Israel in, “Zaiman hetih tluk in i rim i si? Zaiman cia pa khiah nau pakhat nai i lai ing ti in rel ngian i si?” ti in ti i. 7Ciafangin anite in, “Khiah pa in vel khat pah in kin thu le kin innkuate thu kin zawt ai, ‘Ning paa tang cak aw lai im? Unau dang tang nai aw lai i sim?’ ti in kin zawt ai a zawt hnak bangin sawn i ing. ‘Ning nau heta ah zuk tuu-ih.’ ti in kin ruai tuh tu a kontih in ling tuh i ing?” ti in sawn i. 8Ciafangin Judah in a paa Israel hnenah, “Kin fate kawmin kin veksen in thi lo in kin nung thai in na fapa khiah kin thawn feh siang tulai tho in feh nga ing. 9Kaimah in aa-mah khan ing. I tavuan i tu seh. Na hnenah na hlen leh hlahleingkhaw kum zangza in mawhhlukhnak tuar tuh ing. 10Ziangmanti fangin tirhting in um ta hnelhno hlahsinglai tunin a velnih hnak rin hleng leh tuh zo napui i sing.” ti in ti i. 11Ciafang a paa Israel in amahte hnenah, “Ciatih ai kul i fang tu hetih in bawn tuu-ih: Ning bel songah he ram ai thing thai a pha berber thun tuu-ih. Cia paa khiah si nawih tuh balm le khoitilu le masala le almon le mipe te khiah lehsawng sum tuhin kawih tuu-ih. 12Tangka khai a letnih in keng tuu-ih. Ning dip songai ning tlunhnak tangka khai kawih leh tuu-ih. A dah sual khai lo i thai i. 13Ning nau khiah lang tu i lai cia pa hnenah feh leh tu thio ih. 14A Sangber Pathian in cia pa hmai ah ngaih lo ning har tu selai a dang ning unau le Benjamin khai lo hlat leh tu seh. I fate ca in lung i sia rauh i.” ti in ti i. 15Ciafangin anite in lehsawng le tangka khai a letnih in keng ai Benjamin kawmin tho ai Izip ah zu le Joseph hmai ah ding i.
16Joseph in Benjamin hmu fangin a darvuan pa hnenah, “Hete khiah i innah tlun tulai sa ro in rong lo ralring tu. Ziangmanti fangin hete kawmin sunsiah ei tlang tuh i ing.” ti in rel i. 17Darvuan pa in Joseph relhnak bangin bawn ai amahte khiah Joseph inn ah kawih i. 18Ciafangin anite khai Joseph inn ah fehpui manin lau ngai i. Ciamanin amahte in, “Hmasaber kin kawi fangin kin dip songah kin dah sahhnak tangka manin sal ai kin can tuhin kin pom nuam le kin lakte ping nuam in thu kin cit tuhin kin kawih i tuh i.” ti in ruat tlang i. 19Ciafangin anite khai dawngkham ah Joseph darvuan pa hnenah nong tlaang ai, 20“Bawipa, rong lai tuhin a hmasaber kin hleng fangin 21kin caam hmun inn ah hleng le kin dipte hong fangin kin tangka a khimniu in kin dip songah tawk i ing. Ciamanin cia tangka khiah kawih leh i ing. 22Cen rong lai tuhin a dang tangka khai keng i ing. Kin dip songah aisu in kin haih sah ling lo i ing.” ti in rel i. 23Ciafangin darvuan pa in, “Thin tlong in um tuu-ih. Lau mah ih. Ning Pathian le ning paa Pathian in ning dip songah tangka ning dah sah i. Ning tangka nai hlen ing.” ti in rel ai Simeon khiah amahte hnenah suah i. 24Cia darvuan pa in amahte khiah Joseph inn ah kawih ai ti te pe ai amahte in ke som i. Cen a lakte khai rong pe sah i. 25Joseph khiah amahte thawn sunsiah rong ei tuh i ti ling manin anite khai amahte kenghnak lehsawng khiah ralring in dah i.
26Joseph inn tlung fangin amahte in lehsawng pe ai a hmai ah laipua ah a lu ut tlang i. 27Ciafangin Joseph in amahte khiah thu zawt ai, “Ning relhnak patar pa ning paa tang cak aw lai im? Nung i lai im?” ti in zawt i. 28Amahte in, “Na hnenum kin paa khai cak i lai. Nung khai nung hlen i.” ti in rel ai amah khiah zul in a lu ut tlaang i. 29Joseph khai a lu tung ai khuahlir fangin a nuu fapa Benjamin hmu i. Ciafangin, “He pa khiah ning ai i relhnak ning nautaber i awm?” ti in zawt i. Ciafangin Joseph in, “Pathian in ngaih lo na har tu seh, i fapa.” ti in ti i. 30Ciafangin Joseph khai a rangin tlan i. Ziangmanti fangin a nau khiah ngai ze manin a kap hmun tuh sii i. Ciamanin ani khai a khan songah tlum ai kap i. 31A hmaihliam ben fangin ani khai suak leh ai amah veve sup ben fangin, “Rong suah tu hang ih.” ti in ti i. 32Ciafangin a hnenumte in Joseph khiah amah lek in rongsuah i. Cen a unaute khai amahte lekin rong ei i. Cen amah thawn rong ei tu Izip mite khai amahte lek in rong ei i. Ziangmanti fangin Izip mite heh Hebru mite thawn hmunkhat ai rong ei tuh ningdul i. 33Amahte in a unau tlaang khiah a upaber in a nautaber tian amahte tenia bang in Joseph hmai ah tauh i. Ciamanin anite khai ngaihsunur in sik dun tlaang i. 34Joseph cabuai vumai rong khiah amahte suah fangin Benjamin vo tu a dangte hnak in let nga tam in suah ruai i. Anite khai amah kawm in hiam ngai in ding le ei in um tlaang i.