Genesis 41

<<  GENESIS 41  >>

Pharaoh in mang man i

1Kum nih khim meng fangin Pharaoh in mang man i. Ani khai Nal (Nile) varkam ah lo ding le 2ciafangin cia runti songin a thau ngai kawlpaw nu pasarih suak ai hampa ei liang lo i. 3Ciahnua ah Nal runti songin a ro kengkeraw a dang kawlpaw nu pasarih khai suak ai a hmasa kawlpawte hiang varkam ah ding ve i. 4Ciale a ro kengkeraw kawlpaw te in a thau ngai kawlpawte khiah ei sek i. Ciafangin Pharaoh khai phawk lio i. 5Pharaoh khai mitmu leh thio le a panihhnak mang man leh thio i. Nimden kung pakhat songin a pha ngai nimden pu pasarih suak i.   6Amahte hnua ah a dang nimden pu pasarih suak ai ciate khiah nisuak hmunlam ai zuanghnak hlivua in kang ai a ro berawh in um i. 7Cia a ro berawh nimden pute in a pha ngai nimden pute khiah lem berh i. Ciafangin Pharaoh khai phawk ai a mang lo i ngawn i. 8Zing fangin Pharah khai thin hnaihnok ngai in um ai Izip ramai dawinaite le mifimte veksen kawi ruai i. Pharaoh in a mang rel fangin aisu in khai let thiam lo i. 9Ciafangin Pharroah hnenum upaber pa in a hnenah, “Tunnia fangin i khelhhnak hih sungso ing. 10Pharaoh khiah a hnenumte lakah thinraw awng fangin kaimah le pawnghmuk emtu pa khiah Pharaoh kiltu bawipa inn ah thawng kin hla awng i. 11Zan khat ah kin panih in mang man kawm ai kin mang khiah a dikbe nai veve i. 12Ciata ah Hebru tlangval niu um ai amah khiah Pharaoh kiltu bawipa hnenum i. Amah khiah kin mang rel le kin mang bangin a dikbe kin let sah i. 13A lethnak bangin kin mang khiah khim thiah i. Kai tu i per kel natuan i pe leh ai khia pa tu thing vumah tar ai rek lio i.” ti in rel i. 14Ciamanin Pharaoh in Joseph khiah kawih ruai ai Joseph khai thawng songin a rang ngai in kawih i. Ani khai a sam le a kahmulte met ai a thuam thleng ben fangin Pharaoh hnen ah kawi i. 15Ciafangin Pharaoh in Joseph hnenah, “Kaimah in mang man ai aisu in khai i let sah thiam lo i. Ikhalselai nang tu mi mang za fangin let sah thiam i ti in na za ing.” ti in ti i. 16Joseph in, “Kai in ler thiam lo ing. Ikhalselai Pathian in a nuam bangin Pharaoh khiah ling ruai tuh i.”ti in sawn i. 17Ciafangin Pharaoh in Joseph hnenah, “I mang in Nal runti varkam ah ding ing. 18Ciafangin runti songin a thau ngai kawlpaw nu pasarih khiah suak ai hampa ei in um leng lo i. 19Amahte hnua ah a rom kengkeraw le a     hmuhheh kul ngai kawlpaw nu pasarih khai suak ve i. Izip ramah ciabang hmuhheh kul kawlpaw hmu awng lo ing. 20Cia a ro keng hmuhheh kul    kawlpawte in a hmasa ai suakhnak a thau ngai kawlpaw te khiah ei berh i. 21 Ikhalselai amahte khiah ei ben fang rinin, aisu in khai a ei i ti in ling thil cuang lo i. A hlan ai bangin hmuhheh kul le a rom in um pah ngio i. 22Ciafangin i mang in nimden kung khat songin a pha ngai nimden pu pasarih suak khai hmu ing. 23Ciahnua ah a ro beraw le nisuak hmunlam ai hlivua ai kanghnak nimden pu pasarih khai suak ve ai 24cia a ro keng nimden pu te in a pha ngai nimden pu te khiah hlum berh i. He thu khiah dawinaite rel fangin aisu in khai i let sah thiam lo i.” ti in rel i.

25Ciafangin Joseph in Pharaoh hnenah, “Pharaoh mang panih khiah a bang vek i. Pathian in a bawn tumhnak khiah Pharaoh ling ruai i hang. 26Kawlpaw pasarih khiah kum sarih i. Cen a pha nimden pu sarih khai kum sarih i. Na mang a panih khiah pakhat i. 27A hnua ai hlenghnak a ro keng kawlpawte khiah kum  sarih i. Cen nisuak hmunlam ai hlivua ai kang hnak a mu nai lo nimden pu te khiah rian kum sarih i. 28Pharaoh, na rel ing: Hetih bangin Pathian in a bawn tumhnak khiah Pathian in Pharaoh hmuh i hang. 29Kum sarih songah Izip ramah zan tlung tuh i. 30Ciahnua ah kum sarih song rian tlung tuh i. Ciafangin Izip ramah zan tlung awng khiah hai tuh berh i. Rian in Izip ram hmuah rok tuh sio i. 31Cia rian khiah a sia rauh ngai in tlung tuh manin aisu in khai zan um awng khiah hih leh tuh lo i. 32Ciamanin Pharaoh mang khiah vel nih not in man i si. Ziangmanti fangin Pathian ai bawnhnak i manin zaicam lo ah khim tuh zual i. 33Ciamanin zai hmuahhmuah ling le a fim mi pakhat khiah Izip ram sik tu tuhin ril tu. 34Cen Pharaoh in Izip ram peng tuhin tlangsuakte dah tu selai  rong a zan ai um tengin Izip ram rong khiah hmun nga khan hmun khat khawm tu seh. 35Anite in cia zan tlung teng in rong hmuah hmuah khawm in khuapui caang ah khawl tu selai Pharoah kuthnia ah dah tu seh. 36Ciafangin kum sarih rian khiah Izip ramah tlung fangin Izip ram khiah rall tuh lo in he rong khiah Izip ram ca in khawi tu seh.” ti in rel i.

37Joseph relhnak thu khiah Pharaoh le a tlangsuakte in a pha i ti in lungkhim tlaang i. 38Ciamanin Pharaoh in a tlangsuakte khiah, “He pa bang Pathian Ciang Rauhla naitu a dang mi tawk thill tuh i lai sing?” ti in ti i. 39Ciafangin Pharoah in Joseph hnenah, “Pathian in hetih tluk in he hmuahhmuah na ling ruai i le nang bangin zai hmuahhmuah ling le a fim pakhat bang khai um lo i. 40Nangmah in i kumpibawi inn khiah i uk sah tuh i si. I minungte veksenin na thu na ngai tuh i. Kumpibawi tauhkheng lekin kaimah khiah na hnak in upa sawn i tuh ing.” ti in rel i. 41Ciafangin Pharaoh in Joseph hnenah, “Izip ram hmuah na hluai zo i hang ing.” ti in rel i. 42Ciafangin Pharaoh in a kutruk khiah hawk ai Joseph kut ah ruk ai thuam pha ngai thawn Joseph khiah thuam ai Joseph hawng ah sui khi orh i. 43A siphuh leng vumah nambat panih hnak bawi bangin to ruai ai mite in a hmai in, “Lam pial tuu-ih.” ti in au i. Ciatih bangin Izip ram pumpalah khiah Joseph hnenah hluai sio i. 44Ciafangin Pharaoh in Joseph hnenah, “Kaimah khiah Pharaoh ing. Ikhalselai na thu lo in Izip ram veksen songah aisu in a kut le a ke daang tuh lo i.” ti in rel i. 45Pharaoh in Joseph hming khiah Zaphenath-Paneah ti in bawn ai a nu tuhin On phungki Potifera fenu Asenat pe i. Joseph khai Izip ram hmuahhmuah ah khualsi i.

46Pharaoh kumpibawi natuan lut fangin Joseph khiah kum sawm thum i. Joseph khai Pharaoh hmai in suak ai Izip ram pumpalah ah khualsi i. 47Kum sarih song zan tlung teng fangin lo songin rong a dim lio in suak i. 48Joseph in kum sarih song Izip ramah zan tlung teng ai rong khawl ai khuapui caangah khawi i. Khuapui caang ah a cingkim in rong khiah cing ruai i. 49Joseph in rongte khiah tipui ai runsiat zah in a tam rauh in khawl ai a tamze manin a siar cawk lo ai cazin ah khai khum awl i.

50Rian tlung hlanah Joseph le On phungki Potifera fenu Asenat in fapa cawi kawm i. 51Joseph in a upa sawn khiah Manasseh ti in a hming bawn i. Ziangmanti fangin, “Pathian in i rimsu hmuahhmuah le i paate inn i hai ruai zo i.” ti in ti i. A panih fapa khiah Efraim ti in a hming bawn i. Ziangmanti fangin, “I tuarhmun ramah Pathian in i zaai ruai i.” ti in ti i.

53Izip ramah kum sarih song zan tlunghnak  bo i hang. 54Joseph relhnak bangin rian tlung pan i hang. Ram dang hmuah ah rian tlung napui ai Izip ram veksen songah tu rong um i. 55Izip  minungte in rian khiah tuar pan fangin  Pharoah  hnenah rong ngen i. Ciafangin Pharaoh in Izip mite hnenah, “Joseph hnenah kawi tu i lai a relhnak bangin bawn tuu-ih.” ti in rel i. 56Rian khiah Izip ram pumpalah ah hleng fangin Joseph in rongkhawl hmun kudam khiah hong ai Izip mite hnenah rong  zuar i. Ziangmanti fangin Izip ram pumpalah ah rian khiah sia rauh i. 57Ram caang in Joseph hnenin rong lai tuhin Izip ram ah hleng tlang i. Ziangmanti fangin laivum pumpalah ah rian sia rauh tlung i.

<<  GENESIS 41  >>