Ezra 8

<<  EZRA 8  >>

1He mite khiah Kumpibawipa Artazazi in uk teng in Babilon in kaimah thawn feh tu a pupate songai mi upate i. 2Phinehas fapate songin Kershom; Ithamar fapate songin Daniel; David fapate songin Hattush; 3Shekhaniah fapate songin, Parosh fapate songin Zekhariah; amah thawn hming khum pui pasal za le sawmnga um i. 4Pahath-Moab fapate songin Zerahiah fapa Elihoenai le pasal zanih um i. 5Shekhaniah fapate songin Ben-Jahaziel le pasal zathum; 6Adin fapate songin Jonathan fapa Ebed le pasal sawmnga; 7 Elam fapate songin Athaliah fapa Jeshaiah le pasal sawmsarih; 8Shephatiah fapate songin Mikhael fapa Zebadiah le pasal sawmriat; 9Joab fapate songin Jehiel fapa Obadiah le pasal zanih le hlairiat; 10Shelomith fapate songin Ben-Josiphiah le pasal za le sawmruk; 11 Bebai fapate songin Bebai fapa Zechariah le pasal kul hluanriat; 12Azkad fapate songin Hakkatan le pasal za le sawmkhat; 13A hnua taber Adonikam fapate songin Eliphelet, Jeiel le Shemaiah le pasal sawmruk; 14Cen Bikvai fapate songin khai Uthai le Zabbud le pasal sawmsarih te i.

15Amahte khiah kaimah in Ahava ah luangtu runpui hiang ah khawm ruai ai, ciata ah zan thum cam i ing. Minungte le phungkite lakah sik ai ciata ah Levi mi pakhat khai tawk lo ing. 16Ciafangin mi upate Eliezer, Ariel, Shemaiah, Elnathan, Jarib, Elnathan, Nathan, Zekhariah, le Meshullam te khiah ko ing. Cen mifimte Joiarib le Elnathan te khai ko ing. 17Amahte khiah Kasiphia ai umtu mi upa Iddo hnenah feh ruai ing. Amahte in Pathian inn ca in hnenumte kin kuat tuhin, Kasiphia ai umtu Iddo le a unau Nethinim te hnenah rel tuhhnak thu pe ing. 18Ciafangin Pathian bawmhnak in, Israel fapa, Levi fapa, Mahli fapate songin Sherebiah tihnak khiah a fapa le a unau pasal hlairiat le, 19Hashabiah le Mahli fapate song ai Jeshaiah le a unaute le a unaute fapate pasal kul le, 20Levi naper tuhin David ai dahhnak Nethinim te zanih le kul um i. Amahte hming bangin khum i.

21Ciafangin cia Ahava run ah kinmah veve khiah Pathian hmai ah thinniam in um tuhin le kinmah le kin fate le kin naihhnak hmuahhmuah thawn a khim niu in khualsi thill thai in Pathian ngen tuhin, rong-ul tuh in thuthan ing. 22Ziangmanti fangin lam lakah kin raalte hnenin kin khakber tu tuhin raalkapte le siphuh totute khiah kumpibawi pa hnenah ngen tuh khiah zak i thi i. Ziangmanti fangin kinmah in kumpibawipa hnenah, “Kin Pathian kut khiah a sii tu hmuah vumah um i. Ikhalselai amah zam tute vumah amah huthawm le thinraw hnak um i.” ti in rel awng i ing. 23Ciamanin kin khai he ca in kin Pathian hnenah ninghio kun ai kin sawngenhnak khiah kin ngai sah i.

24Ciafangin phungki upa hlainih te, Sherebiah, Hashabiah le a unaute sawmkhat te khiah a tumce in dah ai, 25amahte hnenah kumpibawipa le a tlangsuakte le a bawite le ciata ai umtu Israel mite veksen in Pathian inn ca ai hluhnak ngun le sui le thilrite khiah teh sah ing. 26Amahte hnenah i tehhnak khiah ngun talan zaruk le sawmnga, ngun thawn bawnhnak thilri a rit lamah talan zakhat, sui talan zakhat, 27sui thawn bawnhnak bel kul, drakma thawngkhat man, sui bang ai a mankhung ngai a not sa liang dar thawn bawnhnak bel panih te i. 28 Ciafang amahte hnenah, “Ningte khiah Pathian hmai ah ciang ning hlim i. Cen thilrite khai cianghlim ve i. Cen sui le ngunte khiah ning paate Bawipa Pathian hnenah a siang ngai ai hluhnak i. 29Jerusalem ai Bawipa inn songai khan songah, Jerusalem ai phungki upate le Levi mite le Israel phun lakai mi upate hmai ah ning teh leh hlan tian, a kung niu in kilkhawl tuu-ih.” ti in rel ing. 30Ciamanin Jerusalem ai kin Pathian inn ah kawih tuhin, phungkite le Levi te in cia ngun le sui le thilrite khiah saang i.

31Ciafangin Ahava run in kin khai Jerusalem ah feh tuhin hla hmasaber ni hlainih nia fangin suak i ing. Pathian kut khiah kin vumah um manin kin raalte le lamlak ai kin bawhtute kut songin kin o i. 32Ciamanin Jerusalem ah hleng ai ni thum um i ing.

33Ni li nia fangin, cia ngun le sui le thilrite khiah Pathian inn songah phungki Uriah fapa Meremoth kut in teh i. Amah thawn Phinehas fapa Eleazar um i. Cen amahte thawn Levi mite Jeshua fapa Jozabad le Binnui fapa Noadiah khai um i. 34Thilri veksen in siar ai teh sio le a veksenin cazin songah khum i. 35Raalte ai pom ai ram dang ah tlan ai Jerusalem ah let lehtu te fate in Israel Pathian hnenah mai thawn taihnak a hlu khiah, Israel mi veksen ca in kawlpaw cang hlainih, tu cang sawmkua leparuk, tufa niu sawmsarih le pasarih, sualhnak ca in hlu tuhin me cang hlainih hlu i. He khiah Bawipa hnenah mai thawn tai in hluhnak i.

36Cen kumpibawipa thu pehnak a ming khai Runpui ralkhat ramai kumpibawipa ca ai uktubawite hnenah pe i. Ciamanin amahte in Pathian inn le Israel minungte khiah bawm i.

<<  EZRA 8  >>

Recent Posts