Ezekiel 5

<<  EZEKIEL 5  >>

1Cen, nang mi fapa, lumettu pa vang bang a san ngai vang khiah lang tulai, na lu le na kahmul khiah met tu. Cen na samte teh tuh le khan tuhin zazute lang tu. 2Raalte in kulhhnak bo fangin, Jerusalem khua laiteng ah na sam hmun thum khan hmun khat khiah mai in tai tuh i si. Cen na sam hmun thum khan hmun khat khiah vangsau thawn khua kimvel ah sat tu dek. Cen hmun thum khan hmun khat tu hli lakah zaih tu. Amahte khiah vangsau thawn hnawh tuh ing. 3Cen na sam a tlawmniu khiah na angki par ah khih tu. 4Ciafangin cia sam a hrekkhatte khiah lang tulai mai lakah lon tulai mai in tai tu. Ciata in mai khiah Israel mite veksen hnenah feh tuh i.

5BAWIPA Pathian in, ‘He khiah Jerusalem i. Amah khiah ram dang mite laiteng ah dah ing. Cen ram dang hmuahhmuah in amah khiah a hiang cingkim ah um i. 6Amah in ram dang mite tahin tam sawn in sual ai i thukhanhnak khiah i tawng sah i. A hiang cingkim ai ram dang mite hnak in tam in i thukham khiah tawng i. Ziangmanti fangin amahte in i thukhanhnak khiah el ai i thukham khiah hlun nuam lo i.’ ti i. 7Ciamanin BAWIPA Pathian in, “Ning hiang cingkim ai ram dang mite tah tamin a tamngai in i thu i ngai lo ai, i thukham khiah hlun lo, cen i thukhanhnak khai hlun lo i si. Cen ning hiang cingkim ai ram mite thukhanhnak bang rinin nung lo i si. 7Ciamanin BAWIPA Pathian in, “Kaimah rori in ning tawng tuh ai ram dang mite mithmuh in ning cawh tuh ing. 9A ningdulkul ning bawnhnak veksen manin, i bawn awng lohnak khiah ning lakah bawn tuh ai ciabang khiah zaikom in khai bawn leh tuh lo ing. 10Ciamanin ning lakah paate in a fapate khiah ei tuhai, fapate in a paate khiah ei tuh i. Ningte khiah kaimah in ning cawh tuhai, a taanghnak te khiah hlivua lakah zaih tuh sio ing. 11Ciamanin BAWIPA Pathian in, ‘I nung song hmuah in, ningte in i temple khiah a hua kul thilrite thawn le ningdulkul thilri hmuahhmuah thawn riim ruai manin, ning tlawm ruai tuh ing. I mit in ning zah tuh lo ing. Ning khai ning hio tuh lo ing. 12Hmun thumkhan hmun khat khiah urhnak thawn ning thi tuhai, ning lakai rian thawn ning rall tuh i. Cen hmun thum khan hmun khat khiah ning hiang cingkim ai vangsau thawn ning thi tuh i. Cen hmun thum khan hmun khat khiah hlivua lakah ning zaih tuh ai amahte khiah vangsau thawn hnawh tuh ing. 13Ciatih bangin i thinrawhnak khiah hmang tuh ai, amahte vumah i rawhnak khiah tlok ruai tuh ing. Ciatih bangin i rawhnak khiah lawm tuh i. I rawhnak khiah amahte vumah hmang ben fangin, BAWIPA kaimah in i iksikhnak bangin pong zo khiah amahte in ling tuh i. 14Ciazolo ah ningte khiah ning hiang cingkim ai mite lakah le ning khel tu veksente hmai ah ning hnawm ruai tuhai, zauh ning suam ruai tuh ing. 15Ciamanin i thinraw in ning cawh ai thinraw ngai in ning hau fangin, cia khiah ning hiang cingkim ai mite hnenah, zauhsuamhnak, hnihciphnak, cukhnak le ngaihsun urkul cang tuh i. BAWIPA kaimah in rel zo ing. 16Rian khiah a laukul ngai le hnawmcan thai conkiang bangin ning hnawmcan tuhin i hlat fang in, ning vumah rian tam amam hleng ruai tuh ai ning rong hleng hmun khiah ning kham sah tuh lio ing. 17Ciamanin ning hnenah rian le ramsa te hleng ruai tuh ai, fa nai lo in ning dah tuh i. Urhnak le thihhnak khiah ning ramah hleng tuhai, ning tawng tuhin vangsau hleng ruai tuh ing. BAWIPA kaimah in rel zo ing.’ ti in rel i.” ti in i rel i.

<<  EZEKIEL 5  >>