1Cen, nang mi fapa in, Israel mualtlang hnen ah prawfet thu rel tu. Amahte hnenah, ‘Aw Israel mualtlang te, BAWIPA thu khiah ngai tuu-ih. 2BAWIPA Pathian in, “Na raalte in nangmah khiah, ‘Aha, hlanlai ai ram saang hmun khiah kin in ping lio i hang sing.’ti in rel i. 3Ciamanin hetih in prawfet thu rel tu: ‘ BAWIPA Pathian in, “Amahte in ningmah khiah zaikhai bek lo in ning dah ai, nuamhmun caang in ning sawh manin, ningte khiah ram dang mite in ning ping i. Ram dang mite in ning siat ai zauh ning suam i. 4Ciamanin aw Israel mualtlang te, BAWIPA Pathian thu khiah za tuu-ih. BAWIPA Pathian in mual le tlang le run le rawn zawllai te le zaikhai bek lo hmun le mite in zam manin a hiang cingkim ai ram dangte ai rokhnak le zauhsuam hnak khuapui te hnenah, 5BAWIPA Pathian in, “Mei bang ai kanghnak iksikhnak thawn ram dang mi hmuah le Edom veksen hnenah hau zo ing. Ziangmanti fangin amahte thin song in ang kong le hngal kong in i ram khiah amahte in ping ai a ram te khiah rok sah i. “ti in ti i. 6Ciamanin Israel thu ca ah prawfet thu rel in, mual le tlang le run le rawn zawllai te hnenah, ‘BAWIPA Pathian in, “Ningte khiah ram dang mite zauhsuam hnak ning tuar manin, iksikhnak le thinraw kong in thu suah zo ing.”ti in ti i. 7Ciamanin BAWIPA Pathian in, “Ning hiang cingkim ai ram dang mite in amahte zakthi hnak khiah tuar tuh ve i, ti in i kut tung in thukham ing.
8Ikhalselai ning, Israel mual te, ning kaakte khiah peem tuh ai i minung Israel mite ca in a thai nai tuh i si. Ziangmanti fangin amahte khiah tlung banghma i hang. 9Ziangmanti fangin kaimah khiah ningmah ca ing. Ningmah khiah ning sik tuh ing. Ningte khiah mite in ning vaai tuh ai ci ning cing tuh i. 10Ning vumah Israel mi veksen khiah zaai ruai tuh ing. Khua pui te khiah mite in hluh leh tuh ai a hnawm zo khuate khiah mite in sa leh tuh i. 11Ning vum ah minung le ramsa te zaai ruai tuh ing. Amahte khiah pung tuh ai fate nai tuh i. Kaimah in ningte khiah hlanlai bang in mi in ning hluh ruai tuh ing. Ning pan ngom ai tah in pha sawn in ning bawn tuh ing. Ciafangin kaimah khiah BAWIPA i, ti i ling tuh i si. 12Ning vumah i minung Israel mite vak ruai tuh ing. Amahte in ning ping tuh ai amahte rothil ning cang tuh i. Amahte fate khiah zaikom in khai ning hnenin ning lang sah tuh nawn lo i.”ti in ti i. 13BAWIPA Pathian in, “Amahte in ning hnenah, ‘Ningte in mite khiah ei manin ning miphun te in fate nai lo i.’ti in ning ti manin, 14ning te in mite khiah ei tuh lo ai, ning miphun te in khai fate nai lo in um tuh lo i.”ti in BAWIPA Pathian in rel i. 15Cen miphun dang te zauhsuam hnak khai ning za ruai tuh nawn lo ing. Mite hnihcip hnak khai tuar tuh nawn lo i si. Cen ning miphun te khai bah ruai tuh nawn lo ing.’ti in BAWIPA Pathian in ti i.”ti in i rel i.
16Ciazolo ah BAWIPA thu khiah i hnenah hleng leh thio i. 17BAWIPA in, “Mi fapa, Israel mite khiah amahte ram ah um teng fangin, amahte nundan le per dan in cia ram khiah riim ruai i. I hmai ah amahte nundan khiah nupang in hla caang in thi nai ai riim bang i. 18Ciamanin amahte in amahte ram songah thi luang ruai manin le cia ram khiah milim zuk thawn riim ruai manin, amahte vumah i thinraw khiah burh ing. 19Ciamanin amahte khiah miphun dangte hnenah tlan ruai ai ram dang caang ah hnawt ing. Amahte nundan le perhnak bangin cawh ing. 20Amahte khiah ram dang ah hleng fang in, cia mi te in, ‘He mite khiah BAWIPA minung te i. Ikhalselai amahte khiah BAWIPA ram in suak i.’ti in rel in a cianghlim i hming khiah zauhsuam i. 21Ikhalselai Israel mite in amahte feh hmun caang ah i hming khiah zauhsuam manin, i poisa i.
22Ciamanin Israel mite hnenah, ‘BAWIPA Pathian in, “Aw Israel mite, he khiah ning ca in ning bawt lo ing. Ikhalselai ning feh hmun caang ah ningte in i hming zauhsuam manin i hming ca in bawn ing. 23Ningte in ram dang mite lakah zauh ning suam hnak i hming lian ngai khiah cianghlim ruai tuh ing. Ningte in i hming khiah ram dang mite hmai ah cianghlim ruai fangin ram dang mite in kaimah khiah BAWIPA i, ti in i ling tuh i.”ti in BAWIPA Pathian in ti i. 24Ziangmanti fang in miphun dang te lak in le ram dang hmuahhmuah songin ning lang leh tuh ai ningmah ramah ning kawih leh tuh ing. 26Ciafangin ti fim thawn ning burh ngangkhaw ning ciang tuh i. Ning riimhnak hmuahhmuah le ning milim zuk te songin ning som tuh ing. 26Thinlung thar ning pe tuh ai ning songah rauhla thar dah tuh ing. Ning taksa song ai lungto thinlung khiah ning lang sah tuh ai, taksa thinlung ning pe tuh ing. 27Ning songah i Rauhla khiah dah ngangkhaw, ciafangin ningte in i thukham bang in ning vak ruai tuh ai, ningte in i thukhanhnakte bang in bawn in hlun tuh i si. 28Ciafangin kaimah in ning paate hnenah i pehnak ram songah um tuh i si. Ciafangin ningte khiah i minung ning cang tuh ai kaimah khiah ning Pathian i tuh ing. 29Ning riimhnak hmuahhmuah songin ning luat ruai tuh ing. Rongci te khiah po ruai ngangkhaw, zaai ruai tuh ing. Ning vumah rian tlung ruai tuh lo ing. 30Ning thingkung te in a ha ngai in thai ruai tuh ing. Ning lo te in rong zan ngai in suak tuh ai, ram dang mite lakah rian ning tuar manin zakthi kul khiah tuar tuh nawn lo i hang i si. 31Ciafangin a pha lo ning nundan le ning per hnak khiah hih leh tuhai, ning sualhnak le ningdulkul ning bawn awnghnak te manin ningmah veve khiah cim tuh i si. 32BAWIPA Pathian in, “He khiah ningmah man le ning ca in bawn lo ing. Cia khiah ling tuu-ih. Ning nundan manin zakthi le hmaisia in um tuu-ih, aw Israel mite!”ti in ti i.
33BAWIPA Pathian in, “Kaimah in ning sualhnak hmuahhmuah songin ning som nia ah, ning khua pui songah ning um ben thai in ning bawm tuh ing. A hnawmsa khuate khai sa leh tuh i. 34Zaikhai bek lo ai um awnghnak lo te khai a kheltu hmuahhmuah mit hmuh in mite in vai leh tuh i. 35Ciamanin amahte in, ‘Zaikhai bek lo ai um awnghnak he lo te khai Eden vuandum bang i hang. Zaikhai bek lo ai hnawmsio hnak khuate khai tun in a kho ngai in sa leh ai mite in hluh leh i.’ti in rel tuh i. 36Ciafangin a taang hnak ning hiang cingkim ai miphun dang te in BAWIPA kaimah in he khuate khiah sa leh ai zaikhai bek lo hmun te khiah bir leh i, ti khiah ling tuh i. BAWIPA kaimah ning rel zo ing. I relhnak bang in bawn tuh ing.”ti in ti i.
37BAWIPA Pathian in, “Israel mite in i ngenhnak bang in he khiah amahte ca ah bawt tuh ing. A minungte khiah tu te bang in zaai ruai tuh ing. 38Tu te khiah a cianghlim raithawihnak in hlu bang in le, Jerusalem ai puai nia ai tu te bang in a hnawmsio awng hnak khuate khai minung thawn dim tuh i. Ciafangin amahte in kaimah khiah BAWIPA i, ti in i ling tuh i.”ti in ti i.’ti in rel tu.”ti in i ruai i.