1Ciafangin BAWIPA thu khiah i hnenah hetih bangin hleng i. 2BAWIPA in, “Mi fapa, Israel mite tukhaltu te hnenah prawfet thu rel tu: ‘BAWIPA Pathian in tukhaltu te hnenah, “Amahte veve rongpaih ai um tu Israel mite tukhaltu te hnenah rimsuhnak um tu seh. Tukhaltu te in a tu te khiah rongpaih tuh lo im? 3Ningte in a thau khiah ei ai, tuhmul khiah sil i si. A thau berber tu te khiah rek i si. Inapui ai tu te tu rongpaih lo i si. 4Thaunau te khiah thahat ruai lo i si. A ur te khiah bawl lo i si. A ruh ek te khiah pen sah lo i si. A hnawthnak tute khiah tlun leh lo i si. A pai mi tu te khiah sii lo i si. Ikhalselai amahte khiah rimsu ngai le riahsia ngai in uk i si. 5Ciamanin amahte khiah khaltu nai lo manin, nuamhmun caang ah piak sio i. Amahte khiah piak sio fangin amahte khiah lo lai ai ramsa veksen te rong ah cang i. 6I tu te khiah mual vum caang ah le tlang saang vum caang ah vai i. I tu te khiah laivum pumpalah ah piak sio ai aisu in khai amahte khiah sii khai sii lo, zong khai zong lo i.”ti in ti i.
7Ciamanin tukhaltu ningte in, BAWIPA thu khiah ngai tuu-ih. 8BAWIPA Pathian in, “I nung song hmuah in, i tu te khiah ramsa ai dawp tuhin le lo lai ai ramsa te rong cang manin le, tukhal tu te um lo manin le, i tukhaltu te in i tu te khiah sii lo ai amahte veve lek rongpaih ai i tu te khiah rongpaih lo manin, 9Aw tukhal tute, BAWIPA thu khiah za tuu-ih. 10BAWIPA Pathian in, “Tukhaltu te lakah i raw i. Amahte khiah i tu te rul ruai tuh ing. I tu te khiah amahte in rongpaih awl ruai tuh ing. Tukhal tu te in amahte veve lek rongpaih tuh lo i hang. Ziangmanti fangin i tu te khiah amahte kaa songin sut tuh ing. Amahte rong ah cang tuh nawn lo i hang.”ti in ti i.
11Ziangmanti fangin BAWIPA Pathian in, “Kaimah rori in i tu te khiah zong in sii tuh ing. 12A tu te khiah piak sio nia ah tukhal pa in a tu khiah sii bang in, khua niim le khua thim nia ah i tu te khiah kaimah in sii ngangkhaw, amahte piak hmun caangcaang in amahte khiah khawm leh tuh ing. 13Amahte khiah mi phun lak le mi ram caang in suah ngangkhaw, amahte ramah tlun leh tuh ing. Amahte khiah Israel mualtlang vumah le rawn zawllai ah le mi umhmun caang ah rongpaih tuh ing. 14Amahte khiah hampa hing umhmun ah rongpaih tuh ing. Amahte khiah Israel mualtlang vumah leng tuh i. Amahte khiah Israel mualtlang vumah bual in hampa hing khiah ei tuh i. 15Kaimah in i tu te khiah rongpaih tuh ai amahte khiah bual ruai tuh ing. 16Kaimah in a pai tu te khiah sii tuh ai a hnawthnak tu te khiah kawih leh tuh ing. A ruh ek te khiah pen sah tuh ing. A ur te khiah cak ruai tuh ing. Ikhalselai a thau le a thahat te khiah hnawmcan tuh ing. I tu te khiah a hman ngai in thukhan sah tuh ing. ”ti in BAWIPA Pathian in rel i.
17BAWIPA Pathian in, ‘ning i tu te khiah, tu pakhat le pakhat lakah thukhan sah tuh ing. Tu cang le me te khai thukhan sah tuh ing. 18Ningte in ham hing hmuah ei sio ai a tanghnak hampa khiah ning ke ai tlawh heh thucik niu in nam i sim? Cen ti fim khiah ding ben fangin ning ke thawn ti khiah hu ruai khiah thucik niu in nam i sim? 19I tu te in ning ke ai tlawh hnak hampa khiah ei ai, ning ke thawn hu ruai hnak ti khiah ding i.
20Ciamanin BAWIPA Pathian in amahte hnenah, “Kaimah rori in a thau le a ro keng tu te khiah thukhan sah tuh ing. 21Ningte in a tha nai lo te khiah ning zaang le ning kodar thawn tet ai ning ki thawn khi i si. 22Ciamanin i tu te khiah kaimah in o tuh ai ningte in amahte khiah dawp tuh nawn lo i hang i si. Tu pakhat le pakhat khiah a thukhan sah tuh ing. 23I hnenum David khiah i tu khaltu tuh in dah ngangkhaw, amah in i tu te khiah rongpaih tuh i. 24Ciafangin kaimah khiah amahte Pathian cang tuhai, i hnenum David khiah amahte bawi cang tuh i. BAWIPA, kaimah in rel zo ing. 25Amahte thawn remhnak thukham bawn tuh ing. Ramsa te khiah cia ram in pai ruai tuh ing. Ciafangin amahte khiah nelrawn songah le tu songah a muang niu in mitmu tuh i. 26Amahte le i mualtlang cingkim ai ramte khiah hmuifu bur tuh ing. A cu bang in ruahsar sii ruai tuh ing. Ciafangin hmuifu khiah ruahsar bang in sii tuh i. 27Ciafangin lo lai ai thing te in a thai thai tuh ai laipua songin rong tam ngai po tuh i. Amahte khiah amahte ramah a muang in um tuh i. Kaimah in amahte khiah amahte ceng ai hmang tu te kut songin i suah fangin le amahte phurhnak hak ri khiah i cem sah fangin, amahte in kaimah khiah BAWIPA i, ti i ling tuh i. 28Ciafangin amahte khiah ram dang mite in dawp tuh lo ai, amahte ram ai ramsa in khai kai tuh lo i. Ikhalselai amahte khiah a muang niu in um tuh ai aisu in khai lau ruai ben tuh lo i. 29Amahte ca in a hming thang vuandum bawt tuh ing. Ciafangin cia ramah amahte khiah rikam tuh nawn lo i. Cen Zental mite ai zauhsuam hnak khai tuar tuh lo i. 30Ciatih bangin amahte in amahte Pathian BAWIPA khiah amahte thawn um ai Israel mite khiah i minung te i, ti ling tuh i.”ti in BAWIPA Pathian in rel i. 31“Ningte khiah i tu, i vuandum song ai i tu, i minung i si. Kaimah khiah ning Pathian ing.”ti in BAWIPA Pathian in rel i.