Ezekiel 32

<<  EZEKIEL 32  >>

1Kum hlainih kum, hla hlainih hnak ni khat nia ah BAWIPA thu khiah i hnenah hleng i. 2BAWIPA in: “Mi fapa, Izip kumpibawipa Pharaoh kahhnak la khiah sa tulai a hnenah:

   ‘Nangmah khiah mi hmuahhmuah lak ah
chintit niu bang i si.
Cen nangmah khai tipui songai
ramsa pui bang i si.
Na runti te songah leuh zutzo ai
na ke thawn ti te khiah phau i si.
Ciatih in ti khiah riim ruai i si.’ti in rel tu.

3  “BAWIPA Pathian in:
‘Ciamanin mi tam ngai thawn
na vum ah sur vorh tuh ing.
Amahte in i sur songah na duk tuh i.

4  Ciafangin nangmah khiah lai ro vumah na zam tuh ing.
Lo lakah na lon tuh ing.
Van ai vaniu hmuahhmuah khiah
na vumah khop ruai tuh ing.
Laivum ai ramsa hmuahhmuah nangmah
thawn thimang in rongkham ruai tuh ing.

5  Na sa khiah mualvum caang ah pho tuh ing.
Na vuitum thawn rawn caang khiah dim ruai tuh ing.

6  Na thi thawn laipua khiah mual vum tian in burh tuh ing.
Rawn te khiah na sa thawn dim ruai tuh ing.

7  Na khuavar khiah i thim ruai fangin,
Vancung te khiah khuk tuh ai,
a arsite khai thim ruai tuh ing.
Ni khiah mairo thawn khuk tuh ing.
Hla khai var tuh lo i.

8  Vancung ai khuavar hmuahhmuah khiah
na vumah thim ruai tuh ing.
Na ram vumah khuathim ruai tuh ing.’
ti in BAWIPA Pathian in rel i.

9  Na ling awng lo ram caangcaang ah
na hnawmhnak khiah i hleng ruai fangin
mi phun tam ngai khiah lau ruai tuh ing.

10 Mi phun tam ngai khiah na lakah ngaihsun ur ruai tuh ing.
Amahte hmai ah i vangsau khiah i leuh
fangin, nangmah manin amahte
kumpibawite khiah thinlau in um tuh i.
Na tlok nia ah amahte khiah
a nun song hmuah thinlau in um tuh i.

11Ziangmanti fangin BAWIPA Pathian in: ‘Babilon kumpibawipa vangsau khiah hleng tuh i. 12Raalpha ber le mi phun hmuahhmuah lakai a riahsia ber te vangsau thawn na minungte khiah thi ruai tuh ing. Amahte in Izip hngalhnak khiah khoi ruai tuh berh ai a mi runpui khiah rek tuh sio i.

13 Cen a runti hiang ai a ramsate khai
a veksenin rek sah tuh i.
Minung ke le ramsa ke in cia ti te khiah
hu ruai tuh nawn lo i.

14 Ciafangin amahte ti khiah fim ruai tuh ing.
Amahte runti khiah thau bang in luang ruai tuh ing.’
ti in BAWIPA Pathian in ti i.

15 Kaimah in Izip ram khiah zaikhai bek lo
in hnawmcan fangin le Izip ram khiah a dim ai
um awnghnak te khiah bo sio fangin,
Izip ram ai umtute khiah i rek fangin,
Ciafangin amahte in kaimah khiah BAWIPA i, ti ling tuh i.

16 He khiah amahte in Izip kah tuhhnak kah la i.
Mi phun hmuahhmuah in amah khiah kah tuh i.
Amahte in Izip le a minungte khiah kah tuh i.’
ti in BAWIPA Pathian in ti i.” ti in i rel i.

17 Kum hlainih kum, hla hlainih hnak ni hlainga nia ah
BAWIPA thu khiah i hnenah hleng i.

18 BAWIPA in: “Mi fapa, Izip mi runpui ca in kap tu.
Amahte khiah amah le a hming thang mi phun te kawm in,
Kua thuk songai lut tu te kawmin, laipua songah lon tu.

19 Amahte hnenah, ‘Aisu kan in na mawi pa?
Zu tulai, vunpar cem lo te lakah na zau tu seh.’ti in rel tu.

20 Amahte khiah vangsau thawn rekhnak mite lakah tlu tuh i.
Izip khiah vangsau thawn rek tuh i.
Amah thawn a mi runpuite khiah phur tu sio seh.

21 Hlan songin bawite in Izip le amah thawn ai tangkhat tute khiah,
‘Amahte khiah zu ai,
vunpar cem lo tu vangsau ai rekhnak mite
thawn tal khat i.’ti in ti i.

22 Khiata ah Assiria le a raalkapte um i.
A hiang cingkim ah vangsau thawn rek ai
thi hnak te hlan um i.

23 Amahte hlan khiah Kua thuk ngai songah dah i.
A raalkapte khiah a hlan hiang cingkim ah um i.
A nung mite um hmun ramah thinlau ruaitu
mite khiah vangsau in rek ai thi sio i.

24 A hlan cingkim ah Elam le a minungte um i.
Amahte khiah a veksenin vangsau in rek i.
A nung mite um hmun ramah thinlau ruaitu
mite khiah laipua songah vunpar cem lo pah in lut i.
Amahte in Kua thuk songah lut tu te kawmin,
amahte zakthihnak khiah tuar i.

25 Amah khuahluan khiah
a rekhnak mite laiteng ah bawt sah i.
amah hlan hiang cingkim ah
a mirunpui veksen khai dah i.
A veksen in vunpar cem lo ai vangsau thawn rekhnak i.
Amahte in a nung mite ramah
thinlau kul khiah suak ruai manin,
amahte in Kua thuk songah lut tu
mite kawmin zakthihnak tuar i.
Amahte khiah a rekhnak mite lakah zau i.

26 Khiata ah Meshek le Tubal le
a mirunpui a veksen in um i.
A hiang cingkim ah amahte hlan um i.
Amahte khiah a veksenin vunpar cem lo ai
vangsau thawn rekhnak i.
Amahte in a nung mite ramah thinlau kul khiah hleng ruai i.

27 Amahte khiah raaltawnghnak thilri
kawmin hlan songah lut ai amahte vangsau
khiah amahte lu hnia ah dah tu vunpar
cem lo raalbawite thawn zau khat lo i.
Ikhalselai he raalbawite in
a nung mite ramah thinlau kul hleng ruai manin,
Amahte sualhnak khiah amahte ruh vumah um tuh i.

28 Nangmah khiah vunpar cem lo mite
laiteng ah na ek tuh i.
Vangsau thawn rekhnak mite thawn zau khat tuh i si.

29 Cen khiata ah Edom um i.
A kumpibawite le a bawite khiah
a veksenin bawi bik napui ai,
Vangsau ai rekhnak mite hiang ah zau tuh i.
Amahte khiah vunpar cemlo mite le
Kua thuk songah lut tu te kawmin zau tuh i.

30 Saklam ai bawite a veksen le
Sidon mite a veksen khiah,
Amahte in thinlau kul hleng ruai napui ai,
Zakthi kul in a rekhnak mite kawm in thi tuh i.
Amahte khiah vunpar cem lo pahin
vangsau thawn rekhnak mite thawn zau khat tuh i.
Kua thuk songai lut tute kawm in
zakthi hnak tuar tuh i.

31 Pharaoh le a raalkapte in vangsau thawn
rekhnak amahte khiah hmu tuh ai,
thin nuam tuh i.” ti in BAWIPA Pathian in rel i.

32 “Ziangmanti fangin a nung mite ramah
thinlauhnak hleng ruai zo ing.
Pharaoh le a raalkapte khiah
vangsau thawn rek hnak mite vunpar cem lo
mite lakah amah khiah dah tuh i.”
ti in BAWIPA Pathian in rel i.

<<  EZEKIEL 32  >>