Ezekiel 29

<<  EZEKIEL 29  >>

1Kum ha kum, hla ha hla ni hlainih nia ah BAWIPA thu khiah i hnenah hleng i. 2BAWIPA in, “Mi fapa, na hmai khiah Izip kumpibawi Pharaoh hnen lamah hoi tulai, amah le Izip mi veksen te hnenah prawfet thu rel tu. 3Amahte hnenah, ‘BAWIPA Pathian in:

   “Sik tu, na lakah i raw i.
aw Pharaoh, Izip kumpibawipa,
Nangmah khiah a runpui songai umtu
tisartam pui bang i si.
Cen nangmah in runpui khiah,
‘Kaimah Run pui i.
Kaimah ca tuh ai bawn ing.’ti i si.

4  Na dang ah thir huk thawn na dawt tuh ing.
Na runti songai nga te khiah
na phaw song ah bek ruai tuh ing.
Na runpui ti songin na suah tuh lio ing.
Ciafangin na run ti song ai nga hmuah
khiah na phaw songah bek tuh sio i.

5  Na run ti songai nga a veksen kawmin
Nelrawn songah na hlum tuh ing.
Lo lakah na tlu tuh ai
aisu in khai na khul le na khawm tuh lo i.
Lo lakai ramsa te le van vumai vaniute
rong tuhin na dah zo ing.

6  Ciafangin Izip ramai umtu hmuah in
Kaimah khiah BAWIPA i, ti ling tuh i.
Ziangmanti fangin nangmah khiah Israel
mite ca ah phai kung bang teng i si.

7  Amahte in a kut in na awh fangin,
Na ek lio ai amahte kodar khiah ek ruai sek i si.
Amahte in na hngai fangin,
na ek ai amahte el khiah hlin ruai i si.”
ti in ti i.

8Ciamanin BAWIPA Pathian in: “Ciamanin na hnenah vangsau kawih ngangkhaw, na hnenin minung le ramsate khiah rek tuh sio ing. 9Ciafangin Izip ram khiah aisu khai bek lo in hnawm tuh i. Ciafangin amahte in kaimah khiah BAWIPA i, ti ling tuh i. Ziangmanti fangin amah in, ‘Runpui khiah kaimah ai i. Kaimah ai bawnhnak i.’ti i. 10Ciamanin nangmah le na run ti lakah i raw i. Ciamanin Izip ram khiah Mikdol ai panin Syene tian, Ethiopia ramri tianin hnawmcan in zaikhai bek lo in dah tuh ing. 11Cia ram song in minung ke le ramsa khiah vak tuh lo ai kum sawmli song aisu khai cia ramah um tuh lo i. 12Izip ram khiah zaikhai bek lo ai hnawmhnak ram dang te bang in zaikhai bek lo in hnawm ruai tuh ing. Cen a khuapuite khai kum sawmli song a hnawmsa a dang khuapuite bangin hnawmcan tuh ing. Cen Izip minungte khai ram dang ah vai ruai tuh ing.

13Ikhalselai BAWIPA Pathian in: “Kum sawmli bo fang in Izip mite khiah i vai ruai hmun ram caang in khawm leh tuh ing. 14Raalte ai pomhnak Izip mite khiah amahte suak hmun ram Pathros ah tlung ruai leh tuh ing. Ciafangin amahte khiah a niam niu kumpibawi ram cang tuh i. 15Amahte khiah kumpibawi ram hmuahhmuah lakah a cikber ram cang tuh i. Mi ram dang te vumah a hngal in um tuh lo i. Ziangmanti fangin kaimah in amahte khiah nau ruai tuh ai amahte in aisu ram khai uk tuh nawn lo i hang. 16Ciafangin amahte khiah Israel mite in rinsan tuh nawn lo ai Israel mite in Izip mite cung tum fangin amahte sualhnak khiah hih tuh i. Ciafangin amahte in kaimah khiah BAWIPA Pathian i, ti ling tuh i.”ti i.’ti in rel tu.”ti in i rel i.

17Kum hluansarih kum hla hmasa ber ni khat nia ah BAWIPA thu khiah i hnenah hleng i. 18BAWIPA in: “Mi fapa, Babilon kumpibawi Nebukhadnezzar in a raalkapte khiah simawti in Tyre tawng ruai i. Aisu hmuah lu khiah kolh ruai ai aisu kodar hmuah khiah ur ruai i. Ikhalselai amah le a raalkap te in amahte hlawhthap khiah Tyre hnenin ngah lo i. 19Ciamanin BAWIPA Pathian in: ‘Izip ram khiah Babilon kumpibawi Nebukhadnezzar hnen ah pe tuh ing. Amah in Izip mite naihhnak thilri khiah lang sah tuh i. Izip mite khiah rok sah tuh ai cia khiah a raalkap te hlawhtham in hmang tuh i. 20Izip ram khiah a hlawhtham ca in pe zo ing. Ziangmanti fangin amahte in kaimah ca in naper zo i.’ti in BAWIPA Pathian in ti i.

21Cia nia ah Israel mite ki khiah po ruai tuh ing. Cen amahte hmaiah pong thai in na ka na hong sah tuh ing. Ciafangin amahte in kaimah khiah BAWIPA i, ti ling tuh i.”ti in i rel i.

<<  EZEKIEL 29  >>