Ezekiel 26

<<  EZEKIEL 26  >>

1Kum hlaikhat hnak cia hla ni khat nia ah BAWIPA thu khiah i hnenah hleng i. 2BAWIPA in, “Mi fapa, Tyre in Jerusalem lakah, ‘Aha, mi phun hmuahhmuah lut hmun kawldawngkham khiah khoi lio ai dawng i hon lio i hang. Amah khiah hnawm lio man hang in, kaimah khiah i lian tuh i.’ti in ang manin, 3BAWIPA Pathian in, ‘Aw Tyre, na lakah i raw i. Ciamanin tipui in tihual khiah tho ruai bangin, na tawng tuhin mi phun tam ngai hleng ruai tuh ing. 4Amahte in Tyre renhnak khan khiah bal sah tuh ai a ralvil hmun inn sang ngai ngai te khiah hnawmcan sah tuh i. Cen kaimah in a laivut khiah phiak sah tuhai amahte khiah lungpui bangin cang tuh i. 5Amah khiah tipui laiteng ah sur pho hmun cang tuh i. Kaimah in rel zo ing. I relhnak bangin khim tuh i. 6Cen lo lai ai a khua cik niuniu te khai vangsau thawn rek tuh i. Ciafangin amahte in kaimah khiah BAWIPA i, ti ling tuh i.’ti in BAWIPA Pathian in ti i.

7Ziangmanti fangin BAWIPA Pathian in, ‘Sik tu, Saklam in Tyre tawng tuhin kumpibawi hmuah hmuah ai kumpibawi, Babilon kumpibawi Nebukhadnezzar khiah siphuh le siphuh leng le siphuh to tu mite le raalkap mi tamngai kawmin kawih tuh ing. 8Nebukadnezzar in na lo lai ai na khua cik niuniu te khiah vangsau thawn rek tuh i. Na tawng tuh in le na taik hmun tuhin laipua khiah pum in khan khiah tiang tuh i. 9Amah in na renhnak khan khiah thingtum thawn sawh in khoi ruai tuh ai na ralvil hmun inn sang ngaingai te khai a haihpui thawn cek tuh i. 10A siphuh khiah tam ze manin amahte laikhu in na khuk tuh i. Siphuh to tu le kawlpaw leng le siphuh leng khiah amah thawn na kawldawngkham ah tlum fangin, a renhnak khan khiah bal ai khua songah lut tu mite pauhnak bangin, na renhnak na khan khiah hlin ruai tuh i. 11Amah siphuhte ke thawn na lamceh khiah na fon sah tuh i. Amah in na minungte khiah vangsau thawn rek tuh ai, a kho ngai na khuamte khiah laipua ah tlu tuh i. 12Amahte in na sumsaw khiah na rok sah tuh ai na thilri khiah na long sah tuh i. Amahte in na khan tianghnak khiah na bal sah tuhai a mawi ngai ngai ning innte khiah ning hnawm sah tuh i. Ning lungto, ning luangkiangte ning laipuate khiah ti lakah ning lon sah tuh i. 13Ning lasa hnak aw khiah com ruai tuh ing. Ning congcing tumhnak aw khai za tuh nawn lo i si. 14Lungto pui bang in na cang ruai tuh ing. Sur pho hmun ah na cang tuhai aisu in khai na sa leh tuh nawn lo i. Ziangmanti fangin BAWIPA kaimah in rel zo ing,’ti in BAWIPA Pathian in rel i.

15BAWIPA Pathian in Tyre hnenah, ‘Nangmah khiah na tlu ai a urte in kap ai na lakah mite khiah rek fangin, cia aw in tipui tlangte khiah hlin tuh lo im? 16Ciafangin tipui ai bawite hmuahhmuah khiah amahte kumpibawi tauhkheng vumin tho tuh ai amahte thuam le a mawi ngai ai cawihhnak angkite khiah hawk tuhai, thing biakbo in um tuh i. Amahte khiah laipua vumah to tuhai, a catlo in thing biakbo in um tuh ai, na lakah ngaihsun ur in um tuh i. 17Ciafangin amahte in kahhnak la na sak tuhai:
“Akontih ai na rall lio i.
Tipui vumah khualsi tute um hmun khua.
Aw a hming thang khua.
Amah le a songai umtu mite khiah
Tipui vumah aisu in khai neh lo i.
Amahte in a minungte khiah lau ruai rauh i.

18 Na tlok nia ah tipui tlang te khiah thing biakbo in um i.
Na pai nia ah tipui hiang ai ramte khiah
thincawl ngai i.”ti in ti tuh i.

19Ziangmanti fangin BAWIPA Pathian in, ‘Nangmah khiah aisu in khai hluh lohnak khuapuite bangin, aisu khai bek lo khua ah na cang ruai fangin le tipui in na cum fangin, 20Nangmah khiah hlanlai ai mite bangin kua thuk ngai songah zu tute kawmin na zuk tuh ai laihnia a niam ber letlo hmun hlanlai ai panin zaikhai um lo hmunah, Kua thuk ngai songah lut tute kawmin na um ruai tuh ing. Ciafangin aisu in khai na songah khuato tuh nawn lo ai, a nungte umhmun ram ah thangphathnak haih tuh ing. 21Nangmah khiah a dam kul in na dah tuh ai, na pai tuh i. Na sii tuh napui ai na tawk tuh nawn lo i hang,’ti in BAWIPA Pathian in ti i.”ti in rel i.

<<  EZEKIEL 26  >>