1Kum sarih kum hla nga hla ni ha nia fangin Israel mi upa hrekkhat khiah BAWIPA thuzawt tuh in kawi ai i hmai ah to i. 2Ciafangin BAWIPA thu khiah i hnenah hleng ai, 3BAWIPA in, “Mi fapa, Israel mi upate hnenah, ‘Thuzawt tuhin i hnenah kawi i sim? BAWIPA Pathian in, “I nung songah, ningte in thu i zawt tuh lo i si.”ti in ti i.’ti in rel tu. 4Amahte khiah thukhan sah nga sim, mi fapa? Amahte khiah thukhan sah nga sim? Ilekhaw a paate ai ningdulkul bawnhnakte khiah rel tu.
5Amahte hnenah, ‘BAWIPA Pathian in, “Israel mite in kaimah khiah i ling tuhin Izip ramah i ril nia ah, Zakuk tesin fate hmai ah i kut tung in thukham ai, ‘Kaimah khiah BAWIPA ning Pathian ing.’ ti in rel ing. 6Cia nia ah amah te hmai ah i kut tung ai, amahte khiah Izip ram in suah tuh ai ram hmuah hmuah lakah a pha ber let lo ram le cawhnawi le khoitilu luang hmun ram, kaimah ai sii sahhnak ramah kawih tuh in thukham ing. 7Ciafangin amahte hnenah, ‘Ning mit hmai ai a ningdulkulte khiah ning veksen in lon tu sio i lai, Izip ramai milim zuk thawn ningmah veve khiah rim ruai mah ih. Kaimah khiah BAWIPA ning Pathian ing.’ti in rel ing. 8Ikhalselai amahte in i tawng ai i thu i ngai lo i. Amahte mit hmai ai a ningdulkulte khiah lon lo ai Izip ramai milim zukte khai zam lo i. Ciafangin kai in, ‘Izip ram songah amahte vumah i thinraw hnak khiah burh in i thinrawhnak khiah khim ruai tuh ing.’ti in ti ing. 9Ikhalselai i hming khiah Israel mite thawn umtute Zental mite hmai ah sia lohnak tuhin i hming ca in bawn ing. Ziangmanti fangin cia Zental mite hmuh in Israel mite khiah kaimah in Izip ramin suah tuh in kaimah veve khiah amahte hnenah ling ruai zo ing.
10Ciamanin amahte khiah Izip ramin suak ruai ai, nelrawn songah kawih ing. 11Amahte hnenah i thukham khiah pe ai i thukhanhnak te khai hmuh ing. Ciate hlun tu pa in ciate thawn nung tuh i. 12Cia zolo ah amahte in kaimah khiah amahte cianghlim ruaitu BAWIPA i ti ling thill thai in kaimah le amahte lakah hnikhnaihhnak tuhin i Sabbath khai pe ing. 13Ikhalselai Israel mite in nelrawn songah i tawng i. I thukham khiah hlun lo i. I thukhanhnak khiah hlun tu pa in ciate thawn nung tuh i. Ikhalselai amahte in i thukhanhnak khiah nautat i. I Sabbath khai nautat rauh i. Ciafangin nelrawn songah amahte hnawmcan tuhin i thinrawhnak khiah amahte vumah burh tuh ing, ti in ti ing. 14Ikhalselai i hming khiah Israel mite thawn umtute Zental mite hmai ah sia lo hnak tuh in i hming ca in bawn ing. Ziangmanti fangin cia Zental mite hmuh in Israel mite khiah suah ing. 15Ciamanin amahte hmai ah i kut tung ai, amahte khiah amahte hnenah i pehnak ram hmuahhmuah lakah a pha ber let lo ram le cawhnawi le khoitilu luang hmun ramah kawih tuh lo ing ti in thukham ing. 16Ziangmanti fangin amahte in i thukhanhnak khiah nautat ai i thukham khiah hlun lo ai i Sabbath khai rim ruai i. Cen amahte thinlung thawn amahte milim zuk khiah hlun i. 17Ikhalselai amahte khiah rek tuh lo in i mit in zah i. Ciamanin amahte khiah nelrawn songah rek sio lo ing.
18Ikhalselai nelrawn songah a fate hnenah, Ning paa te thukham khiah hlun mah ih. Amahte thukhanhnak khai ul mah ih. Cen amahte milim zuk thawn ningmah khai rim ruai mah ih. 19Kaimah khiah BAWIPA ning Pathian ing. I thukham khiah hlun tuu-ih. I thukhanhnak khiah ul in per tuu-ih. 20Ning te in kaimah khiah BAWIPA ning Pathian i ti ning ling thill thai in i Sabbath khiah cianghlim ruai tuu-ih. Cia Sabbath khiah kaimah le ningte lakah hnikhnaihhnak i.’ti in rel ing. 21Ikhalselai a fate in i tawng ai i thukham khiah hlun lo i. I thukhanhnakte khai hlun nuam lo i. Ciate hlun tu pa in ciate thawn nung tuh i. Ikhalselai amahte in i Sabbath khiah zul lo i. Ciafangin kai in, ‘Nelrawn songah amahte vumah i thinrawhnak khiah burh in i thinrawhnak khiah khim ruai tuh ing.’ti in ti ing. 22Ikhalselai Israel mite khiah Zental mite mit hmuh in suah awng manin i hming khiah Zental mite hmai ah sia lohnak tuhin i hming ca in bawn ai i kut khiah ton ruai leh ing. 23Cen amahte khiah Zental mite lakah peu ruai tuh sio ai mi ram dang caang ah vai ruai tuh ing ti in nelrawn songah i kut tung in thukham ing. 24Ziangmanti fangin amahte in i thukhanhnak bangin bawn lo ai i upadi dante khiah nautat ai i Sabbath te khiah zul lo i. Cen amah te mit in khai a paate milim zuk ian sik meng i. 25Ciamanin amahte khiah a pha lo upadi dan le amahte in hlun thill lo thukhanhnak hnenah zam lio ing. 26Amahte in a fapate khiah mai songah hlu manin amahte khiah a ciang lo i ti in ti ing. Ciamanin amahte khiah rimsu thimang in dah tuh ing. Ciafangin amahte in kaimah khiah BAWIPA i ti ling tuh i.”ti in ti i.
27Ciamanin, mi fapa, Israel mite hnenah, ‘BAWIPA Pathian in, “He thu ah ning paa te in khai kaimah khiah i zam in zauh i suam ve i. 28Ziangmanti fangin, amahte pe tuhin i kut tung in i khamhnak ram songah amahte khiah i kawih fangin, amahte in mual tlang saangte le thing tamngai khiah hmu fangin, ciata ah amahte in raithawi ai amahte hlu hnak thawn thin i tok ruai i. Ciata ah amahte in a rimhmui khiah kawih ai a ding tuh a hlu khai burh i. 29Ciafangin kai in, ‘Ning feh hmun he a saang hmun khiah ziang i pa?’ ti in amahte khiah zawt ing. Ciamanin tunnia tianin a hming khiah Bamah ti in ko i.”ti in rel tu.’i ti i. 30Ciamanin Israel mite hnenah, ‘BAWIPA Pathian in, “Ning paa te bangin ningmah veve khiah rim ruai i sim? Amahte ningkulhnak bangin phatemah khiah per i sim? 31Ziangmanti fangin ning fapate khiah mai song ah hlu fangin, tunnia tian in ning milim zuk thawn ningmah veve rim ruai i si. Ciamanin, ning Israel mite in thu i zong tum i sim? I nung song hmuah in,”BAWIPA Pathian in ti i, “ningte in i hnenah thu i zong tuh lo i si. 32Ram dang ai mite Zental mite bangin thing le lungto bia tuh i ing.’ti in ning thin songin ruathnak bangin khim tuh lo i.
33BAWIPA Pathian in, “I nung song hmuah in, huthawm lianpui le thinrawhnak ning burh kong in ning uk tuh ing. 34Mi dangte lakin le ning vaihmun ram dang caang in, huthawm lianpui thawn le thinrawhnak ning burh kong in ning lang tuh ing. 35Ram dang mite nelrawn songah ning kawih tuh ai, ciata ah hmaiton dun in i thu khiah ning rel in ning ngen tuh ing. 36Izip ramai nelrawn songah ning paate hnenah i thu khiah rel ai ngen bangin, ningte hnenah i thu khiah ning rel in ning ngen tuh ing.”ti in BAWIPA Pathian in ti i. 37Ningte khiah i tokrolh hnia in ning khel ruai tuh ai, i thukham thawn ning peh tuh ing. 38Ning lakai mi huatsuak te le i lakah a sualtute khiah hnawt tuh sek ing. Kaimah in amahte khiah amahte umhmun ram in suah tuh napui ai amahte in Israel ramah lut tuh lo i. Ciafangin ningte in kaimah khiah Bawipa i ti ling tuh i si.
39BAWIPA Pathian in, “Ning Israel minungte, i thu ngai hlah leisikhaw ning veksen in ning milim zuk khiah bia tu i lai, ning milim zuk le ning hlu thawn a cianghlim i hming khiah zauhsuam ma hang ih. 40Ziangmanti fangin Israel ramai mual saang vumah, a cianghlim i mual vumah, Israel ramai Israel mi veksen in i bia tuh i.” ti in Bawipa Pathian in ti i. Ciata ah amahte khiah saang tuh ing. Ciata ah ning hluhnak le ning raithawihnak a thai hmasaber te khiah a cianghlim ning thilri veksen kawmin ning ngen tuh ing. 41Ram dang mite le kaimah in ning peu ruai hmun caang in ning lang leh fangin, ningte khiah rimhmui bang in ning saang tuh ing. Ciafangin Zental mite hmai ah kaimah khiah ning songin zulhnak ngah tuh ing. 42Ciafangin ning paa te hnenah i kut tung in amahte khiah pe tuhin i khamhnak ram Israel ramah kaimah in ning kawih fangin, ningte in kaimah khiah BAWIPA i ti ling tuh i si. 43Ciata ah ning rim ruai tu ning nundan
le ning perhnak khiah hih tuh i si. Ciafangin a pha lo ning bawnhnak hmuahhmuah manin ningmah veve khiah hua tuh i si. 44Ciafangin ningte in a sia ning nundan le a pha lo ning bawnhnak bangin i lo in, kaimah hming ca manin ning vumah bawn fangin ningte in kaimah khiah BAWIPA i ti ling tuh i si, aw Israel mite.”ti in BAWIPA Pathian in ti i.
45Ciahlai ah BAWIPA thu khiah i hnenah hleng ai, 46BAWIPA in, “Mi fapa, na hmai khiah hlanglam ah hoi tulai, hlanglam ca in tazahaw tulai, hlanglam ai tuu thing te ca in prawfet thu rel tu. 47Hlanglam ai tuu thingte hnenah, ‘BAWIPA rel hnak thu khiah za tuu-ih. BAWIPA Pathian in, “Na songah mai sem ngangkhaw, na song ai thing hing le thing ro khiah a veksen in kang tuh sio i. Cen hlanglam ai panin saklam tian ai mi hmuahhmuah khiah kang tuh sio i. 48Aisu hmuahhmuah in BAWIPA kaimah in sem hnak i ti ling tuhai, aisu in khai hmit ben tuh lo i.”ti i.”ti in’rel tu.”ti in i ruai i. 49Ciafangin kai in, “Aw, BAWIPA Pathian! Amahte in, ‘Ani in thuthim hnak rel i lo im?’ti in i ti i.”ti in sawn ing.