1Israel mite khai Elim in thawn ai Izip ramin a tlan khelleh hla nih le ni hlainga fangin Elim le Sinai laklawh ai Sin Nelrawn ah hleng i. 2Ciafangin Israel mi veksenin Moses le Aaron lakah cam ai, 3“Bawipa in Izip ramah kin rek ta selai pha sawn napui i. Ciata ah bel a dim dim in sa ei tuh nai ai rong khai a kham pek in ei awng i ing. Tuntu heta ah kin veksenin rikam in kin thi ruai tuhin kin kawih i si. “ti in ti i.
4Ciafangin Bawipa in Moses hnenah, “Vancung in ning ca in sangreu tlok ruai tuh ing. Cen anite in nisiar in amahte ca in khul tu seh. Ciafangin amahte in i thukham hlun tuh le tuh lo khiah cu tuh ing. 5Ni ruk nia fangin ni dang ai tahin letnih tam in khul in suang tu seh.” ti in rel i. 6Ciafangin Moses le Aaron in amahte hnenah, “Bawipa in Izip ram in ning suah khiah zanlam fangin ling tuh i si. 7Thangha ah Bawipa thangphathnak hmu tuh i si. Bawipa lakah ning camhnak khiah ning za sah i. Kin lakah cam tu zai kin vuah i si?”ti in ti i. 8Cen Moses in, “Zanlam fangin ei tuhin sa le zinglam fangin sangreu a kham in ei tuh ning pe fangin Bawipa ai ning pe i ti ling tuh i si. Zai kin vuah i si? Ning camhnak heh kin lakah cam i lo ai Bawipa lakah cam i si.” ti in rel i.
9Ciafangin Moses in Aaron hnenah, “Israel mite veksen hnenah, ‘Bawipa hiang ah kawi tuu-ih. Ziangmanti fangin ning camhnak khiah ning za sah zo i.’ ti in rel tu.” ti in ruai i. 10Aaron in ciatih bangin Israel mite hnenah rel laitak in, anite khai nelrawn hmun lamah sik le Bawipa thangphathnak khiah mairo songah daak i. 11Ciafangin Bawipa in Moses hnenah, 12“Israel mite camhnak khiah zazo ing. Amahte hnenah, ‘Zanlam khuathim ngom fangin sa ei tuh i si. Cen zinglam fangin sangreu thawn ning kham tuh i. Ciafangin kaimah khiah ning Bawipa Pathian ti in ling tuh i si.’ ti in rel tu.” ti in ruai i.
13Ciamanin zanlam fangin amahte caamhmun khiah seklah thawn dim ai zinglam fangin amahte caamhmun khiah naidawh thawn khuk i. 14Naidawh ro fangin cia nelrawn ai laipua vumah thil pum taang ai cia thil pum khiah tikhal bang in paa i. 15Cia khiah Israel mite in hmu fangin, “Hetu zai i pa?”ti in pakhat le pakhat zawt dun i. Ziangmanti fangin amahte in cia khiah zai i ti ling lo i. Ciafangin Moses in, “He khiah ning ei tuhai Bawipa ai ning pehnak sangreu i. 16Hetih in Bawipa in ning ruai i: ‘Ning innkua ai ning kul zah in mi pakhat ca in omer pakhat dim tenin khul tuu-ih. A innkua ca in khul tu ten ih.’ ti i.” ti in rel i. 17Ciaman Israel mite in ciatih bangin a hrekkhatte in tam ngai khul ai a hrekkhat te in a tlawmniu khul i. 18Anite khai omer thawn teh fangin, a tamngai khultu in a hlai in nai cuang lo ai a tlawmniu khultu in khai sam cuang lo i. Aisu hmuah in a kulzah in khul tlang i. 19Ciafangin Moses in, “He khiah aisu in khai a thangha tian khawi ma seh.” ti in rel i. 20Ikhalselai anite in Moses thu ngai lo ai a thangha tian khawi le zang thawn dim ai uih berh i. Ciaman Moses khai anite lakah thinraw i. 21Ciatih bangin zing siar in amahte kulhnak zah in khul ai nisa fangin ciate khiah zuul berh i. 22Ni ruk nia fangin a letnih in minung pakhat ca in omer panih ten khul le Israel mi upate a veksenin Moses khiah rel i. 23Ciafang Moses in amahte khiah, “Bawipa in hetih in rel i: ‘Thangha khiah comnia Sabbath i ai Bawipa hnenah a cianghlim Sabbath i. Tunnia ning em tuhhnak khiah em tu i lai ning suang tuhhnak khiah suang tu i lai a val khiah thangha tian khawi tuu-ih.’ ti i.” ti in rel i. 24Ciamanin anite in Moses relhnak bangin a thangha tian khawi i. Ciafangin uih khai uih lo, zang khai um lo i. 25Ciafangin Moses in, “Cia khiah tunnia ah ei tuu-ih. Ziangmanti fangin tunnia khiah Bawipa hnenah Sabbath nia i. Tunnia ah hampalakah tawk tuh lo i si. 26Ni ruk song khul tuh i si. Ikhalselai ni sarih nia tu Sabbath i le cia nia ah zaikhai um tuh lo i.”ti in rel i. 27Ikhalselai mi hrekkhatte in ni sarih nia ah khul tuh in feh fangin pakhat bang khai tawk lo i. 28Ciafangin Bawipa in Moses hnenah, “Zai cam tian i thukham le i upadi dan khiah hlun lo in el tuh i si? 29Sik tuu-ih. Bawipa in Sabbath ning pe i. Ciaman ni ruk nia ah ni nih ca rong ning pe i. Ciaman aisu khai ni sarih nia ah inn songin suak lo in inn song ah um tu ngio seh.”ti in ti i. 30Ciaman Israel mite in ni sarih nia fangin naper lo in com i. 31Israel mite in cia rong khiah Manna ti in ko i. Cia manna khiah koriander mu bang i ai khotilu thawn rawihhnak lawti bang in hlum i.
32Ciafangin Moses in, “Bawipa in hetih bang in kin ruai i: ‘Izip ramin ning suah fangin nelrawn lakah ning cawmhnak rong khiah ning fate in hmu thai in omer dim in manna khiah dah tuu-ih.’tin ti i.” ti in rel i. 33Ciafang Moses in Aaron hnenah, “Bel pakhat khiah lang tulai omer khat in manna thun tulai ning fate ca in Bawipa hmai ah dah tu.” ti in ruai i. 34Bawipa in Moses ruai bang in Aaron in cia manna khiah Thukham hmai ah khawi i. 35Israel mite khai mite khuato hmun ram hleng hlan tian kum 40 song manna ei i. Khanaan ramri hleng hlan tian amahte in manna ei i. 36Omer khiah ephah hmunha khan hmunkhat i.